កុមារាម្នាក់បានធ្លាក់ពីលើទូក ចូលក្នុងទឹកលង់ស្លាប់ នៅព្រែកត្រពាំង ក្នុងភូមិសំរោង សង្កាត់ផ្សារឆ្នាំង ក្រុង-ខេត្តកំពង់ឆ្នាំង ខណៈស្ត្រីម្នាក់ជាម្តាយ បានដើររាវខ្យងលក់ ហើយទុកកូនប្រុសតូច អោយដេកនៅលើទូកម្នាក់ឯង កាលពីវេលាម៉ោង៦ព្រឹក ថ្ងៃទី៨ ខែធ្នូ ឆ្នាំ២០១៤ ។
ស្ត្រីឈ្មោះ សៀង លី អាយុ៤០ឆ្នាំ មានទីលំនៅក្នុងភូមិឃុំខាងលើ បានអោយដឹងថា នៅក្នុងថ្ងៃកើតហេតុ នោះគាត់បានចេញទៅរាវខ្យង តាំងពីព្រឹកដោយទុកកូនប្រុសឈ្មោះ សាំង សំណាង ដែលមានអាយុទើបតែ២ឆ្នាំប៉ុណ្ណោះ អោយដេកនៅលើទូកម្នាក់ឯង ហើយគាត់ចុះទឹករាវខ្យង យកទៅលក់ដើម្បីបានកម្រៃ ដោះស្រាយក្នុងជីវភាពគ្រួសារ ។
ស្ត្រីម្តាយក្មេងប្រុសរងគ្រោះ បានអោយដឹងទៀតថា ក្នុងខណពេលដែលគាត់ជាប់រវល់រាវខ្យងភ្លេចខ្លួនមួយភ្លែត ហើយដើរត្រឡប់មកមើលកូនវិញ ស្រាប់តែបាត់កូនមិនឃើញ ក៏ផ្អើលឆោឡោស្រែកអោយអ្នកដែលនៅក្បែរនោះ ជួយរាវរកកូន ប៉ុន្តែនៅពេលដែលរាវរកឃើញ កូនប្រុសរបស់គាត់ បានលង់ទឹកស្លាប់បាត់ទៅហើយ ។
ដោយសារតែជីវភាពទីទាល់ក្រ គ្មានមុខរបរអ្វី សម្រាប់ចិញ្ចឹមជីវិត គ្មានផ្លូវជ្រើសរើស បណ្តាលអោយស្ត្រីឈ្មោះ សៀង លី បាត់បង់កូនជាទីស្រឡាញ់ ក្នុងេពេលតែមួយពព្រិចភ្នែក គួរអោយសង្វេគ ៕
