ខេត្តព្រះសីហនុ ពិរុទ្ធជនជនជាតិរុស្ស៊ីម្នាក់ ដែលជាប់ចោទពីបទប្រើហឹង្សាដោយចេតនា បានប៉ុនប៉ងធ្វើអត្តឃាតដោយអាករទាំងសងខាងសម្លាប់ខ្លួន បន្ទាប់ពីជនរូបនេះប៉ុនប៉ងហែកដំបូលប៉ុស្តិសុខភាពក្នុងពន្ធនាគារ មិនបានសម្រេចកាលពីយប់ឈានចូលថ្ងៃទី០៧ ខែធ្នូឆ្នាំ២០១៤ ប៉ុន្តែ
ការប៉ុនប៉ងគាស់ដំបូល និងការធ្វើអត្តឃាតនេះ ត្រូវបានឆ្នាំពន្ធនាគារធ្វើការទប់ស្កាត់ប និងជួយសង្គ្រោះបានទាន់ពេលវេលា ។
លោក សំ សុផល ប្រធានពន្ធនាគារខេត្តព្រះសីហនុ បានឪ្យដឹងថា ជនជាប់ឃុំដែលប៉ុនប៉ងហែកដំបូលលួចរត់ និងធ្វើអត្តឃាតខ្លួនឯង ជាជនជាតិរុស្ស៊ី មានឈ្មោះ KAVANDIKOV ROSHAN ភេទប្រុស បានធ្វើសកម្មភាពគាស់ដំបូលប៉ុស្តិសុខភាព ប៉ុនប៉ងរត់គេចខ្លួនតែមិនបានសម្រេចក៌ធ្លាក់មកក្រោមវិញ ផ្អើលដល់មន្ត្រីពន្ធនាគារ កាលពីវេលាម៉ោង៣ និង៥០នាទីឈានចូលថ្ងៃទី០៧ ខែធ្នូ ឆ្នាំ២០១៤ និងមានរបួសដៃដោយសារមុតនឹងបន្លាលួស មន្ត្រីយើងក៌បានយកមកព្យាបាល និងរំរបួសរួចដាក់នៅប៉ុស្តិសុខភាពវិញ ។
រហូតដល់វេលាម៉ោង ៧ព្រឹកថ្ងៃដដែល ជនល្មើសបានប៉ុនប៉ងធ្វើអត្តឃាតខ្លួនឯងដោយយកអំបែងកញ្ចក់មកអាករខ្លួនឯងទាំងសងខាង បណ្តាលឪ្យមានរបួសហូរឈាម ភ្លាមៗនោះមន្ត្រីរយាមប្រចាំការនៅក្បែកន្លែងកើតហេតុ ក៌បានបញ្ជូនជនល្មើសខាងលើទៅព្យាបាលនៅមន្ទីរពេទ្យបង្អែកចំការចេក ខេត្តព្រះសីហនុ ។
លោក សុខ ផន អភិបាលរងខេត្ត បានដឹកនាំក្រុមការងារចុះទៅពិនិត្យទីតាំងកន្លែងកើតព្រមទាំងបានធ្វើការអប់រំណែនាំដល់ជន ជាប់ឃុំក្នុងពន្ធនាគារទាំងអស់ ឪ្យគោរពអនុវត្តតាមវិន័យពន្ធនាគារ ចៀសវាងលួចគាស់ ឬរត់គេចខ្លួនជាហេតុនាំឪ្យមានស្ថានទម្ងន់ទោសមួយកម្រិតបន្ថែមទៀត ប្រសិនបើយើងបានប្រព្រឹត្ត និងអនុវត្តអំពើល្អក្នុងពន្ធនាគារ យើងធ្វើការសុំសម្រាលទោស ព្រោះនៅកម្ពុជាក្នុងមួយឆ្នាំមានពិធីបុណ្យធំៗចំនួន៣ដង ក្នុងការជួយសម្រាលទោស ដូចជាបុណ្យចូលឆ្នាំ បុណ្យចំរើនព្រះជន្ម និងបុណ្យអុំទូក បណ្តែតប្រទីព សំពះព្រះខែ និងអកអំបុក។
លោក រៀម ចន្ទ័មុន្នី ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ បានផ្តល់យោបល់ដល់ប្រធានមន្ទីរពន្ធនាគារ ឪ្យពង្រឹងការយាមកាមកាន់តែប្រសើរបន្ថែមទៀត និងបំផុសធ្វើយ៉ាងណាកុំឪ្យជនល្មើសមានឪកាសលួចគាស់ ឬលួចរត់គេចខ្លួនចេញពីពន្ធនាគារបាន ជាពិសេសត្រូវសហការជាមួយមន្ត្រីនគរបាលការិយាល័យព្រហ្មទណ្ឌកម្រិតធ្ងន់ខេត្តព្រះសីហនុ ដើម្បីចាត់វិធានការបានទាន់ពេលវេលា ។
លោកក៌បានធ្វើការអប់រំដល់ទណ្ឌិត សូមកំប៉ុនប៉ងលួចរត់គេចខ្លួន ចេញពីពន្ធនាគារព្រោះការគាស់ ឬលួចរត់ចេញពីពន្ធនាគារនាំតែជាប់ទោសទណ្ឌថែមមួយកម្រិតទៀត ក្នុងខណះពេលដែលបងប្អូនទាំងអស់កំពុងហាត់ពត់ លត់ដំកែខ្លួន ឪ្យក្លាយជាមនុស្សល្អ មនុស្សថ្មីរស់នៅក្នុងគ្រួសារ និងសង្គមជាតិវិញ ៕
