ខេត្តបន្ទាយមានជ័យនៅព្រឹកថ្ងៃទី៨ខែធ្នូឆ្នាំ២០១៤នៅវិទ្យាល័យភ្នំធំស្ថិតនៅភូមិភ្នំធំត្បូង ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ បានធ្វើពិធីសម្ពោធសមិទ្ធិផលនានាដើម្បីដាក់ឲ្យប្រើប្រាស់ជាផ្លូវការនូវសមិទ្ធិផលទាំងអស់នេះដែលជាអំណោយដ៏ថ្លៃថ្លារបស់ស្ថានទូតជប៉ុន។ពិធីសម្ពោធ
សមិទ្ធិផលនានាក្នុងវិទ្យាល័យភ្នំធំនោះមានការចូលរួម លោកគោស៊ុំសារឿត អភិបាលខេត្តបន្ទាយមានជ័យ លោកតាកាយូគិវ៉ាដា លេខាធិការផ្នែកនៃសេដ្ឋកិច្ចជំនួយការរបស់ស្ថានទូតជប៉ុនជាម្ចាស់អំណោយ លោកឈើយចាន់ណា ប្រធានមន្ទីរអប់រំខេត្តបន្ទាយមានជ័យ លោកឡុងពុន អភិបាកស្រុកមង្គលបូរីស្តីទី សិស្ស ប្រជាពលរដ្ឋនិងមន្ត្រីអ្នកមុខអ្នកការជាច្រើននាក់ទៀតបានចូលរួមផងដែរ។
លោកឡុងពុនបានឡើងរាយការណ៍អំពីសមិទ្ធិផលដែលកើតមានឡើងក្នុងវិទ្យាល័យនេះថាថ្ងៃនេះបានសម្ពោធដាក់ឲ្យប្រើប្រាស់ជាផ្លូវការនូវសមិទ្ធិផលទាំងអស់នេះរួមមាន អាគារសិក្សាថ្មី២ខ្នង ស្មើនិង១០បន្ទប់និងមានបំពាក់គ្រឿងសង្ហារឹមគ្រប់ដែលជាអំណោយដ៏ថ្លៃថ្លារបស់ប្រជាជនជប៉ុនតាមរយះស្ថានទូតជប៉ុនប្រចាំនៅប្រទេសកម្ពុជា ទីចាត់ការមួយខ្នងមានទំហំ ២០គុណ២៣និងសមិទ្ធិផលផ្សេងៗជាច្រើនទៀត សរុបជាទឹកប្រាក់អស់១៩៩.៥៧៨ដុល្លា។អាគារសិក្សាថ្មីនេះចាប់កសាងនៅថ្ងៃទី១៩ខែវិច្ឆិកាឆ្នាំ២០១៣សាងសង់រួចជាស្ថាពរនៅថ្ងៃទី២០ខែកញ្ញាឆ្នាំ៧០១៤និងអាគារទីចាត់ការថ្មីធ្វើរួចនៅឆ្នាំ២០១៤និងដាក់សម្ពោធឲ្យប្រើប្រាស់ជាផ្លូវការនូវថ្ងៃនេះ។
លោកគោស៊ុំសារឿតបានមានប្រសាសន៍ក្នុងកម្មពិធីនោះដែរថាសិស្សសាលាគឺជាថ្នាលបណ្តុះបណ្តាលធនធានមនុស្សពិសេសក្នុងការក្រេបយកចំណេះដឹងនិងចំណេះវិជ្ជាដើម្បីឲ្យកុលបុត្រកុលធីតាខ្មែរមានសមត្តភាពក្នុងការបំរើប្រទេសជាតិមាតុភូមិនិងជាទំពាំងស្នងឬស្សីនាពេលអនាគត។សិស្សទាំងអស់ត្រូវរៀនដើម្បីចំណេះដឹង រៀនដើម្បីចំណេះធ្វើ រៀនដើម្បីសីលធ៌មល្អ រៀនដើម្បីរួមរស់ជាមួយគ្នាប្រកបដោយសេចក្តីថ្លៃថ្នូរ។
លោកបានផ្តាំផ្ញើលោកគ្រូនិងអ្នកគ្រូពិសេសលោកនាយកសាលាត្រូវចូលរួមថែរក្សានូវអាគារថ្មីនេះឲ្យបានស្ថិតស្ថេរឲ្យបានគង់វង្សបានយូអង្វែងនិងអំពាវនាវដល់មាតាបិតានិងអាណាព្យាបាលសិស្សទាំងអស់សួមជួយជម្រុញកូនចៅឲ្យទៅរៀនសូត្រឲ្យបានគ្រប់គ្នា៕
