មន្ត្រីរាជរដ្ឋាភិបាលជាន់ខ្ពស់ជាច្រើននាក់ កាលពីថ្ងៃទី១២ ខែធ្នូឆ្នាំ២០១៤ បានចូលរួម លើកទី១ ប្រកួតកីឡាវាយកូនហ្គោលជាមិត្តភាព នៅរមណីដ្ឋានទេសចរណ៍ តារាសាគរ (កោះស្តេច) ខេត្តកោះកុង ក្រោមអធិបតីភាពដ៏ខ្ពង់ខ្ពស់សម្តេច ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ។
លោក យ៉ាង ជាស៊ាង អភិបាលក្រុមហ៊ុន Union Delverloperment Group Cambodia, បានថ្លែងអំណរគុណយ៉ាងជ្រាលជ្រៅ ដល់មន្ត្រីជាន់ខ្ពស់ជាកីឡាករ ប្រកួតដែលបានចូលរួមជាលើកដំបូង លើទីលាន វាយកូនហ្គោល ដ៏ថ្មីស្រឡាងមួយនេះ ។ពិធីប្រារព្ធការប្រកួតនេះ ជាការចូលរួមចំណែក ផ្សព្វផ្សាយនូវគំរោងតារាសាគរ និង ទេសចរណ៍ នៅខេត្តកោះកុងទាំងមូល ។ 
តំបន់កោះស្តេចទំហំដីរាប់ពាន់ហិតា ត្រូវបានចុះកិច្ចសន្យាជួលទីតាំង សំរាប់អភិវឌ្ឍន៍ជា មជ្ឈ មណ្ឌលសេដ្ឋកិច្ច នៅទីនេះ អស់រយៈពេល ៦ឆ្នាំ មកហើយ ។ទីនេះនឹងក្លាយទៅជាតំបន់ វិស្សមកាលទេសចរណ៍លំហែកាយមួយ ស្ថិតនៅតំបន់ឆ្នេរ ដ៏ស្រស់ស្អាតប្រចាំតំបន់អាស៊ីអាគ្នេយ៍ យើងនេះ នៅពេលអនាគត។
លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ទីលានវាយកូនហ្គោលនេះ មានភាពសំបូរបែប នៃធនធានធម្មជាតិ និង វប្បធម៌នៅតាមបណ្តាឆ្នេរសមុទ្រ និង កោះនានា គឺជាឧត្តមភាព ប្រកួតប្រជែង Competitive Avantage ក្នុងការអភិវឌ្ឍន៍វិស័យទេសចរណ៍ ពិសេសអេកូទេសចរណ៍តំបន់ឆ្នេរ រាប់ទាំងអេកូទេសចរណ៍ខ្នាតធំ និង តូច ។ សក្តានុពលនេះ បានធ្វើឲ្យតំបន់ឆ្នេរសមុទ្រកម្ពុជា កំពុងទទួលស្វាគមន៍ កំណើននៃការមកដល់ទេសចរណ៍ជាតិ និង អន្តរជាតិ ។ ពិតណាស់ថា ក្រោយពេលដែលឆ្នេរសមុទ្រកម្ពុជា បានដាក់បញ្ចូលជាសមាជិក ក្លឹបឆ្នេរសមុទ្រដែលស្អាតជាងគេបំផុត លើសកលលោកនេះ ចំនួនភ្ញៀវទេសចរណ៍អន្តរជាតិមានការកើនឡើង ។
នៅឆ្នាំ២០១៣កន្លងទៅ ចំនួនទេសចរណ៍អន្តរជាតិ ដែលមកទស្សនាតំបន់ឆ្នេរ មានចំនួនជាង ៥០ម៉ឺននាក់ កើនឡើងជាង ៥៣ភាគរយ និង ទេសចរណ៍ក្នុងស្រុកប្រមាណជាង២លាននាក់ ។ សំរាប់រយៈពេល៩ខែដើមឆ្នាំ២០១៤នេះ ចំនួនទេសចរណ៍អន្តរជាតិដែលមកទស្សនាតំបន់ឆ្នេរមានចំនួនជាង ៤២ម៉ឺននាក់ កើនឡើង៧ភាគរយ ធៀបនឹងរយៈពេលដូចគ្នាឆ្នាំ២០១៣ ។
តាមការព្យាករណ៍ តំបន់ឆ្នេរសមុទ្រកម្ពុជាអាចនឹងទទួលបានទេសចរណ៍ អន្តរជាតិប្រមាណ២លាននាក់ នៅឆ្នាំ២០២០ រួមចំណែកយ៉ាងខ្លាំងក្នុងការអភិវឌ្ឍន៍សេដ្ឋសង្គម និង លើកកំពស់កំរិតជីវភាពរស់នៅរបស់ប្រជាពលរដ្ឋនៅតំបន់ឆ្នេរ ។
សម្តេច អគ្គមហាពញាចក្រី ហេង សំរិន ប្រធានរដ្ឋសភា បានចាត់ទុកគំរោងវិនិយោគ រមណីដ្ឋានទេសចរណ៍ ដ៏ធំរបស់ក្រុមហ៊ុននេះត្រូវបានប្រសិទ្ធនាមថារមណីដ្ឋានទេសចរណ៍តារាសាគរ កោះស្តេច និង ដែលសំរេចបាននូវសមិទ្ធិផល យ៉ាងច្រើននាពេលនេះ ហើយដែលទៅថ្ងៃអនាគត រមណីដ្ឋានទេសចរណ៍នេះ នឹងក្លាយជារមណីដ្ឋានទេសចរណ៍មួយ ដ៏ទាក់ទាញ នៅតំបន់ឆ្នេរសមុទ្រកម្ពុជា រួមចំណែក អភិវឌ្ឍន៍សេដ្ឋកិច្ចសង្គមកម្ពុជា ពិសេសលើកកំពស់កំរិតជីវភាពរស់នៅរបស់ប្រជាពលរដ្ឋក្នុងតំបន់ ខ្ញុំសូមជូនពរឲ្យក្រុមហ៊ុន ជោគជ័យដ៏ត្រចះត្រចង់ ៕
