សៀមរាប នៅមុខប្រាង្គប្រាសាទអង្គរវត្ត នាព្រឹកថ្ងៃទី ០៧ ខែ ធ្នូ ឆ្នាំ២០១៤ មានរៀបចំព្រឹត្តិការណ៍រត់ប្រណាំងពាក់ កណ្តាលម៉ារ៉ាតុងអង្គរលើកទី១៩ ឆ្នាំ២០១៤ ក្រោមអធិបតីភាពរបស់ លោកប ថោងខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា
ដោយមានការអញ្ជើញចូលរួមពីតំណាងអគ្គរាជទូតជប៉ុនប្រចាំនៅកម្ពុជាលោកអភិបាលខេត្ត រដ្ឋលេខាធិការក្រសួងអប់រំយុវជននិងកីឡាព្រមទាំងភ្ញៀវជាតិអន្តរជាតិនិងកីឡាករ កីឡាការីមកពី៧៩ប្រទេសចូលរួមផងដែរ ។
មានប្រសាសន៍ក្នុងការបើកប្រកួតរត់ប្រណាំងពាក់កណ្តាលម៉ារ៉ាតុងអង្គរលើកទី១៩ ឆ្នាំ២០១៤ លោកបណ្ឌិត ថោង ខុន ក៏បានគូសបញ្ជាក់ថា ទិវារត់ប្រណាំងអន្តរជាតិពាក់កណ្តាលម៉ារ៉ាតុងអង្គរលើកទី១៩ ឆ្នាំ២០១៤ នៅ លើទឹកដីប្រវត្តិសាស្ត្រសៀមរាប ដែលបានប្រព្រឹត្តឡើងនៅមុខប្រាសាទអង្គរវត្តនេះ ក៏ជាយន្តការមួយក្នុងការទាក់ ទាញដល់ភ្ញៀវទេសចរណ៍ឲ្យមកពគ្រប់តំបន់លើពិភពលោក ចូលមកទស្សនាកម្សាន្ត នូវសម្បត្តិវប្បធម៌ជាតិ និង សម្បត្តិធម្មជាតិកម្ពុជាផងដែរ ។
ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអង្គរ គឺជារៀងរាល់ឆ្នាំត្រូវបានប្រារព្ធ ធ្វើនៅមុខអង្គរវត្ត ដោយមានកីឡាករ កីឡាការីជាតិ អន្តរជាតិបានចូលរួមគាំទ្រ ។ ម្យ៉ាងទៀតក្នុងឆ្នាំ២០១៤នេះ ដោយមានកីឡាករ កីឡាការីដែលបានចូលរួមជាង ៨ពាន់នាក់ ហើយកីឡាករ កីឡាការីបរទេសជាង ៥ពាន់នាក់ ដែលមកពី៧៨ប្រទេស ហើយកម្ពុជាក៏មានកីឡាករ កីឡាការី ចូលរួមជាង៣ពាន់នាក់ បើប្រៀបធៀបទៅឆ្នាំ២០១៣ មានការកើនឡើង ។
លោកបណ្ឌិត ថោង ខុន បានគូសបញ្ជាក់ថា តាមរយៈកីឡាទេសចរណ៍នេះ បានបង្កើនស្មារតី សាមគ្គីភាព មិត្តភាព ក្នុងការចូលរួមរត់ប្រណាំងអន្តរជាតិពាក់កណ្តាលម៉ារ៉ាតុងអង្គរលើកទី១៩ ដែលប្រកបទៅ ដោយសេចក្តីសុខ សុវត្ថិភាព និង ផ្តល់ទស្សនទានកីឡាស្អាតស្អំ កីឡាបៃតង ដើម្បីកសាងពិភពលោកមួយដ៏ល្អ ។ ឯកឧត្តមបណ្ឌិតក៏បានបញ្ជាក់ផងដែរថា តាមរយៈកីឡាទេសចរណនេះ ក្នុងកាលពេលថ្មីៗនេះ នៅខេត្តសៀមរាប ក៏មានធ្វើការរៀបចំកីឡាអាម៉ាហ្សូន ដែលមានតែកីឡាការី មកពីតំបន់អឺរ៉ុបចូលរួម ក្នុងការបញ្ជាក់ពីភាពរីកចម្រើនលើ វិស័យទេសចរណ៍តាមរយៈកីឡានេះ។ម្យ៉ាងទៀតនៅឆ្នាំ២០១៥យើងនឹងរៀបចំខួប២០ឆ្នាំ នៃការរត់ប្រណាំងអន្តរជាតិពាក់កណ្តាលម៉ារ៉ាតុងអង្គរដោយមានកីឡាករកីឡាការីជាតិ អន្តរជាតិចូលរួមប្រកួតទ្វេរដងផងដែរ ។
