ភ្នំពេញ ៖ រថយន្តហាំមឺមួយគ្រឿងបានប៉ះកៀររថយន្តកាមរីឆ្លាមបណ្តាលឲ្យរងកាខូចខាតបន្តិចបន្តួចហើយរថយន្តទាំងពីរនេះបានឈប់នៅកណ្តាលផ្លូវ បង្កឲ្យមានការស្ទះចរាចរណ៏ជិត១ម៉ោង កាលពីវេលាម៉ោង ៩និង៥០នាទីយប់ ថ្ងៃទី១៣ មីនា ២០១៤នៅចំណុចស្តុបអាងទឹកតាមបណ្តោយផ្លូវលេខ២១៥កែងផ្លូវលេខ ២៣០ ក្នុងសង្កាត់ផ្សារដើមគរ ខណ្ឌទួលគោក ។
តាមប្រភពព័ត៌មាននៅកន្លែងកើតហេតុបានឲ្យដឹងថានៅមុនពេលកើតហេតុ គេបានឃើញ រថយន្តហាំមឺមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2Y-0330 បើកតាមបណ្តោយផ្លូវ២១៥ក្នុងទិសដៅពីជើងមកត្បូង មកដល់កែងផ្លូវ លេខ២៣០ ក៏បានគៀររថយន្តកាមរីឆ្លាម ពណ៌ស្ករ ពាក់ស្លាកលេខ ភ្នំពេញ 20-1105 ជិះក្នុងទិសដៅពីលិច ទៅកើត បត់ស្តាំពេលនោះកង់រថយន្តហាំមឺ បានប៉ះនិងចំហៀងខាងឆ្វេងរថយន្តកាមរីឆ្លាមឆ្កួតថ្នាំរថយន្តកាមរីឆ្លាមតិចតួច បង្កអោយមានការស្ទះចរាចរយ៉ាងខ្លាំងព្រោះតែរថយន្ត២គ្រឿងនេះឈប់នៅទទឹងផ្លូវតែម្ដង។
ក្រោយពេលកើតហេតុសមត្ថកិច្ចបានចុះអន្តរាគមន៍សំរួលចរាចរហើយក៏ធ្វើការសម្របសម្រួលអោយម្ចាស់រថយន្តទាំងពីរបញ្ចប់រឿងដោយគ្មានអ្នកណាចេញថ្លៃសងអ្នកណាឡើយ៕
