គណៈបញ្ជាការឯកភាព ខណ្ឌមានជ័យ ដឹកនាំកម្លាំងផ្ទាល់ ពីសំណាក់លោក ឌី រ័ត្នខេមរុណ អភិបាលរងខណ្ឌមានជ័យ និងមានការចូលរួម ពីសំណាក់លោក កឹម រតនា អធិការរងនគរបាលខណ្ឌ និងមន្ត្រីសណ្តាប់ធ្នាប់
មួយចំនួនទៀត នៅយប់ថ្ងៃទី០៩ ខែធ្នូ ឆ្នាំ២០១៤ បានដាក់កម្លាំងឆ្មក់ស្ទាក់ ចាប់ឆែកអាវុធជាតិផ្ទុះ និងម៉ូតូដែលមិនបានបំពាក់ មួក ឬកញ្ជក់ត្រឹមត្រូវ និងស្លាកលេខខុសប្រក្រតី តាមបណ្តោយផ្លូវលេខ៣៧១ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
លោកឌី រ័ត្នខេមរុណ អភិបាលរងខណ្ឌមានជ័យ បានអោយដឹងថា ការចុះស្ទាក់ចាប់ឆែកអាវុធជាតិផ្ទុះ ក៏ដូចជាម៉ូតូគ្មានស្លាកលេខ មួកកញ្ជក់ត្រឹមត្រូវនេះ គឺឡើងក្នុងគោលបំណង ការពារសន្តិសុខ សណ្តាប់ធ្នាប់ និងរបៀបរៀបរយ អោយបានត្រឹមត្រូវតែប៉ុណ្ណោះ ហើយក៏ជាសញ្ញាមួយ ក្នុងការដាស់តឿន និងពញ្ញាក់អារម្មណ៍ របស់បងប្អូនមួយចំនួនតូច ដែលតែងតែបើកបរក្នុងពេលស្រវឹង ហើយមិនបានបំពាក់កញ្ជក់ និងមួកសុវត្ថភាពឲ្យបានត្រឹមត្រូវ និងជាការប្រុងប្រយ័ត្នខ្ពស់បំផុត ចំពោះជនប្រដាប់អាវុធមួយចំនួនធំ ដែលតែងតែងប្រើប្រាស់អាវុធ ក្នុងការបាញ់បោះសេរី ក៏ដូចជាឆក់ ប្លន់ និងបង្កជាករណីផ្សេងៗ ពេលចរាចរណ៍លើដងផ្លូវ ក្នុងរាជធានីភ្នំពេញ ។
លោកបានបន្តទៀតថា ការចុះប្រតិបត្តិការនេះដែរ គឺធ្វើឡើងដោយអនុវត្តន៍តាមបញ្ជារ របស់លោកអភិបាលខណ្ឌ ដែលលោកតែងតែបញ្ជារ អោយមន្ត្រីក្រោមឱវាទទាំងអស់ ធ្វើយ៉ាងណាប្រើគ្រប់វិធី ទប់ស្កាត់ទៅលើជនប្រដាប់អាវុធខុសច្បាប់ ដែលតែងតែបង្កភាពអសន្តិសុខ ក្នុងសង្គមជាតិ ការពារសុវត្ថភាព ជូនបងប្អូនប្រជាពលរដ្ឋក្នុងមូលដ្ឋាន អោយស្របទៅតាមគោលនយោបាយ ភូមិ ឃុំមានសុវត្ថភាព របស់ប្រមុខ រាជរដ្ឋាភិបាលកម្ពុជា ៕
លោកបានបញ្ជាក់ថា ក្នុងប្រតិបត្តិការជាង២ម៉ោងនេះ កម្លាំងសមត្ថកិច្ចរបស់យើង មិនបានរកឃើញអាវុធ និងបទល្មើសផ្សែងៗនោះទេ គឺឃាត់បានតែម៉ូតូ ដែលមិនបានបំពាក់មួក ឬកញ្ជក់ និងស្លាកលេខខុសប្រក្រតី មួយចំនួន យកមកធ្វើការពិន័យតែប៉ុណ្ណោះ។
សូមបញ្ជាក់ផងដែរថា នេះគឺជាគំរូដ៏ល្អមួយផងដែរ សម្រាប់ភូមិសាស្ត្រខណ្ឌមានជ័យ ដែលតែងតែដាក់ពង្រាយកម្លាំង ក៏ដូចជាដឹកនាំកម្លាំង ចុះធ្វើការស្ទាក់ឆែកអាវុធជាតិផ្ទុះបែបនេះ ។ ហើយជាពិសេស កាលពីកន្លងមក ក៏ធ្លាប់មានការស្ទាក់ចាប់ឆែកឆេរ អាវុធជាតិផ្ទុះ និងពិនិត្របច្ចេកទេសយានជំនិះ បែបនេះជារឿយៗ សម្រាប់ខណ្ឌមានជ័យ ផងដែរ ៕
