តម្លៃប្រេង គិតចាប់ពីថ្ងៃអង្គារម្សិលមិញនេះ ត្រូវបានគេដឹងថា មានការធ្លាក់ចុះ បន្ទាប់ពីរដ្ឋាភិបាលអ៊ីរ៉ាក់ និងតំបន់ស្វយ័តឃឺត បានព្រមព្រៀងគ្នា គ្រោងធ្វើការនាំប្រេងចេញ នូវបរិមាណច្រើន ទៅកាន់ទីផ្សារពិភពលោក ។ទូរទស្សន៍សិង្ហបុរី Channel News Asia ផ្សព្វផ្សាយ នៅថ្ងៃទី០៣ ខែធ្នូ
ឆ្នាំ២០១៤ថា យោងតាមទិន្នន័យ ដែលបាន បង្ហាញឡើង ដោយទីផ្សារអន្តរជាតិប្រេងដ៏ធំ នៅប៉ែកខាងលិច នៃរដ្ឋតិចសាស់ សហរដ្ឋអាម៉េរិកបានឲ្យដឹងថា តម្លៃ ប្រេងបានធ្លាក់ចុះប្រមាណ ២,១២ដុល្លារ ក្នុង១បារ៉ែល ដែលមានតម្លៃស្មើនឹង ៦៦,៨៨ ដុល្លារ គិតនៅក្នុងខែមករា ម្ល៉េះ តួលេខនេះបានមកពី New York Mercantile Exchange ។
ចំណែកតម្លៃប្រេងនៅទីក្រុងឡុងដ៍វិញ តម្លៃក៏ធ្លាក់ ចុះដែរ ប្រមាណ ២ដុល្លារ ដោយក្នុង ១បារ៉ែលស្មើនឹង ៧០,៥៤ដុល្លារ ។គេបានដឹងថា កាល់ពីថ្ងៃអង្គារម្សិលមិញនេះ រដ្ឋាភិបាលអ៊ីរ៉ាក់ និងតំបន់ស្វយ័តឃឺត បានចេញសេចក្តីប្រកាសមួយ ដោយឯកភាពដោះស្រាយនូវជម្លោះទឹកជាមួយគ្នា ក្នុងនោះបានលើកឡើង អំពីគម្រោងថវិកា និងការនាំប្រេងចេញ ។ ផ្អែកតាមកិច្ចព្រមព្រៀងគ្នានេះ គេរំពឹងថា នៅឆ្នាំក្រោយ ការនាំចេញប្រេងពីតំបន់ជម្លោះ នឹងមានបរិមាណ ២៥០.០០០ បារ៉ែល ក្នុង១ថ្ងៃ និងតំបន់មួយចំនួនទៀត នឹងមានចំនួន ៣០០ពាន់បារ៉ែលក្នុង១ថ្ងៃដែរ ។
តាមរយៈកិច្ចព្រមព្រៀងគ្នានេះ ដែលអាចជួយដល់សមាជិក របស់អង្គការអូពិក ក្នុងការកំណត់ការផលិតប្រេងប្រចាំ ថ្ងៃប្រមាណ ៣លានបារ៉ែលក្នុង ១ថ្ងៃ ហើយតួលេខនេះ អាចលើសពីខែវិច្ឆិកា ដែលមានត្រឹម ២,៥លានបារ៉ែលតែ ប៉ុណ្ណោះ ។
យោងតាមស្ថិតិមួយ ដែលបង្ហាញឡើង ដោយក្រុមស្រាវជ្រាវសេដ្ឋកិច្ច និងថាមពល Michael Lynch បានឲ្យដឹងថា ការបន្ថែមប្រេង ៥៥០ពាន់បារ៉ែលក្នុង១ថ្ងៃ យ៉ាងដូច្នេះ វាមិនមែនជាបរិមាណដ៏ច្រើននោះទេ តែទោះបីជាបែបនេះក្តី ក៏អាចជួយទប់នូវការធ្លាក់ចុះតម្លៃប្រេងបានមួយកម្រិតដែរ ខណៈដែលសបា្តហ៍ មុនបានស្រុតចុះ នូវតម្លៃយ៉ាងច្រើន នោះ ។
គួររំលឹកថា អង្គការអូពិក បានបើកកិច្ចប្រជុំរបស់ខ្លួន ដោយប្រកាន់នូវជំហរមួយថា មិនមានអ្វីដែលផ្លាស់ប្តូរ ក្នុងការ ផលិតប្រេងនោះឡើយ បើទោះបីជាតម្លៃប្រេង បន្តធ្លាក់ចុះយ៉ាងគំហុកក៏ដោយ ៕
