កម្មករសំណង់ម្នាក់ ដែលកំពុងបម្រើការងារនៅខុនដូ កំពុងសាងសង់ ដែលមានកម្ពស់ជិត២០ជាន់ ស្ថិតនៅតាមបណ្ដោយផ្លូវលេខ២៤២ កែងផ្លូវលេខ១១១ សង្កាត់បឹងព្រលឹត ខណ្ឌ៧មករា ត្រូវជណ្តើរយន្តគៀបស្លាប់ នៅជាន់ទី១៥ នៃអគារ
ខុនដូ កាលពីរសៀលថ្ងៃទី១០ ខែធ្នូ ឆ្នាំ២០១៤ ដែលមានថៅកែឈ្មោះ លី ហួត ។
ប្រភពព័ត៌មាន ពីសមត្ថកិច្ចមូលដ្ឋាន បានឱ្យដឹងថា ជនរងគ្រោះដែលត្រូវជណ្តើរយន្ត គៀបស្លាប់នៅជាន់ទី១៥ខាងលើនេះ មានឈ្មោះ ចាន់ ធឿន អាយុ២១ឆ្នាំ មានស្រុកកំណើត នៅខេត្ដព្រៃវែង ។
ប្រភពព័ត៌មាន ពីកន្លែងកើតហេតុ បានឱ្យដឹងថា មុនពេលកើតហេតុ ជនរងគ្រោះ បានធ្វើការនៅជាន់ទី១៥ ហើយក្រោយមក ក៏បានចុះតាមជណ្ដើរយន្ដ ដែលទើបដំឡើងថ្មី មានតែគ្រោងឆ្អឹង សំដៅទៅជាន់ខាងក្រោម ហើយគ្មានប្រព័ន្ធគ្រប់គ្រងសុវត្ថិភាព ក៏បណ្ដាលឲ្យកម្មករនោះ កៀបក្បាលចូលនិងជណ្ដើរដែក ស្លាប់យ៉ាងអាណោចអាធ័ម ។
ប្រភពព័ត៌មានដដែល បានឱ្យដឹងថា បន្ទាប់ពីមានហេតុការណ៍នេះកើតឡើង ម្ចាស់សំណង់បានព្យាយាមបិទបាំងព័ត៌មាន មិនឱ្យឮដល់អាជ្ញាធរដែនដី និងអ្នកកាសែត តែដោយកម្មករ ធ្វើ្វការជាមួយជនរងគ្រោះមានការអាណិតអាសូរ ដល់ឈ្មោះ ចាន់ ធឿន ដែលបាត់បង់ជីវិត ក្នុងពេលកំពុងបំពេញការងារនោះ ទើបរាយ ការណ៍ប្រាប់សមត្ថកិច្ចមូលដ្ឋានឱ្យបានដឹង និងចុះទៅត្រួតពិនិត្យ ដល់កន្លែងកើតហេតុ ។
បន្ទាប់មកគេឃើញសមត្ថកិច្ចជំនាញ បានចុះទៅធ្វើកោសល្យវិច័យ និងបានសន្និដ្ឋានថា ជនរងគ្រោះពិតជាស្លាប់ ដោយជណ្ដើរយន្ដកៀប នៅពេលកំពុងបំពេញការងារប្រាកដមែន ។ សាកសពត្រូវបានសមត្ថកិច្ច ប្រគល់ឱ្យក្រុមគ្រួសារសព យកទៅធ្វើបុណ្យនៅស្រុកកំណើត តាមប្រពៃណី ៕
