ខេត្តព្រះសីហនុ.ស្របពេលដែលអាជ្ញាធរខេត្តចេញសេចក្តីជូនដំណឹងស្តីពីការហាមឃាត់មិនអោយមានការចាក់ដីលុបសមុទ្រក៏ដូចជាសាងសង់សំណង់រឹងមាំឬសំណង់ផ្សេងៗថ្មីនៅតំបន់ទំនប់រលកដែលបង្កផលប៉ះពាល់ដល់ការអភិវឌ្ឍន៍កំពង់ផែនៅពេលខាងមុខ និង សណ្តាប់ធ្នាប់អនាម័យបរិស្ថាន។
.សេចក្តីជូនដំណឹងនេះ បានតំរូវអោយ មន្ត្រីអង្គភាពពាក់ព័ន្ធ ជាពិសេសអាជ្ញាធរមូលដ្ឋាន ភូមិសង្កាត់ ចុះធ្វើការផ្សព្វផ្សាយអោយបានទូលំទូលាយក្នុងគោលដៅអោយប្រជាពលរដ្ឋរស់នៅតំបន់ខាងលើបានជ្រាប និង អនុវត្តតាម រួមនឹងការអនុវត្តវិធានការច្បាប់ផងដែរ។
.បើទោះជាអាជ្ញាធរខេត្តចេញសេចក្តីជូនដំណឹងប្រកាសហាមឃាត់យ៉ាងម៉ឺងម៉ាត់យ៉ាងនេះក្តី ក៏គេសង្កេតឃើញមានបុគ្គលមួយចំនួននៅតែបន្តការឃុបឃិតគ្នា ដឹកដីចាក់លុបឆ្នេរសមុទ្រត្រង់ចំណុចខាងមុខប៉ូលីសអន្តោប្រវេសន៍យ៉ាងសកម្ម ផ្គើនទៅនឹងបទបញ្ជារបស់អាជ្ញាធរខេត្ត។ ក្រុមអ្នកចាក់ដីខាងលើ ជុំវិញបញ្ហាចាក់ដីចូលសមុទ្រនេះ ពួកគេបាននិយាយប្រាប់ក្រុម
អ្នកសារព័ត៌មានកាសែត និង ទូរទស្សន៍ ជាច្រើននាក់យ៉ាងឡូយថា ការចាក់ដីនេះ មិនមានច្បាប់អនុញ្ញាត្តិទេ ប៉ុន្តែសំរាប់អាជ្ញាធរមូលដ្ឋាន ភូមិសង្កាត់ ក្រុងខេត្ត មេការរបស់ពួកគេឈ្មោះ វ៉ាន់ ដែលអះអាងថា ជាប្អូនថ្លៃរបស់លោក ស្បោង សារ៉ាត អតីតអភិបាលខេត្តព្រះ សីហនុ បានចាត់ចែងលើកិច្ចការនេះអស់ហើយ និងមិនមានមន្ត្រីថ្នាក់ណា ជំទាស់នោះទេ ពោលគឺមន្ត្រីគ្រប់លំដាប់ថ្នាក់ គេបានយល់ព្រមអោយចាក់ ដើម្បីសង់សំណង់ផ្ទះថ្ម។អ្វីដែលក្រុមអ្នកចាក់ដីបាននិយាយខាងលើនេះ ក្រុមអ្នកកាសែតនិងទូរទស្សន៍ស្តាប់ទៅដូចជាមានការចាប់អារម្មណ៍ណាស់ពីព្រោះថានេះជាទង្វើផ្ទុយទៅនឹងអ្វីដែលសាលាខេត្តកំពុងពង្រឹងលើការអនុវត្តច្បាប់លើសំណង់គ្រប់ប្រភេទនៃតំបន់ខាងលើ។
លោក ឈិត សុផាត ចៅសង្កាត់លេខ ១ ដែលជាអជ្ញាធរមូលដ្ឋាន បានធ្វើការបញ្ជាក់យ៉ាងរលូនថា រូបគាត់ពុំដែលបានដឹង បានឃើញ នូវសេចក្តីជូនដំណឹងរបស់អាជ្ញាធរខេត្តស្តីពីការហាមឃាត់ មិនអោយសាងសង់សំណង់រឹងមាំ ឬ សំណង់ថ្មី នៅតំបន់ទំនប់រលកនោះទេតែផ្ទុយទៅវិញមានតែអាជ្ញាធរខេត្ត បានជំរុញអោយអាជ្ញាធរមូលដ្ឋាន អោយប្រជាពលរដ្ឋសាងសង់សំណង់ផ្សេងៗតាមលទ្ធភាពដែលអាចធ្វើបាន គឺមិនមានការហាមឃាត់អ្វីទេ ដូចនេះអ្វីដែលជំទាស់គឺមិនមាន ។
លោក ស៊ុន ស្រ៊ន់ អភិបាលរងខេត្តព្រះសីហនុ ទទួលបន្ទុកខាងរដ្ឋបាលដីធ្លី ជុំវិញបញ្ហាខាងលើនេះ រូបលោកមិនទាន់បានដឹងនោះទេ ប៉ុន្តែទោះបីយ៉ាងណាក៏ដោយ លោកនឹងអោយក្រុមការងារចុះទៅពិនិត្យមើលជាក់ស្តែង កន្លែងដែលចាក់ដីចូលសមុទ្រនោះ ដើម្បីមានវិធានការតាមផ្លូវច្បាប់។ គួរបញ្ជាក់ផងដែរថា លិខិតជូនដំណឹងស្តីពីការរៀបចំថែរក្សាបរិស្ថាននិងសណ្តាប់ធ្នាប់អនាម័យ និង សាងសង់សំណង់ផ្សេងៗនៅក្នុងតំបន់ទំនប់រលកសង្កាត់លេខ ១ខាងលើនេះចុះថ្ងៃ២៦ខែមិថុនាឆ្នាំ២០១៤លេខ៣០៤ចុះហត្ថលេខាដោយលោកឈិតសុខុនអភិបាលនែគណៈអភិបាលខេត្តព្រះសីហនុ៕កោះពស់(រូបភាពចាក់ដីចូលសមុទ្រ)
