ព្រះវិហារ៖លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានឲ្យដឹងនៅថ្ងៃអាទិត្យនេះថា នៅម៉ោង ១០ និង ៤០ នាទី ព្រឹកថ្ងៃអាទិត្យ ទី៧ធ្នូនេះ មានស្នូរផ្ទុះជាច្រើនផ្ទួនៗគ្នា នៅក្នុងលំហរអាកាស ខាងលើប្រាសាទព្រះវិហារ រួមមានផ្សែងអង្កាញ់ៗ មកពីទិសខាងត្បូង ទៅទិសខាងជើង
ធ្វើឲ្យមានការភ្ញាក់ផ្អើលដល់កងកម្លាំងទាំងពីរ ដែលកំពុងឈរជើងនៅទល់មុខគ្នា និងប្រជាពលរដ្ឋ នៅព្រំដែនប្រាសាទព្រះវិហារ។ បន្ទាប់ពីស្នូរផ្ទុះនោះ គេបានឃើញបំបែកដែក ធ្លាក់នៅជិតប្រាសាទព្រះវិហារ តែមិនបង្កឲ្យមានមនុស្សស្លាប់ ឬក៏របួសនោះទេ។
លោក ផៃ ស៊ីផាន បន្តថា សំឡេងផ្ទុះលើលំហរអាកាសលើប្រាសាទព្រះវិហារនោះ បានកើតឡើង ខណៈដែលនៅព្រឹកថ្ងៃអាទិត្យនេះ នៅខាងភាគីថៃ មានប្រារព្ធពិធីរត់កីឡាម៉ារ៉ាតុង នៅផ្ទះក្រហមថៃ ខាងជើងជាប់ភូមិសាស្ត្រប្រាសាទព្រះវិហារ។ ១០ នាទីក្រោយពីការផ្ទុះនោះ ក៏មានបំណែកធ្លាក់មកលើដីលើផ្លូវឡើងភ្នំប្រាសាទព្រះវិហារ ត្រង់ចំណុចក្រោម ៥ មករា មួយបំណែក ក្នុងភូមិសាស្ត្រស្វាយជ្រុំបួនបំណែក ក្នុងភូមិសាស្ត្រភូមិអង្គការអេសដ៍ពីរបំណែក ស្ថិតក្នុងភូមិធម្មជាតិសម្តេចតេជោ ឃុំស្រអែម ស្រុកជាំក្សាន្ត ខេត្តព្រះវិហារ។
លោក ផៃស៊ីផាន លើកឡើងថា ការផ្ទុះលើលំហរអាកាស និងបំណែកដែកធ្លាក់នោះ មិនប៉ះពាល់ដល់ជីវិតមនុស្ស ឬសត្វឡើយ។ ចំណែកកងកម្លាំងកម្ពុជា ដែលឈរជើងនៅតំបន់ព្រំដែននោះ ក៏បានចុះពិនិត្យបំណែកធ្លាក់មកលើដីនោះភ្លាមៗ។
សូមបញ្ជាក់ថា កាលពីថ្ងៃទី៩ ខែធ្នូ ឆ្នាំ២០១៣ ក៏មានស្នូរផ្ទុះ និងធ្លាក់បំណែកមកលើដីនៅលើភ្នំ និងលើស្ពានហាលនៃប្រាសាទព្រះវិហារ តំបន់ជុំវិញប្រាសាទរួចម្តងមកហើយដែរ។ គិតទាំងការផ្ទុះលើកនេះ គឺការផ្ទុះរបៀបនេះ បានកើតឡើងលើកទី៥ហើយ នៅតំបន់ភូមិសាស្ត្រខេត្តព្រះវិហារ។ តែអាជ្ញាធរសមត្ថកិច្ច ពុំទាន់ដឹងថា វាជាមូលហេតុអ្វីទេ ដោយទុកឲ្យជំនាញ ជាអ្នកពិនិត្យ៕
