ខេត្តកំពង់ឆ្នាំងបង្កាន់ដៃស្ពានថ្មប្រវែងប្រមាណ៦ម៉ែត្រ បានរងការខូចខាតបាក់បែកខ្ទេចខ្ទី ដោយសាររថយន្តកុងតឺន័រមួយគ្រឿង គេចពីរថយន្តយីឌុប បុកពេញទំហឹង ។ហេតុការណ៍នេះបានកើតឡើង តាមបណ្តោយផ្លូវជាតិលេខ៥ ចំណុចស្ពានថ្មទី២ ស្ថិតក្នុងភូមិពោធិឬទ្ធីក្រៃ ឃុំស្វាយ ស្រុកសាមគ្គី
មានជ័យ ខេត្តកំពង់ឆ្នាំង ។
សមត្ថកិច្ចនគរបាលចរាចរណ៍ ស្រុកសាមគ្គីមានជ័យ បានអោយដឹងថា រថយន្តកុងតឺន័រ បង្កហេតុម៉ាកហ្វុយហ្សូ ពណ៌បៃតង ពាក់ស្លាកលេខ ក្រុងព្រះស៊ីហនុ 3A-1550 បើកបរពីត្បូងមកជើង លុះដល់ចំណុចកើតហេតុ ក៍បានវាក់នឹងរថយន្តយីឌុប ដែលកំពុងបើកបរពីមុខ ក៍ស្រាប់តែជាន់ហ្វ្រាំងទាំងបង្ខំ ព្រោះតែឃើញមនុស្សអង្គុយកណ្តាលស្ពាន ខណៈនោះរថយន្តបង្ក ដែលបើកពីក្រោយ ក៍បានគេចទាំងបង្ខំរេទៅបុកបង្កាន់ដៃស្ពានបាក់បែក និងធ្លាក់ក្បាលរថយន្តចូលក្នុងប្រឡាយ ។
នៅក្នុងហេតុការណ៍នេះ មិនមានអ្នករងរបួសឡើយ។
ក្រោយពេលកើតហេតុ រថយន្តយីឌុប បានបើកបន្តទៅមុខបាត់ ដោយឡែករថយន្តបង្ក ត្រូវបានសមត្ថកិច្ចឃាត់ទុក កសាងសំណុំរឿង ដើម្បីដោះស្រាយជាមួយមន្ទីរសាធារណៈការ និងដឹកជញ្ជូនខេត្ត ៕
