រាជធានីភ្នំពេញ ៖ បុរស៣នាក់បងប្អូនជិះម៉ូតូមួយគ្រឿងបើកឌុបគ្នាចេញពីផ្ទះត្រូវរថយន្តកាមរីហាយប្រ៊ីតជិះដោយបុរសចំណាស់៥នាក់ក្នុងស្ថានភាពស្រវឹងបើកមកបុកចំពីក្រោយពេញទំហឹងបណ្តាលឱ្យបុរសជិះម៉ូតូទាំង៣នាក់ផ្លោងធ្លាក់ទៅលើថ្នល់រងរបួសធ្ងន់ ចំណែកម៉ូតូត្រូវរថយន្តបុកកិនអូសទៅជាមួយបានប្រហែលជាងមួយគីឡូម៉ែត្រក៏ធ្លាក់ចេញពីរថយន្ត ហើយអ្នកបើកបររថយន្តដឹងថា បុរសរងគ្រោះនៅផ្ទះក្បែរខ្លួន ប្រហែលជាបើករថយន្តគេចមិនរួចក៏បានបើករថយន្តថយក្រោយទាំងបែកកញ្ចក់មុខក្រោយមកដល់កន្លែងកើតហេតុវិញ រួចនាំគ្នាបើកទ្វាររថយន្តរត់គេចបាត់អស់ ។
ហេតុការណ៍នេះកើតឡើងកាលពីវេលាម៉ោង ១០ និង ៣០នាទីយប់ ថ្ងៃទី ៩ ធ្នូ២០១៤ នៅចំណុចមុខប៉ុស្តិ៍នគរបាលរដ្ឋបាលឬស្សីកែវ ស្ថិតតាមបណ្តោយផ្លូវជាតិលេខ៥ ស្ថិតក្នុងសង្កាត់គីឡូ ម៉ែត្រលេខ៧ ខណ្ឌឬស្សីកែវ ។
ប្រភពព័ត៌មានបានឱ្យដឹងថា នៅមុនពេលកើតហេតុជនរងគ្រោះទាំង៣នាក់បងប្អូនបានជិះម៉ូតូម៉ាក PULZZA មួយគ្រឿងពណ៌លឿង ខ្មៅ ពាក់ស្លាកលេខភ្នំពេញ1CN-8233 បានជិះឌុបគ្នាចេញពីផ្ទះដោយធ្វើដំណើរតាមផ្លូវជាតិលេខ៥ ក្នុងទិសដៅពីជើងទៅត្បូង ខណៈមកដល់ចំណុចកើតហេតុក៏ត្រូវរថយន្តកាមរីហាយប្រ៊ីតពណ៌ស្លែរមួយគ្រឿង ពាក់ស្លាកលេខភ្នំពេញ2V-8546 ជិះដោយបុរសចំណាស់៥នាក់ចេញពីហូបការគេ និងបានបើកបរក្នុងស្ថានភាពស្រវឹង តាមផ្លូវជាតិលេខ៥ក្នុងទិសដៅស្របគ្នាបានជ្រុលចង្កូតមកបុកពីក្រោយម៉ូតូជនរងគ្រោះពេញទំហឹងបណ្តាលឱ្យបុរសជិះម៉ូតូទាំង៣នាក់ផ្លោងធ្លាក់ទៅលើថ្នល់រងរបួសធ្ងន់ ចំណែកម៉ូតូត្រូវរថយន្តបុកកិនអូសទៅជាមួយបានប្រហែលជាងមួយគីឡូម៉ែត្រក៏ធ្លាក់ម៉ូតូចេញពីរថយន្ត។ អ្នកបើកបររថយន្តដឹងថា បុរសរងគ្រោះនៅផ្ទះក្បែរខ្លួន ហើយប្រហែលជាបើករថយន្តគេចមិនរួចក៏បានបើករថយន្តថយក្រោយទាំងបែក កញ្ចក់មុខក្រោយមកដល់កន្លែងកើតហេតុវិញ រួចនាំគ្នាបើកទ្វាររថយន្តរត់គេចបាត់អស់ ។ នៅពេល កើតហេតុក៍មានបុរសម្នាក់ទំនងជាស្រវឹងបានមកកាងរថយន្ដស្រែកពេញកនលែង កើតហេតុក៍បង្ក អោយឈ្លោះគ្នាជាមួយសន្តិសុខសណ្ដាប់ធ្នាប់រកវាយសំណាងបានសមត្ថកិច្ចឃាត់ទាន់។
ក្រោយពេលកើតហេតុជនរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យ ចំណែករថយន្ត បង្ក និង ម៉ូតូរបស់ជនរងគ្រោះត្រូវសមត្ថកិច្ចធ្វើការវាស់វែង រួចយកទៅរក្សាទុកនៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញរងចាំដោះស្រាយគ្នាតាមនិតិវិធីច្បាប់ ។
Ads
