ភ្នំពេញ ៖រថយន្តកាមរីបាឡែនមួយគ្រឿងបើកបរដោយបុរសស្រវឹងស្រាម្នាក់និងរួមដំណើរជាមួយនារីម្នាក់បានបើកយ៉ាងលឿនបណ្តាលឱ្យរថយន្តជ្រុលចង្កូតទៅបុករះរនាំងដែកពុះចែកទ្រូងផ្លូវបាក់និងទ្រេតអស់១០ផ្ទាំងហើយរថយន្តមិនទាន់អស់ល្បឿនក៏ជ្រុលទៅបុកជារថយន្តតូយ៉ូតាព្រូសពេញចំពីមុខពេញទំហឹងរងការខូចខាតរថយន្តទាំងសងខាងតែសំណាងល្អអ្នកបើកបរមិនមានរងគ្រោះថ្នាក់ ។ ហេតុការណ៍នេះកើតឡើងកាលពីវេលាម៉ោង១១ និង ៤០នាទីយប់ ថ្ងៃទី៣ ធ្នូ ២០១៤ នៅចំណុចក្បែរស្តុប២០០៤តាមមហាវិថីសហ ព័ន្ធរុស្ស៊ី ស្ថិតក្នុងសង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុគេឃើញរថយន្តកាមរីបាឡែន ពណ៌ទឹកប្រាក់មួយគ្រឿង ពាក់ស្លាកលេខភ្នំពេញ 2W-0074 បើកដោយបុរសម្នាក់ក្នុងស្ថានភាពស្រវឹងនិងរួមដំណើរជាមួយនារីម្នាក់ដោយធ្វើដំណើរយ៉ាងលឿនតាមមហាវិថីសហព័ន្ធរុស្ស៊ី ក្នុងទិសដៅពីកើតទៅលិច ខណៈមកដល់ចំណុចកើតហេតុរថយន្តក៏បានរេចង្កូតទៅបុករះរនាំងដែកពុះចែកទ្រូងផ្លូវបាក់និងទ្រេតអស់ចំនួន១០ផ្ទាំង ហើយរថយន្តមិនទាន់អស់ល្បឿនក៍បានជ្រុលទៅបុករថយន្តតូយ៉ូតាព្រស ពណ៌ទឹកប្រាក់មួយគ្រឿងពាក់ស្លាកលេខភ្នំពេញ 2W-9746 បើកបរដោយបុរសម្នាក់តាមមហាវិថីសហព័ន្ធរុស្ស៊ីក្នុងទិសដៅពីលិចទៅកើតចំពីមុខពេញទំហឹងបណ្តាលឱ្យរថយន្តទាំងពីរគ្រឿងរងការខូចខាតដូចគ្នាដោយរថយន្តកាមរីបាឡែនដាច់កាឡេកង់មុខខាងឆ្វេងចំណែករថយន្តតូយ៉ូតាព្រូសរងការខូចខាតមួយកំណាត់មុខខាងឆ្វេងតែសំណាងល្អអ្នកបើកបរពុំមានរងរបួស ។
ក្រោយពេលកើតហេតុសមត្ថកិច្ចបានធ្វើការវាស់វែងនិងបានហៅរថយន្តស្ទូចមកស្ទូចយករថយន្តទាំងពីរគ្រឿងទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នាចំពោះផ្លូវច្បាប់ ។
Ads
