បន្ទាយមានជ័យៈ លើកឡើងក្នុងពិធីគោរពទង់ជាតិនាព្រឹកថ្ងៃច័ន្ទទី០៨ ធ្នូ ២០១៤ ពីសំណាក់លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ មន្ត្រីនគរបាលចំនួន១៣រូប នឹងធ្វើសំណើរទៅ អគ្គស្នងការនគរបាលជាតិពិនិត្យលុបឈ្មោះចេញពីក្របខ័ណ្ឌ ។
លោក អាត់ ខែម បានអោយដឹងទៀតថា ចាប់តាំងពីលោកចូលកាន់តំណែងជាស្នងការនគរបាលខេត្តបន្ទាយមានជ័យ ការគ្រប់គ្រងកំលាំង និងការទប់ស្កាត់បង្ក្រាបរាល់បទល្មើស ទាំងក្នុងកិច្ចការសង្គម និងនយោបាយ ត្រូវបានធ្វើឡើងជាបន្តបន្ទាប់ ក្នុងនោះឃើញថា អំពើរដែលនគរបាលបានធ្វើកន្លងមកដូចជាការបង្ក្រាបបទល្មើសគ្រឿងញៀន បំបែកសំបុកចោរលួចម៉ូតូ និងការងារសណ្តាប់ធ្នាប់ ត្រូវបានប្រជាពលរដ្ឋទទួលស្គាល់ និងអោយតំលៃលើប៉ូលីស ខុសពីមុនដែលពួកគាត់មិនទុកចិត្ត និងតែងវាយតំលៃផ្លូវមិនល្អមកលើសមត្ថកិច្ច ។
ចំពោះការដែល ស្នើរសុំលុបមន្ត្រីនគរបាលចំនួន១៣រូបចេញពីក្របខ័ណ្ឌនគរបាលខេត្តបន្ទាយមានជ័យ ព្រោះតែគណៈស្នងការបានរងឃើញនូវមន្ត្រី១៣រូប ដែលពុំដែលមកធ្វើការហើយការលុបនេះផងដែរធ្វើយ៉ាងណាអោយបានមុនពេលដែលខាងធានាគាបញ្ជូនឈ្មោះសម្រាប់ធ្វើកាត ATM ទៅអគ្គស្នងការ ។
ជាមួយគ្នានេះផងដែរ លោកបានស្នើរសុំអោយនគរបាលម្នាក់ត្រូវធ្វើជាសន្តិសុខម្នាក់ រាយការណ៍នៅសភាពការទាំងឡាយដែលកើតឡើង ហើយរួមគ្នាលុបបំបាត់ភាពអយុត្តិធម៌ ដោយងាកមកគិតពីរឿងផលប្រយោជន៍ សង្គម និងពលរដ្ឋ ដើម្បីអោយពលរដ្ឋកាន់តែមានទំនុបទុកចិត្តលើប៉ូលីស ៕
