ស្ទឹងត្រែង៖ទំនប់វ៉ារីអគ្គីសនីសេសានក្រោម២ដែលមានទីតាំងស្ថិតនៅក្នុងឃុំភ្លុកស្រុកសេសានខេត្តស្ទឹងត្រែងគិតមកដល់ថ្ងៃទី០៥ ខែធ្នូ ឆ្នាំ២០១៤នេះ ក្រុមសាងសង់សំរេចស្ថាបនាបានប្រមាណ២០%ហើយដោយទទួលបានការគាំទ្រ និងចូលរួមបង្កលក្ខណៈងាយស្រួល ពីក្រុមការងារពាក់ព័ន្ធ និងអាជ្ញាធរក្នុងខេត្ដផងដែរ។
តាមគម្រោងផែនការសាងសង់ទំនប់វ៉ារីអគ្គីសនីឲ្យហើយនៅឆ្នាំ២០១៧នោះក្រុមហ៊ុនបានធ្វើសកម្មភាពយ៉ាងមមាញឹកសាងសង់មូលដ្ឋាន ដែលបានចាប់ផ្តើមពីខែមករាឆ្នាំ២០១៤មក ដែលជំហ៊ានដំបូងស្ថាបនាផ្លូវចូលពីផ្លូវជាតិលេខ៧៨នៅចំណុចទឹកដីឃុំភ្លុកមានចំងាយ១៧គីឡូម៉ែត្រទៅដល់ទំនប់ឆ្លងកាត់ទន្លេសេសានតែម្តង។
លោកអ៊ីវវ៉ាន់កៅតំណាងក្រុមហ៊ុនសាងសង់ទំនប់នេះបានបញ្ជាក់ថា៖ក្រុមហ៊ុនគោរពតាមគោលការរណ៍និងគោលនយោបាយរបស់រាជរដ្ឋាភិបាល ខិតខំស្ថាបនាទំនប់នេះ ឲ្យហើយទៅតាមផែនការកំណត់នៅឆ្នាំ២០១៧បច្ចុប្បន្នកសាងផ្លូវពង្វាងទឹកជិតរួចរាល់ហើយ កសាងមូលដ្ឋានរស់នៅរបស់កម្មករមូលដ្ឋាន ដាក់សម្ភារៈនិងទំនប់បញ្ចាលទឹកចំនួន២ បន្ថែមទៀត។
លោកតំណាងក្រុមហ៊ុនបញ្ចាក់ថា៖សកម្មភាពសាងសង់នេះ ដំណើរការទៅបានល្អ និងសំរេចបានទៅតាមផែនការ ដែលបានគ្រោងទុកការងារឆ្នាំនេះ អាកាសធាតុវាអំណោយផល ការងារការដ្ឋានវាទៅមុខល្អ យើងវាយតំលៃការងារទាំងមូល អាចសំរេចបាន២០%នៃផែនការទាំងមូល យើងសន្យាជាមួយរដ្ឋាភិបាលសំរេចតួប៊ីនទី១ដើមនៅក្នុងឆ្នាំ២០១៧ហើយឆ្នាំ២០១៨ជាស្ថាពរតួប៊ីនទាំងមូលហ្នឹងដើរ។
លោកបន្ថែមថាចំពោះសកម្មភាពផ្សេងៗទៀតគឺក្រុមគណៈកម្មការ ដោះស្រាយផលប៉ះពាល់បានចុះត្រួតពិនិត្យ និងស្រង់ទិន្ន័យផលប៉ះពាល់ ដោះស្រាយទៅតាមសំណូមពរ របស់ប្រជាពលរដ្ឋ និង រៀបចំទីតាំងលំនៅដ្ឋានថ្មីគ្រប់បែបយ៉ាង ទៅតាមគោលការណ៍ ដើម្បីបង្កលក្ខណៈងាយស្រួល មុនពេលដែលត្រូវឲ្យពួកគាត់ចេញទៅនៅលំនៅដ្ឋានថ្មី ឲ្យបានល្អប្រសើរជាងភូមិចាស់ ដែលមានចំនួនជាង៨០០គ្រួសារ នៅក្នុងឃុំចំនួន៣ គឺទី១ឃុំភ្លុកទី២ឃុំស្រែគរនិងទី៣ឃុំក្បាលរមាសក្នុងស្រុកសេសានខេត្តស្ទឹងត្រែង៕
