អ្នកចរចាទាំងឡាយ នៅក្នុង សភា និង ព្រឹទ្ធសភា របស់សហរដ្ឋអាម៉េរិក បាន សម្រេចថវិកា ១,១ ពាន់ពាន់លានដុល្លារ ហើយសម្រាប់ទ្រទ្រង់ រដ្ឋាភិបាលជាបន្តទៀត ដែល ការសម្រេចនៅថ្ងៃអង្គារ ទី០៩ ខែធ្នូ នេះ គឺស្ថិតនៅចំពោះមុខ ពេលវេលាពីរថ្ងៃប៉ុណ្ណោះ ដែល ភ្នាក់ងារទាំងឡាយ
នៅក្នុងរដ្ឋាភិបាល សហព័ន្ធ ត្រូវអស់ថវិកា ក្នុងការផ្គត់ផ្គង់ទាំងស្រុង ។
សារព័ត៌មាន CNN ចេញផ្សាយបន្តទៀតថា សម្រាប់ផ្នែកមួយផ្សេងទៀត ក្រៅពីការព្រមព្រៀង គ្នាទៅលើកញ្ចបថវិការដ្ឋនេះ គណបក្សប្រជាធិបតេយ្យ និង សាធារណរដ្ឋ ក៏បានយល់ស្រប គ្នាផងដែរក្នុងការ ផ្សារភ្ជាប់នូវផ្នែកនយោបាយ ទៅលើការដោះស្រាយបញ្ហារួមមួយចំនួនទៀត ក្នុងនោះមានដូចជា ការងាកមករៀបចំផ្នែក បរិស្ថានឲ្យមាន របៀបរៀបរយឡើងវិញ, ការបង្កើត ច្បាប់សម្រាប់គ្រប់គ្រងចំការ កញ្ឆា ក្នុងសង្កាត់ កូឡុំប៊ៀ, និង ការផ្លាស់ប្តូរមួយចំនួនដើម្បី រៀបចំផ្នែកហិរញ្ញវត្ថុ ឲ្យមានរបៀបរៀបរយ សម្រាប់ធនាគារ ទាំងឡាយផងដែរ។
គួរបញ្ជាក់ថា នេះជាសេចក្តីសម្រេចបន្ទាន់ ក្រោយការជួបចរចា រវាងសមាជិកសភា និង ព្រឹទ្ធ សភា នៃគណបក្សទាំងពីរ ដើម្បីចៀសវាង ការជួបបញ្ហាណាមួយ សាជាថ្មីទៀត ជាពិសេស នោះគឺកិច្ចការពារ នៅពេលគោលនយោបាយ ណាមួយត្រូវបិទ ឬផ្អាកការអនុវត្តភ្លាមៗ ដែលប្រការទាំងនេះ វានឹងនាំឲ្យប៉ះពាល់យ៉ាងខ្លាំង ដល់ផ្នែកសេដ្ឋកិច្ច ។ នេះជាកតព្វកិច្ច ដែល តំណាងបក្សទាំងពីរ បានអះអាងថា ត្រូវធ្វើទៅតាមការចង់ បានរបស់ប្រជាជនអាម៉េរិក ៕
