ទីភ្នាក់ងារព័ត៌មាន ចិនស៊ិនហួ បានចុះផ្សាយកាលពី រាត្រីថ្ងៃទី០៩ ខែធ្នូ ឆ្នាំ២០១៤ថា មានករណីបំផ្ទុះគ្រាប់បែក មួយកើតឡើង កាលពីរសៀល ថ្ងៃអង្គារ មកលើរថយន្តក្រុង ស្ថិតនៅភាគខាងត្បូង ប្រទេសហ្វីលីពីន នៅខេត្ត ប៊ូគីណុនបណ្តាលឲ្យ អ្នកដំណើរ នៅលើរថយន្ត ចំនួន១១នាក់បាត់
បង់ជីវិតនិង២១នាក់ផ្សេងទៀត រងរបួសធ្ងន់ ស្រាល បញ្ជូនទៅកាន់មន្ទីរពេទ្យ ដើម្បីសង្គ្រោះ ។
ប្រភពព័ត៌មានបានចុះផ្សាយថា មានរថយន្តក្រុងដឹកអ្នក ដំណើរទៅមកមួយ គ្រឿងដែលគេដឹង ថាជារថយន្តធ្វើដំណើរ ទៅមកសម្រាប់ដឹកអ្នក ដំណើរនៅជនបទ ពីតំបន់មួយទៅតំបន់មួយ ហើយនៅរសៀល ថ្ងៃអង្គារម្សិលមិញនេះ រថយន្តបានមកដល់ចំណុច បរិវេណនៃសាកលវិទ្យាល័យ មួយឈ្មោះថា Mindanao នៅក្រុង Mindanao វេលាម៉ោង៥និង៤៥នាទី ក៏មានជនមិន ស្គាល់អត្តសញ្ញាណ បានបោះគ្រាប់បែកមក លើរថយន្តក្រុង រួចគេចខ្លួនបាត់ ។
នេះបើយោងតាម លោក Christian Uy មន្ត្រីយោធាការពារ សុវត្ថិភាពសាធារណៈ នៃកងយោធាទី៤ បានឲ្យដឹង យ៉ាងដូច្នេះ ។លោកបានបញ្ជាក់ថា ដំបូងមានអ្នកស្លាប់ចំនួន០៩នាក់ ក្នុងនោះស្រី០៥នាក់ និងបុរស០៤នាក់ ហើយមានអ្នករងរបួសចំនួន១៧នាក់ ដែលបានបញ្ជូនទៅកាន់ មន្ទីរពេទ្យសង្គ្រោះបន្ទាន់ ។
គួរបញ្ជាក់ថា មន្ត្រីយោធារូបនេះ មិនបានបញ្ជាក់ច្បាស់លាស់ថា ជនដែលសង្ស័យក្នុងករណី បោះគ្រាប់បែក មកលើរថយន្តក្រុង ដឹកអ្នកដំណើរ នាពេលនោះជាអ្នកណា ឬមានអត្តសញ្ញាណ របស់ជនសង្ស័យ បញ្ជាក់នៅឡើយទេ ។ លោក Uy បានបន្ថែមថា ករណីនេះស្ថិត នៅក្នុងរង្វង់ការស៊ើបអង្កេត នៅឡើយ ។
គួររំលឹកថា នៅក្នុងខែវិច្ឆិកា កន្លងទៅនេះ ក៏មានករណីបោះគ្រាប់បែក មកលើរថយន្តរបស់ ក្រុមហ៊ុនមួយនេះដែរ ដែលបណ្តាលឲ្យ អ្នកដំណើរ ស្លាប់អស់ចំនួន ០៣នាក់ តែករណីនោះ កើតឡើង នៅក្រុង Maramag ៕
