កំពង់ឆ្នាំង៖ បង្កាន់ដៃស្ពានថ្មប្រវែងប្រមាណ៦ម៉ែត្រ បានរងការខូចខាតបាក់បែកខ្ទេចខ្ទី ដោយសាររថយន្តកុងតេនន័រមួយគ្រឿងគេចពីរថយន្តយីឌុបបុកពេញទំហឹង។ហេតុការ ណ៍នេះបានកើតឡើងនៅវេលាម៉ោង៥និង៣០នាទីព្រឹកថ្ងៃទី០៥ ខែធ្នូ ឆ្នាំ២០១៤ តាមបណ្តោយផ្លូវជាតិលេខ៥ ចំណុចស្ពានថ្មទី២មកស្រុកឧត្តុង្គ ស្ថិតក្នុងភូមិពោធិឬទ្ធីក្រៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍ស្រុកសាមគ្គីមានជ័យ បានអោយដឹងថា៖រថយន្តកុងតេនន័របង្កហេតុម៉ាកហ្វុយហ្សូពណ៌បៃតង ពាក់ស្លាកលេខ ក្រុងព្រះស៊ីហនុ3A-1550 បើក បរពីត្បូងមកជើង លុះដល់ចំណុចកើតហេតុក៍បានវាក់នឹងរថយន្តយីឌុបដែលកំពុងបើកបរ ពីមុខក៍ស្រាប់តែជាន់ហ្វ្រាំងទាំងបង្ខំ ព្រោះតែឃើញមនុស្សអង្គុយកណ្តាលស្ពាន(ខ្មោចលង) ខណៈនោះរថយន្តបង្កដែលបើកពីក្រោយក៍បានគេចទាំងបង្ខំរេទៅបុកបង្កាន់ដៃស្ពានបាក់បែក និងធ្លាក់ក្បាលរថយន្តចូលក្នុងប្រឡាយ។នៅក្នុងហេតុការណ៍នេះមិនមានអ្នករងរបួសឡើយ។ចំណែកអ្នកបើកបររថយន្តបង្ក មិនត្រូវបានគេអោយដឹងឈ្មោះនោះឡើយ។
ក្រោយពេលកើតហេតុ រថយន្តយីឌុបបានបើកបន្តទៅមុខបាត់ ដោយឡែករថយន្តបង្ក ត្រូវបានសមត្ថកិច្ចឃាត់ទុកកសាងសំណុំរឿងដើម្បីដោះស្រាយជាមួយមន្ទីរសាធារណៈការ និងដឹកជញ្ជូនខេត្ត។ ករណីគ្រោះថ្នាក់ចរាចរណ៍នេះ ត្រូវបានសមត្ថកិច្ចសន្និដ្ឋានថា បណ្តាលមកពីរថយន្តទី២បើកកៀកកិតជាមួយកន្ទុយរថយន្តទី១ពេក ពេលមានឧបសគ្គចាប់ហ្វ្រាំងមិនទាន់ទើបបង្កអោយមានគ្រោះថ្នាក់ខាងលើនេះ៕
