កំពង់ឆ្នាំង៖ លោក ឯក ស៊ុនរស្មី ព្ររាជអាជ្ញារងសាលាដំបូងខេត្ត បានព្រមានយ៉ាងខ្លាំងៗចំពោះមន្ត្រីខិលខូចដូចពាក្យខាងលើនេះ ក្នុងកិច្ចប្រជុំផ្សព្វផ្សាយច្បាប់ជលផលនៅព្រឹកថ្ងៃទី០៩ ខែធ្នូ ឆ្នាំ២០១៤ជូន ប្រជាពលរដ្ឋចូលរួមជាង៧០ នាក់
នៅក្នុងវត្តកំពង់ព្រះគគីរ ស្ថិតក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូរណ៍ ដែលរៀបចំដោយលោកអភិបាលស្រុកបរិបូរណ៍ សហការជាមួយខ័ណ្ឌរដ្ឋបាលជលផល កំពង់ឆ្នាំង។
លោក ឃួន សៅរុំ អភិបាលស្រុកបរិបូរណ៍ជាប្រធានអង្គប្រជុំបាននិយាយក្នុងកិច្ចបើកអង្គប្រជុំថា៖ ការប្រជុំថ្ងៃនេះគឺគោលបំណងផ្សព្វផ្សាយច្បាប់ស្តីពីជលផលជូនប្រជាពលរដ្ឋក្នុងភូមិកោះតាម៉ូវអោយបានជ្រាបច្បាស់ ព្រោះថាកន្លងមកបងប្អូនប្រជានេសាទយើងមួយចំនួនមិនទាន់យល់ច្បាស់អំពីច្បាប់ ជលផល ហើយបាននាំគ្នាធ្វើនេសាទខុសច្បាប់ក្នុងតំបន់អភិរក្ស ដែលប្រឈមនឹងការបង្ក្រាបរបស់សមត្ថកិច្ច។
លោក លី ឡា នាយរងខ័ណ្ឌរដ្ឋបាលជលផលកំពង់ឆ្នាំងបានធ្វើការផ្សព្វផ្សាយច្បាប់ស្តីពីជលផល បានចែងថា៖ការបាត់បង់ព្រៃលិចទឹក ការបណ្តែតបណ្តោយអោយមានបទល្មើសនៅក្នុងដែននេសាទ គឺជាការទទួលខុសត្រូវរបស់អាជ្ញាធរមូលដ្ឋាន នៅក្នុងតំបន់នីមួយៗចំពោះមុខច្បាប់។ការកាប់ទន្ទ្រានព្រៃលិចទឹកពង្រីកដីធ្វើស្រែចំការ ក៍ជាអំពើខុសច្បាប់ដែរ។
លោកក៍បានផ្សព្វផ្សាយអនុសាសន៍ទាំង៧ចំណុច របស់សម្តេចតេជោ ហ៊ុន សែន និងបានផ្សព្វផ្សាយប្រកាសរបស់ក្រសួងកសិកម្មស្តីពីការអនុញាតិអោយប្រើឧបកណរណ៍នេសាទ៤៤ប្រភេទនៅក្នុងរដូវបិតនេសាទ និងប្រកាសអោយប្រើឧបករណ៍នេសាទ៥០ប្រភេទនៅក្នុងរដូវបើកនេសាទ។
ដោយឡែកលោកក៍បានបញ្ជាក់ផងដែរថា៖ចំពោះប្រជាពលរដ្ឋដែលបានដាក់សម្រាស់នៅក្នុងដែននេសាទរួចហើយ ត្រូវតែភ្ញាក់រលឹករុះរើដោយខ្លួនឯង ប៉ុន្តែមុនពេលរើរុះត្រូវអោ យអាជ្ញាធរ ឬសមត្ថកិច្ចជំនាញដឹងជាមុន។
ដោយឡែកលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកំពង់ឆ្នាំងបានលើកឡើងថា អំពើពុករលួយដែលបង្កអោយមានបទល្មើសនេសាទមាន៣ប្រភេទគឺ៖១.ជនល្មើសសូកលុយគេដើម្បីប្រព្រឹត្តិបទល្មើស, ២.អ្នករត់ការសូកលុយបង្កើតអោយមានបទល្មើស, ៣.អ្នកមានតួនាទីបង្ក្រាបបទល្មើសតែមិនព្រមបង្ក្រាប។ករណីទាំង៣ខាងលើនេះជនល្មើសទាំងអស់ត្រូវមានទោសដូចគ្នា ហើយកន្លងមកលោកបានដឹងថា៖បទល្មើសនេសាទនៅក្នុងតំបន់អភិរក្សឃុំកំពង់ព្រះគគីរ គឺមានមន្ត្រីខិលខូចមួយចំនួននៅពីក្រោយខ្នង ត្រូវតែដកខ្លួននិងកែរប្រែជាបន្ទាន់ បើពុំនោះទេលោកមិនលើកលែងនោះឡើយ។
ពេលនោះដែរលោកព្រះរាជអាជ្ញារងបានថ្លែងអំណរគុណដល់ការសហការដ៍ល្អរបស់ប្រជានេសាទយើងមួយចំនួនដែលកន្លងមកបានចង្អុលបង្ហាញ និងចូលរួមបង្ក្រាបបទល្មើសនេសាទនៅក្នុងតំបន់អភិរក្សឃុំកំពង់ព្រះគគីរជាមួយលោកបានចំនួន២ករណី ដែលចាប់ជនល្មើសបានចំនួន៩នាក់ ដកហូតកាណូតបាឡាស្មាច់៦គ្រឿង,កាប់បំផ្លាញចោលរបាំងសាច់អួនបានរាប់ពាន់ម៉ែត្រ, និងកាប់បំផ្លាញលបលូបានចំនួន៤៩មាត់។
លោកបានសំណូមពរដល់ប្រជាពលរដ្ឋទាំងអស់ផងដែរ កុំធ្វើជាខ្នងបង្អែកអោយជនខិលខូចដែល បង្កអោយមានបទល្មើសនេសាទនៅក្នុងមូលដ្ឋាន ព្រោះកាឃុបឃិតជាមួយជនល្មើសក៏មានទោសដូចគ្នា ដែរ បើជួបនឹងបទល្មើសនេសាទត្រូវរាយការណ៍មកអាជ្ញាធរ សមត្ថកិច្ចជំនាញ ឬត្រូវហ៊ានរាយការណ៍ មកស្ថាប័នអយ្យការតុលាការដោយផ្ទាល់ ដើម្បីចាត់វិធានការណ៍បង្ក្រាបប្រកបដោយប្រសិទ្ធិភាព៕