ក្នុងនោះ លោកបណ្ឌិត ថោង ខុន ក៏បានផ្តាំផ្ញើដល់កីឡាករទាំងពីរភេទ ត្រូវរក្សាវិន័យសេចក្តីថ្លៃថ្នូនិងសុជីវធម៌ក្នុងពេលរត់ប្រណាំងដោយមិនប្រជែងគ្នា ដែលនឹងបង្កឲ្យមានឧបស័គ្គដល់អ្នកដទៃព្រមទាំងត្រូវមានការប្រុងប្រយ័ត្ន ក្នុងការជៀសវាងកុំឲ្យមានគ្រោះថ្នាក់កើតឡើង ។ ម្យ៉ាងទៀតត្រូវចូលរួមថែរក្សាបរិស្ថាន ភាពបៃតង រួមគ្នាការពារ សម្បត្តិបេតិកភណ្ឌនៃចក្រភពអង្គរនៃយើងផងដែរ ។
ក្នុងព្រឹត្តិការណ៍ទិវារត់ប្រណាំងអន្តរជាតិពាក់កណ្តាលម៉ារ៉ាតុងអង្គរលើកទី១៩ ឆ្នាំ២០១៤នេះ ក៏មានវត្តមាន លោកកែវ ជុតិម៉ា សមាជិករដ្ឋសភា លោកទេរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងពាណិជ្ជកម្ម អញ្ជើញចូលរួមរត់ប្រណាំងម៉ារ៉ាតុងនេះដែរ ។
ក្នុងការរត់ប្រណាំងអន្តរជាតិពាក់កណ្តាលម៉ារ៉ាតុងអង្គរលើកទី១៩នេះ មានវិញ្ញាសាររត់ចម្ងាយ ២១គីឡូ ម៉ែត្រ បុរស និង ស្ត្រី , វិញ្ញាសាររត់ចម្ងាយ ១០គីឡូម៉ែត្រ បុរស និង ស្ត្រី ជនពិការ និង រទេះជនពិការ និង វិញ្ញាសារ រត់ចម្ងាយ ៣គីឡូម៉ែត្រ ជាលក្ខណៈគ្រួសារ និង មិត្តភាព ។
លទ្ធផលរត់ចម្ងាយ២១ គីឡូម៉ែត្រផ្នែកបុរស ចំណាត់ថ្នាក់លេខ១ បានទៅលើកីឡាករកម្ពុជា ពាក់ផ្លាកលេខ២៨៤៣ ឈ្មោះ ម៉ា វីរ៉ូ ប្រើថេរៈវេលា ១ម៉ោង១៦នាទី ចំណាត់ថ្នាក់លេខ២បានទៅលើកីឡាករកម្ពុជា ពាក់ផ្លាកលេខ១២០២ ឈ្មោះ ផាន សុភ័ក្ត ប្រើថេរៈវេលា ១ម៉ោង២១នាទី ៤១វិនាទី ចំណាត់ថ្នាក់លេខ៣ បានទៅលើកីឡាករជនជាតិអង់គ្លេស ពាក់ផ្លាក លេខ ២៦៧៥ ឈ្មោះ ថូ ម៉ាស់ប្រើថេរៈវេលា ១ម៉ោង២២នាទី១៥វិនាទី ។
ផ្នែកនារី ចំណាត់ថ្នាក់លេខ១ បានទៅលើកីឡាការីជនជាតិសាំងហ្គាពួរ ពាក់ផ្លាកលេខ៤៤៣៧ ឈ្មោះ វីវី អានតាំង ប្រើថេរៈវេលាអស់ ១ម៉ោង២៨នាទី ចំណាត់ថ្នាក់លេខ២ បានទៅលើកីឡាការីជនជាតិកាណាដា និង ចំណាត់ថ្នាក់ លេខ៣ បានទៅលើកីឡាការីជនជាតិអាមេរិកកាំង ៕
