ខេត្តបន្ទាយមានជ័យ ៖សង្ឃក្លែងក្លាយ៤ត្រូវនគរបាលចាប់ខ្លួននៅជាយដែនប៉ោយប៉ែត ខេត្តបន្ទាយមានជ័យ កាលពីវេលាម៉ោងជិត១១យប់ ថ្ងៃទី៣ ធ្នូ ២០១៤ ទីបំផុតជនសង្ស័យ២នាក់ជាសង្ឃក្លែងក្លាយទើបវិលត្រឡប់ពីប្រទេសថៃ និង២នាក់គ្រោងចេញពីកម្ពុជាទៅថៃសង្ស័យទៅធ្វើជាសង្ឃក្លែងក្លាយដូចគ្នា ត្រូវនគរបាលសង្កាត់ ផ្សារកណ្តាលឃាត់ខ្លួនសួនាំបណ្តោះអាសន្ននិងកសាងសំណុំរឿងចាត់ការតាមច្បាប់។
នាយប៉ុស្តិ៍សង្កាត់ផ្សារកណ្តាល លោក ចាន់ សុភី បានឲ្យដឹងនៅថ្ងៃទី៤ ខែធ្នូ ឆ្នាំ២០១៤នេះថា ជនសង្ស័យទាំង៤នាក់ដែលសមត្ថកិច្ចយើងឃាត់ខ្លួន០១-ឈ្មោះយឹម បូរ ឬយឹម វ៉ន អាយុ៥៦ឆ្នាំ(សង្ឃក្លែងក្លាយ), ០២-ឈ្មោះពាំង ណុប ឬឈ្មោះមាស រដ្ឋា អាយុ៣៩ឆ្នាំ (សង្ឃក្លែងក្លាយ), ០៣-ឈ្មោះអ៊ីង ថន ភេទប្រុស អាយុ៤០ឆ្នាំ និង៤-ឈ្មោះហ៊ឹង សៅ ភេទប្រុស អាយុ២៧ឆ្នាំ ដោយពួកគេទាំង៤នាក់មកពីស្រុកដងទង់ខេត្តកំពតជាមួយគ្នា៣នាក់ រស់នៅភូមិដុកធ្លក ឃុំទទុង និងឈ្មោះហ៊ឹង សៅ រស់នៅភូមិព្រៃសំណាងក្រោម ឃុំខ្ជាយខាងជើង។ពួកគេសុទ្ធតែមានលិខិតឆ្លងដែន និងឆាយ៉ាលក្ខ័ម្នាក់មួយ ដែលគេ មិនដឹងថា ជារបស់ពិតឬរបស់ក្លែងក្លាយឡើយ។
លោក អ៊ុំ សុផល អធិការនគរបាលក្រុងប៉ោយប៉ែត បានឲ្យដឹងថា ការឃាត់ខ្លួនជនសង្ស័យទាំង៤ គឺសមត្ថកិច្ចយើងធ្វើឡើង ខណៈពួកគេដើរក្នុងភូមិ ហើយប្រជាពលរដ្ឋសង្ស័យ ព្រោះជាអ្នកចម្លែកក៏នាំគ្នាព័ទ្ធចាប់ប្រគល់ឲ្យសមត្ថកិច្ច និងប្រជាការពារភូមិ ឃាត់ខ្លួនសួរនាំទើបដឹងថាពួកគេគឺជាសង្ឃ ក្លែងក្លាយ មាន២នាក់ជាសង្ឃក្លែងក្លាយ និង២នាក់ទៀតទើបមកពីស្រុក តែសង្ស័យជាក្រុមតែមួយ ព្រោះមានគោលដៅមកកាន់ទីតាំងតែមួយក្នុងពេលកើតហេតុ។ក្នុងនោះមានមេភូមិម្នាក់ជាមនុស្សនៅពី ក្រោយរឿងនេះ។
ប្រភពពីប្រជាពលរដ្ឋ ពិសេសក្រុមអ្នករត់ម៉ូតូឌុប បាននិយាយក្តែងៗថា ពួកគាត់ធ្លាប់ឃើញមនុស្ស ទាំង៤នាក់នេះ នៅតាមហាងផឹកស៊ីក្នុងក្រុងប៉ោយប៉ែត ពេលរាត្រី តែពុំបានដឹងថា ពួកគេទាំងអស់ជា សង្ឃក្លែងក្លាយទេ នៅពេលប៉ូលីសចាប់ខ្លួនទើបដឹងមុខមាត់ពិតរបស់ពួកគេគឺជាមនុស្ស បំផ្លាញ សាសនាខ្លួនឯង។
បើទោះបីជាបែបណានោះ សមត្ថកិច្ចបានដុតដៃដុតជើង កសាងសំណុំរឿងដើម្បីបញ្ជូនជនសង្ស័យ ទាំងនេះ ទៅថ្នាក់ឲ្យលើដើម្បីចាត់ការតាមច្បាប់ហើយ៕
