ខេត្តកំពង់ឆ្នាំង ចុះផ្សព្វផ្សាយច្បាប់ជលផល ដល់ប្រជានេសាទ នៅភូមិចុងកោះ សមត្ថកិច្ចរដ្ឋបាលជលផល ខេត្តកំពង់ឆ្នាំង ដឹកនាំដោយលោក សេង ម៉េងស្រ៊ុន ព្រះរាជ អាជ្ញារងសាលាដំបូង ខេត្តកំពង់ឆ្នាំង និងលោក លី ឡា នាយរងខណ្ឌរដ្ឋបាលជលផលខេត្ត បានចុះផ្សព្វផ្សាយ
ច្បាប់ស្តីពីជលផល ដល់ប្រជានេសាទ កាលពីព្រឹកថ្ងៃទី០៥ ខែធ្នូ ឆ្នាំ២០១៤នេះ ស្ថិតក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ដោយមានប្រជាពលរដ្ឋ ចូលរួមចំនួន៤៨នាក់ក្នុងពិធីនេះ ។
លោក លី ឡា នាយរងខណ្ឌរដ្ឋ បាលជលផលខេត្ត បានថ្លែង និងផ្សព្វផ្សាយ អនុក្រឹត្យលេខ ១៩៧ អនក្រ.បក ស្តីពីការកំណត់ដែនព្រៃលិចទឹក ចំនួន៦៤៧.៤០៦ហិកតា ស្ថិតក្នុងខេត្តទាំង៦ ជុំវិញបឹងទន្លេសាប អនុក្រឹត្យលេខ៣៧ អនក្រ.បក ស្តីពីការលុបឡូតិ៍នេសាទ ជុំវិញបឹងទន្លេសាប ក្នុងខេត្តបាត់ដំបង បន្ទាយមានជ័យ សៀមរៀប ពោធិសាត់ កំពង់ឆ្នាំង និងកំពង់ធំ ទុកសម្រាប់ប្រជាពលរដ្ឋនេសាទ ជាលក្ខណៈគ្រួសារ និងទុកជាកន្លែងអភិរក្សរដ្ឋបាលជលផល សេចក្តីប្រកាសលេខ០២ ស.ប្រ.ក ស្តីពីវិធានការលុបបំបាត់ ឧបករណ៍នេសាទឆក់ត្រី និងឧបករណ៍នេសាទស្បៃមុង ប្រកាសលេខ៤៥៨ ប្រក.ក.ស.ស ស្តីពីការកំណត់ប្រភេទឧបករណ៍ នេសាទគ្រួសារ ដែលអនុញ្ញាត្តិអោយប្រើប្រាស់ សម្រាប់នេសាទនៅក្នុងដែនទឹកសាប នៃព្រះរាជាណាចក្រកម្ពុជា និងការផ្សព្វផ្សាយលិខិតលេខ ៤០៤ ប្រក.ក.ស.ក ស្តីពីការបញ្ឈប់សកម្មភាព ចិញ្ចឹមត្រីឆ្តោរ ត្រីរ៉ស់ របស់ក្រសួងកសិកម្មរុក្ខាប្រមាញ់ និងនេសាទ ។
ក្នុងឱកាសនេះដែរ លោក សេង ម៉េងស្រ៊ុន ព្រះរាជអាជ្ញារងសាលាដំបូង ខេត្តកំពង់ឆ្នាំង បានថ្លែងទៅកាន់ប្រជានេសាទទាំងអស់ ដែលបានចូលរួមថា សូមអោយប្រជានេសាទទាំងអស់គោរពអោយបានខ្ជាប់ខ្ជួន នូវច្បាប់ស្តីពីជលផល ដែលសមត្ថកិច្ច និងអាជ្ញាធរពាក់ព័ន្ធ ចុះមកធ្វើការផ្សព្វផ្សាយនាពេលនេះ ជៀសវាងការប្រព្រឹត្តបទល្មើសនេសាទ ដែលច្បាប់ហាមឃាត់ ។
សូមចូលរួមពង្រឹងការអនុវត្ត និងចូលរួមចំណែក ការពារតំបន់អភិរក្សមេពូជត្រី និងតំបន់ពាក់ព័ន្ធជាច្រើនទៀត អោយបានល្អប្រសើរ ស្នើសុំដល់សមត្ថកិច្ចរដ្ឋបាលជលផលខេត្ត ជួយពង្រឹងកម្លាំងសហគមន៍នេសាទបន្ថែម សំដៅអនុវត្តអោយបាន នូវការទប់ស្កាត់បទល្មើសនេសាទ និងផ្តាំផ្ញើដល់ប្រជានេសាទ ដែលប្រកបមុខរបរនេសាទខុសច្បាប់ ដូចជាការដាក់របាំងផ្ជិតព្រែក និងការកាប់បំផ្លាញព្រៃលិចទឹក ដែលជាដែនជំរកត្រីពងកូន និងសត្វស្លាបគ្រប់ប្រភេទ ។
លោក សេង ម៉េងស្រ៊ុន បានផ្តាំផ្ញើរ ដល់ប្រជានេសាទទាំងអស់ថា សូមបញ្ឈប់សកម្មភាពនេសាទខុសច្បាប់ជាបន្ទាន់ ដើម្បីជៀសវាងការបង្ក្រាប និងឈានដល់ការទទួលទោសទណ្ឌ ដែលបានប្រព្រឹត្តបទល្មើស និងច្បាប់ជលផល ។ ប្រសិនបើឃើញមានបទល្មើសនេសាទកើតឡើង សូមរាយការណ៍ដល់សមត្ថកិច្ចពាក់ព័ន្ធជាបន្ទាន់ ដើម្បីចាត់ការ និងទប់ស្កាត់បានទាន់ពេលវេលា ៕
