ក្រុមចោរប្លន់ប្រដាប់អាវុធមួយក្រុម មានគ្នា៥នាក់ ជិះម៉ូតូមិនចាំម៉ាក៣គ្រឿង បានធ្វើសកម្មភាពភ្ជង់ ប្លន់យកម៉ូតូស្គុបពី ពីនារី៣នាក់ ក្នុងនោះមានក្មេងស្រីអាយុប្រមាណ៦ឆ្នាំម្នាក់ បានសម្រេចដោយសុវត្ថិភាព នៅចំណុចផ្លូវបេតុងមួយកន្លែង ជាប់នឹងផ្លូវលេខ៣៧១ ( ផ្លូវសឡា ) ស្ថិតក្នុងភូមិទ្រាទី១ សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង ២០ និង ៤៥នាទីយប់ថ្ងៃ ទី១១ ខែធ្នូ ឆ្នាំ២០១៤។
ជនរងគ្រោះក្នុងអំពើភ្ជង់ប្លន់ខាងលើមានឈ្មោះ ម៉េង លៀង ភេទស្រី អាយុ៣២ឆ្នាំ មានទីលំនៅ ផ្ទះ លេខ ១៤៨ ផ្លូវលំ ភូមិមានជ័យ សង្កាត់ស្ទឹងមានជ័យ ខណ្ឌមានជ័យ មុខរបរជាកម្មកររោងចក្រ ។ ចំណែកនារីរងគ្រោះម្នាក់ទៀតរួមជាមួយក្មេងស្រីអាយុ៦ឆ្នាំផងដែរនោះមិនត្រូវបានស្គាល់អត្តសញ្ញាណ ព្រោះត្រឹមតែជាបងប្អូន មិនមែនជាម្ចាស់ម៉ូតូ ដូច្នេះហើយសុំមិនបញ្ចេញឈ្មោះ ។
យោងតាមសម្តីរៀបរាប់របស់នារីរងគ្រោះបានអោយដឹងថា មុនពេលមានហេតុការណ៍កើត ឡើង គឺ ដំបូងឡើយរូបខ្លួនទើបតែចេញមកពីហូបការបងប្អូននៅម្តុំសំណង់១២ ដោយជិះម៉ូតូមួយគ្រឿង ម៉ាកស្គុបពី ស៊េរីឆ្នាំ២០១៥ ពណ៌ក្រហម ពាក់ស្លាកលេខភ្នំពេញ 1CR-2122 រួមដំណើរជាមួយប្អូនជីដូន មួយរបស់ខ្លួន និងក្មេងស្រីម្នាក់ទៀត ដោយធ្វើដំណើរតាមបណ្តោយផ្លូវ៣៧១ ( ផ្លូវសឡា )បំណងឆ្ពោះត្រឡប់ទៅលំនៅឋាន របស់ខ្លួនវិញ លុះមកដល់ចំណុចកើតហេតុ ដែលជាចំណុចស្ងាត់ច្រងំផង នោះស្រាប់តែ មានជន សង្ស័យ ៤នាក់ ជិះម៉ូតូ២គ្រឿងមិនចាំម៉ាក បានជិះមកកាក់ចំពីមុខ ហើយជន ជនសង្ស័យម្នាក់
ក្នុងចំណោមបក្សពួក បាន ចុះទៅដកសោរម៉ូតូនារីរងគ្រោះដោយប្រាប់អោយចុះពីលើ ម៉ូតូ ឃើញស្ថានការណ៍ដូចនេះ នារីរងគ្រោះ ក៏បានលោតចុះពីលើម៉ូតូ ហើយរត់ចេញពីផ្លូវបេតុងខាងលើ ទៅផ្លូវលេខ៣៧១បំណងស្រែកហៅអោយ គេឯង ជួយប៉ុន្តែខណៈរត់ទៅដល់ផ្លូវលេខ៣៧១ហើយនោះស្រាប់តែត្រូវជនសង្ស័យម្នាក់ទៀតដែលត្រូវបក្សពួករបស់ក្រុមជនសង្ស័យទាំង៤នាក់ខាងលើ កំពុង តែអង្គុយលើម៉ូតូមួយគ្រឿងម៉ាកស្មាសរ៉េវវ៉ូ ក្នុងគោលបំណង ចាំបិទ គូទគ្នីគ្នារបស់ខ្លួននោះ បានដក កាំភ្លើងខ្លីចេញពីចង្កេះរបស់ខ្លួន ភ្ជង់ទៅលើនារីរងគ្រោះ ដោយគំរាមមិន អោយ ស្រែក ផ្តេសផ្តាស បើកពុំ ដូច្នោះទេរូបគេនឹងបាញ់សម្លាប់ចោល។
ភ្លាមៗនោះ ក្រោយពីបានគំរាមនារីរងគ្រោះ មិន អោយស្រែក ឆោរឡោររួចហើយ ក្រុមជនសង្ស័យបានឡើងជិះម៉ូតូនារីរងគ្រោះ ចេញទៅបាត់សុវត្ថិភាព ចំណែកនារី រងគ្រោះនិង បងប្អូនដែលរួមដំណើរជាមួយ បានត្រឹមតែអង្គុយភ័យញ័រដៃ ញ័រជើង និយាយ អ្វីក៏មិនចេញ។ក្រោយកើតហេតុ សមត្ថកិច្ចមូលដ្ឋានបានចុះអន្តរាគមន៍ដល់កន្លែងកើតហេតុភ្លាមៗ និងនាំនារីរង គ្រោះ ទៅធ្វើការដាក់ពាក្យបណ្តឹងនៅប៉ុស្តិ៍រដ្ឋបាលនគរបាលស្ទឹងមានជ័យដើម្បីកំណត់មុខសញ្ញាជន សង្ស័យបន្ត ។ ចំណែកនារីរងគ្រោះត្រូវបានសាច់ញាតិមកទទួលយកទៅគេហដ្ឋានវិញ ។
