ខេត្តក្រចេះ៖កម្លាំងសមត្ថកិច្ចចម្រុះស្រុកស្នួលចាប់ឃាត់រថយន្តយីឌុបប្រាំភ្លៅមួយគ្រឿងដែលមានផ្ទុកឈើអារ លេខមួយ បង្កប់ឈើប្រណិតធ្នង់ រាប់សិបម៉ែត្រគូប កាលពីវេលាម៉ោង១១ព្រឹក ថ្ងៃទី៦ ខែធ្នូ នៅលើកំណាត់ផ្លូវ ជាតិលេខ៧ ស្ថិតក្នុងភូមិសំបួរ ឃុំស្វាយជ្រះ ស្រុកស្នួល ខេត្តក្រចេះ ។
ការចាប់ឃាត់រថយន្តដឹកឈើ ខាងលើនេះ លោក ហាក់ ហ៊ាន់ ព្រះរាជអាជ្ញារងអមសាលាដំបូងខេត្តក្រចេះ ដឹកនាំកម្លាំងសមត្ថកិច្ចចម្រុះចុះចាប់ឃាត់ បាន ខណះ ដែលរថយន្តនេះខូចនៅតាមផ្លូវទៅមុខលេងរួច ក្នុងនោះសមត្ថកិច្ចក៍ឃាត់ខ្លួនអ្នក បើកបរ និងព្រូរ ពីរនាក់ ឈ្មោះហេង រស្មី អាយុ២៩ឆ្នាំ រស់នៅភូមិសង្គ្រោះ ឃុំស្វាយភ្លោះ ស្រុកពាមជរ ខេត្តព្រៃវែង ជាអ្នកបើកបររថយន្ត និងម្នាក់ទៀតឈ្មោះ នឿន វ៉ុក អាយុ២២ រស់នៅក្រុងកំពង់ចាម ខេត្តកំពង់ចាម ជាព្រូរថយន្ត ។ក្រោយពីចាប់ឃាត់ រថយន្តនេះត្រូវបានសមត្ថកិច្ចនាំមករក្សារទុកបណ្តោះអាសន្ននៅសង្កាត់រដ្ឋបាលព្រៃឈើស្វាយជ្រះ ដើម្បីធ្វើការវាស់វែងបន្តរ។
តាមការបង្ហើបអោយដឹងពី អ្នកបើកបរ ឈ្មោះ ហេង រស្មី បាននិយាយប្រាប់សមត្ថកិច្ចថា រថយន្តដឹកឈើមួយគ្រឿងនេះជារបស់មេឈ្មួញម្នាក់ឈ្មោះ សាន ចយ ហើយអ្នកបើកបររូបនោះបានបន្តថា ឈើទាំងនេះគឺគេបានដឹកចេញពីតំបន់ស្រែពកចាស់ ក្នុងស្រុកសេសាន្ត ខេត្តស្ទឹងត្រែង នាំឆ្ពោះទៅលក់ នៅប្រទេសវៀតណាម ចូលតាមច្រកទ្វេរភាគគីទន្លេចាម ក្នុងឃុំក្រវៀន ស្រុកមេម៉ត់ ខេត្តត្បូងឃ្មុំ ។
ប្រភពពីក្រុមអ្នកស៊ីឈ្នួលអារឈើម្នាក់ដែលធ្លាប់បានទៅធ្វើការនៅតំបន់នោះបានអោយដឹងថា ឈ្មួញម្នាក់ឈ្មោះ សាន ចយ បានឈរជើងចាំប្រមូលទីញឈើពីតំបន់ជុំវីញខេត្ត ស្ទឹងត្រែង និងខេត្តរតនះគីរី ប្រមូលចូលបាតអាង ដោយជ្រកក្រោមលេសមានអាជ្ញាប័ណ្ណ ស្ដារបាតអាង វារីអគ្គិសនីទន្លេសេសាន និងដោយមានការឃុបឃិតបើកដៃពីសំណាក់ មន្ត្រីជំនាញពាក់ពន្ឋ័ផងដែរ ។
ហើយក្បួនរថយន្តដឹកឈើខាងលើតែងតែរដឹកបន្តរកន្ទុយគ្នា ស្ទើតែរាល់ថ្ងៃ ជាក់ស្តែងនៅថ្ងៃទី៦ធ្នូនេះ លោក សាន ចយ បាននាំក្បួនរថយន្តដឹកឈើចំនួន៦គ្រឿង ជាប្រភេទរថយន្តយីឌុបខ្នាតធំ ចេញពីខេត្តស្ទឹងត្រែ នាំឆ្ពោះចូលទៅលក់នៅប្រទេសវៀត ណាម ហើយត្រូវសមត្ថកិច្ចឃាត់ចាប់បានមួយគ្រឿងដោយសារ រថយន្តនេះខូចនៅកណ្តាលផ្លូវទៅមុខលេងរួច ។
មន្ត្រីជំនាញរដ្ឋបាលព្រៃឈើបានបង្ហើបឱ្យដឹង ថាតាមច្បាប់អនុញ្ញាត្តិស្តីពីការដឹកជញ្ជូនផលអនុផលព្រៃឈើ ចេញដោយរដ្ឋបាលព្រៃឈើ គឺអនុញ្ញាត្តិឱ្យដឹកត្រឹមតែ ១៨ ទៅ ២០ ម៉ែត្រគូបតែប៉ុណ្ណោះក្នុងមួយរថយន្ត ប៉ុន្តែដោយសារមានការឃុបឃិតគ្នា រវាងឈ្មួញ និងជំនាញពាក់ពន្ធ័ ទើបការចេញឈើម្តងៗ ឈ្មួញម្នាក់នេះ ដឹករហូតទៅដល់៣០ ទៅ ៤០ ម៉ែត្រគូប។
មិនតែប៉ុណ្ណោះ ការដឹកជញ្ជូនឈើលើសច្បាប់អនុញ្ញត្តិ ក៏បានបង្កឱ្យផ្លូវជាតិលេខ៧ ចាប់ពីខេត្តស្ទឹងត្រែងមកទល់និងខេត្តក្រចេះទទួលរងការ បាក់ស្រុតខួចខាតយ៉ាងដំណំ ដែលមិនអាចនិងទ្រ ទំងន់រថយន្តដឹកឈើទាំងនេះបាន ។
រហូតមកទល់ល្ងាចថ្ងៃទី៧ ខែធ្នូរនេះមន្ត្រីជំនាញរដ្ឋបាលព្រៃឈើនៅមិនទាន់ដឹងចំនួនឈើទាំងនេះ នៅឡើយទេ ដោយគេគ្រាន់ដឹងថា ឈើទាំងនោះគឺសុទ្ធសឹងជាប្រភេទឈើអារលេខ១ មានមុខកាត់ធំៗ ប្រវែងចាប់ពី២ម៉ែត្រ ទៅ៤ ម៉ែត្រ ហើយតាមការប៉ាន់ស្មាន គឺមិនក្រោម៣៥ម៉ែត្រគូបនោះទេ ហើយឥឡូវកំពង់រើចុះពីរថយន្តដើម្បីធ្វើការវាស់វែង ៕
