ខេត្តរតនគីរីៈ ការជីកកកាយ និងបូម រ៉ែយកមាសនៅក្នុងដីទាំងនោះ ស្ថិតនៅភូមិតាកុកព្នង ឃុំបរខាំ ស្រុកអូរយ៉ាដាវ ខេត្តរតនគីរី ត្រង់ចំណុចជើងភ្នំប៉ាង និងមួយកន្លែងទៀតស្ថិតនៅភូមិក្វែង ឃុំយ៉ាទង់ ស្រុកអូរយ៉ាដាវ ដោយប្រើដែកត្បែងជីកលុងបុក បំបែកថ្មរ៉ែ ជម្រៅរាប់សឹបម៉ែត្រ ដោយប្រើម៉ាស៊ីនរាប់សឹបគ្រឿង បូមយករ៉ែ មកកិន រែងយកមាស និងបុកបូមយករ៉ែតែម្ដង។
តាមការអោយដឹងពីកម្មករនៅទីនោះបានបញ្ជាក់ថា ពួកគាត់ប្រកបមុខរបរជីកមាសនៅទីនេះជាច្រើនមកហើយ។ រីឯប្រាក់កម្រៃ ដែលទទួលបាន ត្រឹមតែចិញ្ចឹមជីវិតតែប៉ុណ្ណោះ ចំណែកអ្នកដែលមានបានគឺថៅកែឯណោះទៅវិញទេ កម្មករខាងលើបានបន្តអោយដឹងទៀតថា កន្លងមកមានសមត្ថកិច្ច ចុះមកស្រង់ស្តិតិ ជាញឹកញាប់ដែរ តែគេពុំដឹងថា លទិ្ធផលយ៉ាងណានោះទេ។
ពាក់ព័ន្ធនិងបញ្ហាធ្វើអាជីវកម្មរ៉ែមាសខាងលើ លោក ម៉ា វិចិត្រ អភិបាលស្រុកអូរយ៉ាដាវ បានបញ្ជាក់ថា បញ្ហានេះសកម្មភាពជីករ៉ែមាសខាងលើនេះ លោកបានចាត់ឲ្យកម្លាំងចុះទៅស្រង់ស្ថិតិមនុស្សនិងម៉ាស៊ីនឲ្យពិតប្រាកដជាបណ្តើរៗហើយ លោកបន្តថាការចុះធ្វើនេះមានការលំបាកដោយសារតែសកម្មភាពរបស់ប្រជាពលរដ្ឋជីករករ៉ែមាសនៅពេលនេះគឺគេធ្វើសកម្មភាពលួចលាក់ ជាហេតុធ្វើឲ្យកម្លាំងរបស់លោកពិបាក និងស្រង់ស្ថិតិពិតប្រាកដនេះណាស់។ប៉ុនតែបើទោះបីជាយ៉ាងណាក៏ដោយលោកនិងបន្តធ្វើការងារនេះអោយបានជោគជ័យ និងឈានទៅបិទអាជីវកម្មនេះតែម្តង។
លោ ហ៊ុន ប៊ុនថាន ប្រធានមន្ទីរ រ៉ែ និងថាមពល បានបញ្ជាក់អោយពត៌មានយើងដឹងថា លោកពុំបានដឹងទេចំពោះបញ្ហាខាងលើនេះដោយសារតែធអាជ្ញាធរមូលដ្ឋានមិនបានរាយការណ៍មកអោយមន្ទីរនោះទេ ប៉ុន្តែបើសិនជាមានករណីនេះពិតប្រាកដមែនលោកនិងដឹកនាំកម្លាំងចុះសហការជាមួយអាជ្ញាធរមូលដ្ឋានដើម្បីធ្វើការទប់ស្កាត់សកម្មភាពខាងលើនេះផងដែរ។
គួរបញ្ជាក់ថា នៅក្នុងទឹកដីស្រុកអូរយ៉ាដាវ និងស្រុកលំផាត់ ខេត្តរតនគិរី ដែលជាប់និងព្រំស្រុកកោះញ៉ែក ខេត្តមណ្ឌលគិរី ធនធានធម្មជាតិមានដូចជារ៉ែមាស ព្រៃឈើ និងមច្ឆាជាតិ កំពុងតែប្រឈមនិងការវិនាសអន្តរាយតាមរយៈមេឈ្មួឃុបឃិតជាមួយនិងកងកម្លាំងដែលប្រចាំការនៅទីនោះកំពុងតែធ្វើសកម្មភាពយ៉ាងអាណាធិតេយ្យ ដើម្បីលួចនាំចេញធនធានធម្មជាតិទាំងនោះតាមច្រករបៀងទៅកាន់ប្រទេសវៀតណាម ហើយជាពិសេស
ការវិនាសហិនហោចពូជមច្ឆាជាតិដែលជាតំបន់ស្នូលនៅទន្លេស្រែពកដែលជនល្មើសតែងតែឃុបឃិតជាមួយកងកម្លាំងនៅទីនោះប្រើឧបករណ៍ឆក់ត្រជាក់ដាក់អូសអួន និងដាក់ដៃចាប់ត្រីខុសច្បាប់នៅតាមអូរ ដូចជាអូរ ប៉ាល់ ,ល្វាលើ ល្វាក្រោមជាដើមហើយតំបន់នោះ សុទ្ធតែជាតំបន់ហាមឃាត់ការនេសាទមច្ឆាជាតិ ព្រោះជាតំបន់ស្នូល(តំបន់ហាមឃាត់នេសាទ ព្រោះជាតំបន់ត្រីពងកូនមេពូជ)
មជ្ឈដ្ឋានទូរទៅសំណូមពរអោយឯកឧត្តមឱម យិនទៀន ប្រធានអង្គភាពប្រឆាំងអំពើពុករលួយសការជាមួយក្រសួងពាក់ព័ន្ធមួយចំនួនចុះមកពិនិត្យនៅចំណុចព្រំប្រទល់ប្រទេសវៀតណាមក្នុងទឹកដីកម្ពុជាត្រង់ស្រុកអូរយ៉ាដាវ ស្រុកលំផាត់ ក្នុងខេត្តរតនគិរី ព្រមទាំងស្រុកកោះញ៉ែក ខេត្តរតនគិរី បើពុំដូច្នេះទេធនធានធម្មជាតិនិងវិនាសអន្តរាយនៅពេលដ៏ឆាប់នេះ ហើយផលប្រយោជន៍ដែលបានមកពីការបំផ្លេចបំផ្លាញធនធានធម្មជាតិនេះគឺសំរាប់ចូលតែហោប៉ាវបុគ្គលមួយក្តាប់តូចប៉ុណ្ណោះ មិនបានចូលជាថវិការរដ្ឋ ឫជាតិឡើយ៕
