កាលពីថ្ងៃទី១១ ខែធ្នូ ឆ្នាំ២០១៤ព្រះសង្ឃ ១អង្គ និងបុរស ៤នាក់ ត្រូវមន្ត្រីធម្មការ និងមន្ត្រីអាជ្ញាធរ ឃាត់ខ្លួនពីបទក្លែងលិខិតស្នាម ដើររៃអង្គាសបច្ច័យ និងស្រូវនៅតាមភូមិនានា ក្នុងភូមិមេលំស្រុកបរិបូរណ៌ ខេត្តកំពង់ឆ្នាំង ។
ព្រះសង្ឃ ដែលសមត្ថកិច្ចមន្ត្រីជំនាញ និងមន្ត្រីអាជ្ញាធរឃាត់ខ្លួននោះ ព្រះនាម ចាន់ សំណាង គង់នៅវត្តត្រពាំងរាំង ឃុំទឹកហូត ស្រុករលាប្អៀរ ខេត្តកំពង់ឆ្នាំង។ ចំណែកបុរស ៤នាក់ទៀត ១. ឈ្មោះហេង សិទ្ធា អាយុ ៣១ឆ្នាំ ២.ឈ្មោះ ហុង លី អាយុ ៦១ឆ្នាំ ៣.ឈ្មោះ នួន រ៉ា អាយុ ៣២ឆ្នាំ និង៤.ឈ្មោះ សាំង សារិទ្ធ អាយុ ២៣ឆ្នាំ អ្នកទាំង៤នាក់នេះ មានទីលំនៅក្នុងឃុំព្រៃមូល ស្រុករលាប្អៀរ ខេត្តកំពង់ឆ្នាំង។ 
អនុប្រធានការិយាល័យធម្មការ និងសាសនា ស្រុកបរិបូរណ៌ លោក ថោង មាឃបានអោយដឹងថា ព្រះសង្ឃ១អង្គ និងបុរសទាំង ៤នាក់នេះ បានធ្វើដំណើរតាមគោយន្តមួយគ្រឿង ដោយប្រកាសតាមឧគ្ឃោសនស័ព្ទ ដើម្បីរៃអង្គាសបច្ច័យ និងស្រូវ នៅតាមភូមិនានា។ ដោយមានការសង្ស័យ មន្ត្រីជំនាញ និងអាជ្ញាធរ បានសហការគ្នា ឃាត់សាកសួរតែម្តង។ ក្រោយពីឃាត់សាកសួរ ព្រះសង្ឃ ចាន់ សំណាង បានអោយដឹងថា ការដើររៃអង្គាសបច្ច័យ និងស្រូវនេះ គឺសម្រាប់យកទៅកសាងវត្តមួយ នៅក្នុងឃុំច្រណូក ស្រុកកំពង់លែង ប៉ុន្តែនៅពេលពិនិត្យទៅលើលិខិតស្នើសុំបិណ្ឌបាតបច្ច័យ និងស្រូវនោះ ជាលិខិតចាស់ ដែលព្រះសង្ឃអង្គនេះ យកមកកោសលប់ កែថ្ងៃខែ និងខ្លឹមសារមួយចំនួនទៀតផង ។
ដោយពិនិត្យឃើញភាពមិនប្រក្រតីបែបនេះ មន្ត្រីធម្មការ និងមន្ត្រីអាជ្ញាធរ បានធ្វើការអប់រំ ណែនាំ និងបានអោយព្រះសង្ឃអង្គនេះ ព្រមទាំងបុរស ៤នាក់ទៀត ធ្វើកិច្ចសន្យា បញ្ឈប់សកម្មភាព មិនអោយបន្តរៃអង្គាសបច្ច័យ និង តទៅទៀតឡើយ ហើយបានអនុញ្ញាតអោយវិលត្រឡប់ទៅវិញ។
នេះជាអំពើ និង ជាគំរូមួយដ៍អាក្រក់ ដែលធ្វើអោយព្រះពុទ្ធសាសនា ដែលជាសាសនា នៃរដ្ឋ និងប្រជាពលរដ្ឋកម្ពុជាទូទាំងប្រទេសគោរពប្រតិបត្តិ អាប់ឱនយ៉ាងខ្លាំង ។
