ខណ្ឌសែនសុខ៖ បុរសជាអ្នករត់ម៉ូតូឌុបម្នាក់ មានវ័យប្រមាណ៣០ឆ្នាំ ត្រូវរងរបួសធ្ងន់ធ្ងរ បន្ទាប់ពីរូបគេ ជិះម៉ូតូមួយគ្រឿង ម៉ាកសង់សេ១២៥ ហើយត្រូវរថយន្តហ្វតមួយគ្រឿងផ្សេងទៀត ដែលបើកបរដោយជនជាតិកូរ៉េម្នាក់ បើកក្នុងល្បឿនលឿន ជ្រុលបុកចំពីមុខពេញទំហឹង នៅចំណុចស្តុប
ត្រឡោកបែក ស្ថិតតាមបណ្តោយផ្លូវលេខ៥៩៨ ក្នុងសង្កាត់ភ្នំពេញថ្មី ខណ្ឌសែនសុខ ហើយរថយន្តព្យាយាមបើករត់ ទាំងមានម៉ូតូជាប់នៅក្រោមរថយន្ត តាំងពីចំណុចកើតហេតុ រហូតមកដល់ក្នុងបរិវេណកាំកូស៊ីធី ស្ថិតក្នុងសង្កាត់ទួលសង្កែ ខណ្ឌឬស្សីកែវ ( ចម្ងាយ៤គីឡូដី ) ម៉ូតូត្រូវកកិតគ្នា បណ្តាលអោយបែកផ្កាភ្លើង ហើយបង្កអោយមានអណ្តាតភ្លើងឆាបឆេះយ៉ាង សន្ធោសន្ធៅតែម្តងទៅ ។
យោងតាមប្រភពព័ត៌មាន ពីសាក្សីដែលបានឃើញហេតុការណ៍ បានរៀបរាប់អោយដឹងថា នៅមុនពេលកើតហេតុ គេសង្គេតឃើញបុរស ជាអ្នករត់ម៉ូតូឌុបម្នាក់ ជិះម៉ូតូមួយគ្រឿងម៉ាកសង់សេ១២៥ ពណ៌ខ្មៅ មិនចាំស្លាកលេខ បើកបរតាមបណ្តោយផ្លូវលេខ៥៩៨ ទិសដៅពីជើងទៅត្បូង ក្នុងល្បឿនល្មម លុះមកដល់ចំណុចកើតហេតុ ស្រាប់តែត្រូវរថយន្តមួយគ្រឿង ម៉ាកហ្វត ពណ៌ទឹកប្រាក់ មិនចាំស្លាកលេខ បើកបរធ្វើដំណើរដោយជនជាតិកូរ៉េម្នាក់ ក្នុងស្ថានភាពស្រវឹងជោគជាំ ក្នុងទិសដៅបញ្ច្រាស បុកចំពីមុខពេញទំហឹង ។
ប៉ុន្តែអ្វីដែលការកត់សម្គាល់នោះ គឺពេលដែលរថយន្តបើកដល់ចំណុច កាំកូស៊ីធីនោះ រថយន្តនិងម៉ូតូ ត្រូវអណ្តាតភ្លើងឆាបឆេះយ៉ាងសន្ធោសន្ធៅ ដោយសារតែមានការកកិតគ្នាយ៉ាងខ្លាំង រវាងរថយន្ត និងម៉ូតូធ្វើអោយមានផ្ការភ្លើងបែកឡើង ទើបបណ្តាលអោយមានការឆាបឆេះ បែបនេះតែម្តងទៅ ។ ម្យ៉ាងវិញទៀតអាចបណ្តាមកពី ម៉ូតូត្រូវគៀបក្រោមរថយន្តហើយអូសឆ្ងាយពេក ធ្វើម៉ាស៊ីនម៉ូតូក្តៅ ហើយឆេះតែម្តងទៅក៏ថាបាន នេះបើតាមការសន្និដ្ឋានរបស់សមត្ថកិច្ចជំនាញ។
ក្រោយកើតហេតុភ្លាមៗ សមត្ថកិច្ចមូលដ្ឋាន បានសហការជាមួយសមត្ថកិច្ចជំនាញ ចុះធ្វើការអន្តរាគមន៍វាស់វែង និងស្ទូចយករថយន្តបង្កខាងលើ ព្រមទាំងឃាត់ទាំងម្ចាស់រថយន្តយកទៅកាន់ ការិយាល័យចរាចរណ៍ជើងគោករាជធានីភ្នំពេញ រងចាំដោះស្រាយតាមផ្លូវច្បាប់ ៕
