កំពង់ឆ្នាំង៖ អាជីវករមួយគ្រួសារដែលបានសង់ផ្ទះពីសង្ក័សី រំលោភយកចំណីដីថ្នល់ផ្សារលើ ព្រមទាំងមានការរឹងរូសមិនព្រមរុះរើចេញ តាមការណែរនាំរបស់សាលាក្រុងកំពង់ឆ្នាំង និងធ្វើអោយមានការរំខានដល់គំរោងអភិវឌ្ឍន៍ផ្លូវជុំវិញផ្សារលើ នៅពេលអង្គការចៃការជប៉ុនប្រគល់ទីតាំង
ដែលធ្វើរួចរាល់ អោយមកអាជ្ញាធរខេត្តក្រុងជាអ្នកគ្រប់គ្រង និងថែររក្សាបណ្តោះអាសន្ន។ ការប្រតិកម្មតវ៉ារឿងនេះឡើងនៅវេលាម៉ោង៣និង៣០នាទីល្ងាចថ្ងៃទី០៣ ខែធ្នូ ឆ្នាំ២០១៤ នៅចំ ណុចមុខផ្ទះលេខ F១៣១ ក្រុមទី៦ ក្នុងភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង។
លោក ម៉ាយ ម៉ឹងលី និងកូនស្រីជាម្ចាស់ផ្ទះលេខF១៣១ដែលបានសង់រំលោភលើដី ចំណីផ្លូវខាងត្បូងផ្សារលើនោះ បានធ្វើការតវ៉ាជាមួយអាជ្ញាធរខេត្តនិងក្រុងកំពង់ឆ្នាំង មិនអោយរុះរើផ្ទះរបស់គាត់នោះទេ ព្រោះគាត់មិនមានកន្លែងលក់កាហ្វេគុយទាវចិញ្ចឹមជីវិតផ្សេងឡើយ។
ពាក់ពន្ធ័នឹងបញ្ហានេះលោក ហៃ មនោរម្យ អភិបាលក្រុងកំពង់ឆ្នាំងបានអោយដឹងថា៖ផ្ទះ អាជីវករដែលបានសង់រំលោភមកលើចំណីផ្លូវសងខាងផ្សារលើទាំងអស់ គេបានរុះរើកាត់តំរឹមទៅ តាមការណែរនាំរបស់សាលាក្រុងកំពង់ឆ្នាំងរួចរាល់ហើយ តែចំពោះផ្ទះលោក ម៉ាយ ម៉ឹងលី មិនបានគោរពទៅតាមការណែនាំរបស់សាលាក្រុងឡើយ។
ការរៀបចំផ្លូវជុំវិញផ្សារលើអោយស្អាត និងមានរបៀបរៀបរយឡើងវិញនេះ គឺត្រូវធ្វើអោយចប់សព្វគ្រប់នៅចុងខែមករាឆ្នាំ២០១៤ ដើម្បី រៀបចំទីតាំងតូបលក់ដូរជូនអាជីវករចំនួន៥០០តូបជុំវិញផ្សារលើបន្ថែមទៀត។
នៅក្នុងពេលចុះមកទទួលយកនូវផ្លូវខាងត្បូងផ្សារលើដែលកសាងរួច ពីអង្គការចៃការជប៉ុនឯ.ឧ អ៊ុន សំអុល និងឯ.ឧ ស៊ុន សុវណ្ណារិទ្ធ អភិបាលរងខេត្តកំពង់ឆ្នាំងបានថ្លែង អោយអ្នកយកព័ត៌មានយើងដឹងថា៖លោក ម៉ាយ ម៉ឹងលី ត្រូវតែគោរពតាមការណែរនាំរបស់អាជ្ញាធរខេត្តក្រុងក្នុងការរៀបចំសណ្តាប់ធ្នាប់ សោភ័ណភាព និងបរិស្ថានជុំវិញផ្សារលើឡើងវិញ ព្រោះគាត់បានរំលោភបំពានយកដីចំណីផ្លូវសាធារណៈមកសង់ផ្ទះ ជាកម្មសិទ្ធរបស់ខ្លួនដោយខុសច្បាប់។ប្រសិនបើនៅតែរឹងរូស មិនគោរពតាម អាជ្ញាធរខេត្តក្រុងនឹងចុះធ្វើការរុះរើដោយខ្លួនឯងដោយមិនទុកអោយមានការរំខានដល់ការអភិវឌ្ឍន៍របស់សាលាក្រុងនិងរបស់អង្គការចៃការនោះឡើយ។
ចំណែកអាជីវករទាំងអស់ដែលបានកាត់តំរឹមផ្ទះតាមការណែរនាំរបស់អាជ្ញាធរខេត្តនិងក្រុង នោះបានមានការពេញចិត្តសាទរចំពោះវិធានការនេះ និងបានថ្លែងអំណរគុណដល់អាជ្ញាធរខេត្ត និងក្រុងកំពង់ឆ្នាំងខិតខំរៀបចំសណ្តាប់ធ្នាប់អនាម័យបរិស្ថាន សុខមាលភាពនិងសោភ័ណភាព នៅជុំវិញបរិវេណផ្សារលើ ក៍ដូចជាប្រព័ន្ធលូថ្នល់ក្នុងក្រុងកំពង់ឆ្នាំងជូនប្រជាពលរដ្ឋអោយស្អាត ឡើងវិញនាពេលនេះ ជាពិសេសប្រមុខរាជរដ្ឋាភិបាលដែលបានជួយគិតគូរក្នុងការអភិវឌ្ឍន៍ ទីក្រុងកំពង់ឆ្នាំងអោយមានការរីកចំរើនដើម្បីលើកស្ទួយជីវភាពរស់នៅរបស់ប្រជាពលរដ្ឋ៕
