ខេត្ដសៀមរាបៈ ប្រជាពលរដ្ឋ៨២គ្រួសារ មកពីស្រុកជីក្រែង ខេត្ដសៀមរាប បានប្រមូលផ្ដុំគ្នាខាងមុខតុលាការខេត្ត ធ្វើឡើងកាលពីព្រឹកថ្ងៃទី០៣ខែធ្នូឆ្នាំ២០១៤ ដែលមានពលរដ្ឋចូលរួចតវ៉ាប្រមាណជាជិត១០០នាក់ ដើម្បីទាមទារឲ្យចៅក្រមសាលាដំបូងខេត្ដសៀមរាប ផ្ដល់យុត្ដិធម៌ ដោយរក្សា
ដីស្រែប្រាំងចំនួន៣០៥ហិកតា ជូនពលរដ្ឋ៨២គ្រួសារកាន់កាប់ឡើងវិញ។ពលរដ្ឋរស់នៅភូមិល្វា ឃុំស្ពានត្នោត ស្រុកជីក្រែងលោក ឡឹក គ្រឿន បានឲ្យដឹងនៅកន្លែងប្រមូលផ្ដុំគ្នាមុខតុលាការថា ដីស្រែប្រាំងពលរដ្ឋចំនួន៣០៥ហិកតា ដែលរដ្ឋាភិបាលកាត់ឆ្វៀលឲ្យពលរដ្ឋនៅឆ្នាំ២០១២ ត្រូវបានក្រុមឈ្មួញ៥នាក់នៅស្រុកប្រាសាទបាគង កាន់កាប់ និងធ្វើស្រែប្រាំងជា
រៀងរាល់ឆ្នាំ ដោយអាជ្ញាធរមូលដ្ឋានមិនមានដោះស្រាយជួនពួកគេឡើយ។លោកបន្ដថា ពួកគាត់ទាមទារឲ្យចៅក្រមសាលាដំបូងខេត្ដ លោក អឿង វណ្ណា ផ្ដល់យុត្ដិធម៌ ដោយប្រគល់ដីស្រែប្រាំង៣០៥ហិកតា ជូនពលរដ្ឋ៨២គ្រួសារកាន់កាប់វិញ ដើម្បីធ្វើស្រែប្រាំងនៅរដូវប្រាំងខាងមុខនេះ ព្រោះដីនោះពួកគេមានឯកសារបញ្ជាក់ត្រឹមត្រូវពីតំណាងរាស្ដ្រខេត្ដសៀមរាប។
ចំណែក លោក សេង ជឹង ជាពលរដ្ឋតវ៉ាម្នាក់ទៀតបានរៀបរាប់ថា ពលរដ្ឋ៨២គ្រូសារនោះ ពួកគេមិនអាចធ្វើស្រែប្រាំងបាន បន្ទាប់ពីចៅក្រមសាលាដំបូងខេត្ត លោក ឌុច សុខសារិន ចេញដីការរក្សាការពារឲ្យពួកគាត់នៅក្នុងអំឡុងខែកញ្ញាឆ្នាំ២០១៤កន្លងមក ដោយក្រុមអាជ្ញាធរបានគំរាមចាប់ពួកគេដាក់ពន្ធនាគារ ដោយចោទថា ខុសច្បាប់។លោកបន្ដថា ចំណែកក្រុមឈ្មួញទាំង៥នាក់នោះវិញ អាជ្ញាធរមិនរារាំងនោះឡើយ។លោកព្រមានថា បើសិនតុលាការមិនផ្ដល់យុត្ដិធម៌នោះទេពួកគាត់នឹងបំផ្លាញទ្រព្យសម្បត្ដិក្រុមឈ្មួយទាំង៥នាក់នោះចោល និងចូលធ្វើស្រែប្រាំង៣០៥ហិកតានោះនៅពេលខាងមុខនេះ។
ទាក់ទិនទៅនឹងការលើកឡើងខាងលើនេះដែរ លោក អឿង វណ្ណា ចៅក្រមស៊ើបសួរនៃសាលាដំបូងខេត្ដសៀមរាប មិនអាចសុំការពន្យល់ពីលោកបានទេ ដោយសារទូរស័ព្ទហៅចូលច្រើនដងមិនមានអ្នកទទួល។តំណាងពលរដ្ឋមួយរូបក្នុងចំណោមបីនាក់ដែលតុលាការហៅចូលបំភ្លឺនោះ និងត្រូវជាមេភូមិល្វា លោក យង់ ហ៊ាន ថ្លែងថា ចៅក្រមនឹងលើកទៅប្រកាសសាលក្រម នៅថ្ងៃទី១៨ខែធ្នូខាងមុខនេះ។
គួរបញ្ជាក់ថា កាលពីដើមខែមេសា ឆ្នាំ២០១២ ដីស្រែប្រាំងពួកគាត់៣០៥ហិកតានោះ ត្រូវបានតំណាងរាស្ដ្រខេត្ដសៀមរាប លោក សៀង ណាំ ប្រកាសប្រគល់ ឲ្យប្រជាពលរដ្ឋ៨២គ្រួសារជាបណ្ដោះអាសន្ន បន្ទាប់ ពីប្រគល់ឲ្យរួចមក ទំនាស់ក៏ចាប់ផ្ដើមកើតឡើងជាបន្ដបន្ទាប់ ជាមួយពលរដ្ឋ៥នាក់ នៅស្រុកប្រាសាទបាគងនេះ។ ពលរដ្ឋបញ្ជាក់ថា នៅខែសីហា ឆ្នាំ២០១៤នេះ អនុប្រធានតុលាការខេត្ដ បានចេញដីការសម្រេចការពារ និងរឹបអូសពីពលរដ្ឋ៥នាក់នៅស្រុកប្រាសាទបាគង នោះដោយរក្សាទុកនៅស្ថានភាពដើមនៃអចលនវត្ថុ។
ប៉ុន្ដែ នៅថ្ងៃទី២១ ខែតុលាឆ្នាំ២០១៤ ចៅក្រមសាលាដំបូងខេត្ដសៀមរាប លោក អឿង វណ្ណា បានចេញដីកាសម្រេចបគល់ដីឲ្យទៅពលរដ្ឋទាំង៥នាក់នោះដើម្បីបង្កបង្កើនផលវិញ ក្រោមហេតុផលយ៉ាងដូច្នេះហើយ ទើបធ្វើឲ្យពលរដ្ឋកើតទុក្ខមិនសុខចិត្តក៏នាំគ្នាមកតវ៉ាសាជាថ្មីនៅមុខសាលាដំបូងខេត្តសៀមរាបដើម្បីរកយុត្តិធម៌៕
