(ខេត្តព្រៃវែង) រថយន្តដែលមានសភាពចាស់ទ្រុឌទ្រោម មិនមានលក្ខណៈបច្ចេកទេសគ្រប់គ្រាន់ ដូចឃើញក្នុងរូបថតនេះ ធ្វើចរាចរណ៍យ៉ាងសង្ហា ពេញទឹកដីខេត្តព្រៃវែង។ អាចប្រឈមនិងគ្រោះថ្នាក់ចរាចរ គ្រប់ពេលក៏ថាបាន ព្រោះរថយន្តដែលកំពង់ធ្វើចរាចរណ៍នេះ គ្មានភ្លើងស៊ីញ៉ូឆ្វេងស្តាំមុខក្រោយ និងគ្មានភ្លើងស្តុប កង់សឹកក្រឡាអស់ តួរថយន្តចាស់មើលលែងយល់ មិនគួរធ្វើចរាចរណ៍បែបនេះទៀតទេ។
រថយន្តដែលមានសភាពចាស់ទ្រុឌទ្រោមមើលលែងយល់ មិនស្គាល់ម៉ាក មិនដឹងស៊េរីផលិតនៅឆ្នាំណា ធ្វើចរាចរណ៍ក្នុងខេត្តព្រៃវែងយូរឆ្នាំមកហើយ ធ្វើចរាចរណ៍ទៅដល់កន្លែងណា មហាជនបាននាំគ្នាធ្វើការ រិះគន់ទៅដល់ម្ចាស់រថយន្តមិនគួរនៅតែបន្តប្រើប្រាស់រថយន្តដែលចាស់មើលលែងយល់បែបនេះ មិនគ្រប់ លក្ខណៈបច្ចេកទេសដូចនេះទៀតទេ ព្រោះវាអាចបង្កគ្រោះថ្នាក់ខ្លួនឯង និងអ្នកដ៏ទៃផងដែរ។ ក្រុមមហាជន ដែលធ្វើការរិះគន់ នៅពេលឃើញរថយន្តនេះធ្វើចរាចរឆ្លងកាត់ក្រុមប៉ូលីសដែលកំពុងធ្វើចរាចរណ៍តាមដងផ្លូវ ក្រុមប៉ូលីសទាំងនោះក្រឡេកមើលហើយ នាំគ្នាសើច មិនធ្វើការផាកពិន័យរថយន្តបែបនេះទៅវិញ ។
ពាក់ព័ន្ធនិងរថយន្តចាស់ ហើយមិនគ្រប់លក្ខណៈបច្ចេកទេសនេះផងដែរ លោក ម៉ៅ សាម៉េត នាយការិយាល័យចរាចរណ៍ជើងគោកនៃស្នងការដ្ឋាននគរបាលខេត្តព្រៃវែង បានបញ្ជាក់ប្រាប់កម្ពុជាថ្មីយ៉ាង ច្បាស់ថា លោកនិងសហការជាមួយមន្ត្រីសាធារណៈការធ្វើការប្រមានដល់ម្ចាស់រថយន្តចាស់ៗ មិនគ្រប់ លក្ខណៈបច្ចេកទេសដែលកំពុងធ្វើចរាចរណ៍នៅក្នុងទឹកដីខេត្តព្រៃវែងរាល់ថ្ងៃនេះ លោកមិនអនុញ្ញាតអោយ ធ្វើចរាចរណ៍ទៀតជាដាច់ខាត។ ជាពិសេសមិនអនុញ្ញាតអោយធ្វើចរាចរណ៍តាមបណ្តោយផ្លូវជាតិ ព្រោះ បច្ចុប្បន្ននេះគ្រោះថ្នាក់ចរាចរដែលបង្កឡើងដោយសារកត្តាយានយន្តកំពុងតែកើនឡើង គួរអោយព្រួយ បារម្មណ៍ផងដែរ។
លោក ម៉ៅ សាម៉េត បានបន្តទៀតថា រថយន្តដែលចាស់ គ្មានភ្លើងស៊ីញ៉ូ មុខក្រោយទាំងសងខាង គ្មានភ្លើងស្តុប លោកនិងធ្វើការផាកពិន័យដល់ម្ចាស់រថយន្តទាំងនោះ អោយបានធ្ងន់ធ្ងរបំផុតទៅតាមផ្លូវច្បាប់ ។ ពីព្រោះរថយន្តទាំងនោះវា អាចបង្កគ្រោះថ្នាក់ខ្លាំងបំផុតដូចជា ផ្ទុះកង់ ដាច់ហ្វ្រាំង ដាច់រ៉ូទីល និងដាច់ក្រឡេ ។ ល ។ ហើយពិសេសជាងនេះទៅទៀត វាអាចបង្កគ្រោះថ្នាក់ដល់អ្នកដ៏ទៃដែលធ្វើដំណើរតាមដងផ្លូវដោយ មិនដឹងខ្លួនទៀតផង។
Ads
