ខណ្ឌសែនសុខ ៖ក្បាលនាគពុះចែកទ្រូងផ្លូវ១ផ្ទាំង ត្រូវរងការខូចខាតបន្ទាប់ពីបុរសម្នាក់ ស្រវឹងបើករថយន្តមួយគ្រឿង ម៉ាកកាមរីឆ្លាម ក្នុងល្បឿនលឿន ជ្រុលបុកចំពីមុខពេញទំហឹង នៅចំណុចទល់មុខនឹង កាកបាទក្រហមកម្ពុជា ស្ថិតតាមបណ្តោយផ្លូវលេខ២៧១ ក្នុងសង្កាត់ទឹកថ្លា ខណ្ឌសែន
សុខ កាលពីវេលាម៉ោង ២២ និង ២០នាទីយប់ថ្ងៃទី៥ ខែធ្នូ ឆ្នាំ២០១៤។
យោងតាមប្រភពព័ត៌មាន ពីសាក្សីនៅកន្លែងកើតហេតុ បានរៀបរាប់អោយដឹងថា នៅមុនពេលកើតហេតុ គេសង្គេតឃើញបុរសម្នាក់ បើករថយន្តមួយគ្រឿង ម៉ាកកាមរីឆ្លាម ពណ៌ស្ករ ពាក់ស្លាកលេខ ភ្នំពេញ 2O-3970 ធ្វើដំណើរតាមបណ្តោយផ្លូវលេខ២៧១ ទិសដៅពីជើងទៅត្បូង ក្នុងល្បឿនយ៉ាងលឿន លុះមកដល់ចំណុចកើតហេតុ ស្រាប់តែជ្រុលល្បឿន រេចង្កូតទៅបុកផ្ទប់នឹងក្បាលឃ្លូ ពុះចែកទ្រូងផ្លូវពេញទំហឹង បណ្តាលអោយរថយន្តត្រូវក្រឡាប់ផ្ញារជើង ច្រងាង រងការខូចខាតយ៉ាងដំណំ ប៉ុន្តែសំណាងល្អ មិនមានអ្នករងរបួស ។
ក្រោយកើតហេតុ សមត្ថកិច្ចមូលដ្ឋាន បានសហការជាមួយជំនាញ ចុះធ្វើការអន្តរាគន៍វាស់វែង ស្ទូចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ រងចាំដោះស្រាយតាមផ្លូវច្បាប់ ។សូមបញ្ជាក់ផងដែរថា គ្រោះថ្នាក់ចរាចរណ៍ខាងលើនេះ គឺបង្កឡើងដោយសារម្ចាស់ រថយន្តខាងលើ បើកបរក្នុងស្ថានភាពស្រវឹងជោគជាំ និងក្នុងល្បឿនលឿន ទើបបណ្តាលអោយមានរឿងហេតុដូចនេះ កើតឡើងតែម្តងទៅ ៕
