សព្វថ្ងៃគេឃើញមានមេកន្ទុយលេខធំៗនៅក្នុងស្រុកអន្លង់វែង ដល់ទៅប្រាំបីនាក់ គ្រាន់តែនៅក្នុងផ្សារចាស់អន្លង់វែងមានមេធំៗដល់ទៅបីនាក់ដែលមានកូនកញ្ច្រែងពង្រាយទូទាំងស្រុកដែលមានបំរើសេវាដល់ផ្ទះដល់ទៅរាប់ពាន់នាក់ឯណោះ។
ភាពអាណាធិបតេយ្យល្បែងស៊ីសងខាងលើត្រូវបានប្រជាពលរដ្ឋរិះគន់យ៉ាងខ្លាំង និងដាក់ងារថាជាល្បែងមហាចោរធ្វើស្រែលើខ្នងរាស្ត្រគ្មានកេរ្តិ៍ខ្មាសដែលមានការឃុបឃិតពីអាជ្ញាធរ និង សមត្ថិកិច្ចមូលដ្ឋាន។ ប្រជាពលរដ្ឋនៅក្នុងស្រុកអន្លង់វែងកំពុងតែមានការត្អូញត្អែថាបន្ទាប់ពីអាជ្ញាធរក៏ដូចជាស្ថាប៍នមានសមត្ថកិច្ចគ្រប់លំដាប់ថ្នាក់ គ្មានចំណាត់ការបង្ក្រាប និងលប់បំបាត់ 
រាល់ល្បែងស៊ីសងខាងលើ បានធ្វើឲ្យជីវភាពប្រជាពលរដ្ឋ នៅក្នុងស្រុករងការវិនាស និងអន្តរាយជាបន្តបន្ទាប់ ។ បើតាមការលើកឡើង របស់លោក ញ៉ែម ប៊ុនចាន់ មេភូមិអូរតាមែង ប្រជាពលរដ្ឋក្នុងភូមិរបស់លោកមួយចំនួន ត្រូវលក់អស់ផលដំណាំ ដែលមិនទាន់បានប្រមូលផល អ្នកខ្លះទៀតប្រកាសលក់ដីស្រែចំការកេរ្តិ៍អាកររបស់ខ្លួន ដោយត្អូញត្អែប្រាប់លោកថា ចាញ់ល្បែងឆ្នោតកន្ទុយលេខអស់ទៅហើយ ។
បើតាមលើកឡើងរបស់អ្នកកត់កន្ទុយលេខដែលបំរើសេវាដល់ផ្ទះ និង មេឆ្នោតធំបានឲ្យដឹងថាបើមិនមានការទំនាក់ទំនងល្អជាមួយអាជ្ញាធរ ក៍ដូចជាសមត្ថកិច្ចមូលដ្ឋានគឺមិនអាចប្រព្រឹត្តទៅយ៉ាងរលូនបែបនេះទេហើយការបញ្ឈប់ដែលមានការរអាក់រអួលរយ:ពេលខ្លីកន្លងមកគឺខាងសមត្ថកិច្ចក៍ដូចជាអាជ្ញាធរមូលដ្ឋានគ្រាន់តែចង់ប្រមូលមេឆ្នោតទាំងអស់មកជួបជុំគ្នាដើម្បីចរចាលើតុមូលតែប៉ុណ្ណោះមិនមែនមានគោលបំណងចង់លុបបំបាត់នោះទេ។
ទោះជាឯកឧត្តម ស ថាវី អភិបាលនៃគណ:អភិបាលខេត្តឧត្តរមានជ័យបានប្រជុំគណៈបញ្ជាការឯកភាព ដាក់បទបញ្ជាឲ្យអាជ្ញាធរក៏ដូចជាសមត្ថកិច្ចមូលដ្ឋានចុះអនុវត្តការងារទាំងអស់នេះដោយប្រគល់តួនាទីឲ្យទៅសមត្ថកិច្ចមូលដ្ឋានជាពិសេសគឺប៉ូលីសជាអ្នកទទួលខុសត្រូវតែរហូតមកដល់ពេលនេះបទបញ្ជារបស់ឯកឧត្តមអភិបាលខេត្តមិនត្រូវបានមន្ត្រីក្រោមឱវាទ ក៏ដូចជាសមត្ថកិច្ចមូលដ្ឋានមិនត្រូវបានអនុវត្តតាមបទបញ្ជារបស់ ឯកឧត្តមនោះទេ ហើយប្រជាពលរដ្ឋដែលទទួលរងគ្រោះដោយសាល្បែងស៊ីសងក៏មានការត្អូញត្អែជាបន្តបន្ទាប់ផងដែរ។
លោកស៊ឹម វណ្ណៈ អធិការដ្ឋាននគរបាលស្រុកអន្លង់វែង បានបញ្ជាក់ប្រាប់ក្រុមការងារយើងតាមទូរស័ព្ទថា លោកពុំដែលឃើញសកម្មភាពល្បែងស៊ីសងខាងលើនោះទេ ដោយគេលេងតាមប្រព័ន្ធទូរស័ព្ទ និងប្រព័ន្ធអ៊ីធ័រណេតហើយសកម្មភាពដែលកំពុងតែប្រព្រឹត្តយ៉ាងគគ្រឹកគគ្រេង នៅពេលនេះចាំលោកឲ្យមន្ត្រីក្រោមឱវាទចុះទៅពិនិត្យ។ លោក ងួន ទ្ធិរិទ្ធ មេបញ្ជាការមូលដ្ឋានកងរាជអាវុធហត្ថស្រុកអន្លង់វែង បានបញ្ជាក់ប្រាប់ក្រុមការងារយើង
តាមទូរស័ព្ទថា ជុំវិញម្ចាស់ល្បែងស៊ីសងខាងលើលោកបានកោះហៅមកធ្វើកិច្ចសន្យាឲ្យបញ្ឈប់ ១លើករួចមកហើយតែរហូតមកដល់ពេលនេះលោកក៏មិនបានដឹងដែរ ៕
