ខេត្តសៀមរាប ក្រោយពីការដាក់កំរិតរបស់អាជ្ញាធរខេត្តសៀមរាប អោយរុះរើតូបលក់ដូរចេញអោយអស់ពីទីតាំងចាស់ត្រឹមថ្ងៃទី១៧ ខែធ្នូនេះ ក្រុមអ្នកលក់ដូរនៅផ្សាររាត្រី ឃ្យុងយូបានសម្តែងនូវការមិនសប្បាយចិត្តជាខ្លាំង ដោយនិយាយថាការនោះនឹងធ្វើអោយពួកគេមានការខាតបង់ប្រយោជន៍។
គួរបញ្ជាក់ថានៅក្នុងសេចក្តីជូនដំណឹងចុះថ្ងៃទី៩ ខែធ្នូនេះ ដែលបានចុះហត្ថលេខាដោយអភិបាលក្រុងទើបចូលកាន់ដំណែងលោកស៊ូ ប្លាតុង ដែលមានបួនចំណុចនោះបានដាក់ឱសានវាទអោយអាជីវកទាំងអស់ត្រឹមថ្ងៃទី១៧ខែធ្នូ ត្រូវរុះរើចេញអោយអស់ពីទីតាំងនេះនូវសំណង់នានាដូចជាតូបរោងគ្រែតុកៅអីរនាបបង្គោល។ល។ រួមទាំងឧបករណ៍ល្បែងក្មេងលេងគ្រប់ប្រភេទ។ ត្រូវបានអនុញ្ញាតិអោយដាក់លក់ដូរចាប់ពីម៉ោង៤ល្ងាចរហូតដល់ម៉ោង១២យប់។
នៅពេលបញ្ចប់ការលក់ដូរអាជីវកទាំងអស់ត្រូវរុះរើទីតាំង និងសម្ភារៈឧបករណ៍លក់ដូរចេញ អោយអស់ពីចំណុចផ្សាររាត្រី។ ត្រូវបានរក្សាទុកផ្លូវធំកណ្តាលសំរាប់សំរួលការធ្វើដល់ចរាចរជាទូទៅ និងរៀបចំចំណែកសំរាប់ជាចំណត។ រាល់ការលក់ដូទាំងអស់ត្រូវទៅតាំងលក់នៅតាមបណ្តោយផ្លូវអមសងខាងប្រឡាយវិញតាមផលរបរនិងទីតាំងដែលក្រុមការងារកំណត់អោយដោយផ្អែកតាមស្តិតិដែលបានស្រង់កាលពីខែឧសភាឆ្នាំ២០១៤។
ក្រុមអាជ្ញាធរបាននិយាយនៅក្នុងជំនួបជាមួយក្រុមអាជីកទាំងនោះ កាលពីថ្ងៃទី១៣ខែធ្នូ ថាពួកគេបានរៀបចំរួចហើយនៅទីតាំងថ្មីសំរាប់ដោះដូរជូនអ្នកលក់ដូរទាំងនោះ ប៉ុន្តែទោះជាយ៉ាងនោះក្តីក៏ក្រុមអ្នកលក់ដូរទាំងនោះបាននិយាយថាវាមិនមែនជារឿងងាយស្រួលសំរាប់ពួកគេទេ ចំពោះការរើពីកន្លែងមួយទៅកន្លែងមួយទៀតនោះ ដោយហេតុថាវានឹងត្រូវចំណាយសោហ៊ុយថែមទៀតចំពេលដែលមុខរបររបស់ពួកគេសព្វថ្ងៃមិនសូវរកផលចំណេញបានច្រើនផងនោះ។
ពួកគេបានសំណូមពរថា គួរតែមានការរៀបចំសណ្តាប់ធ្នាប់នៅនឹងកន្លែងចាស់វិញល្អជាងកុំអោយពួកគេត្រូវចំណាយថវិការច្រើនសំរាប់ការរុះរើ ព្រោះថាលុយកាក់ដែលពួកគេយកមករកស៊ីនៅទីនេះគឺបានមកពីកម្ចីរពីធនាគារ រឺអង្គការ ផ្សេងៗដែលពួកគេចាំបាច់ទូទាត់បង់ទៅវិញនៅរៀងរាល់ខែ។
ក្រុមអាជីវកទាំងនោះបាននិយាយថា ការរុះរើចំពោះតូបតូចតាចនោះវាមិនអីទេតែតូបខ្លះធំ ពិសេសទៀតនោះគឺទីតាំងល្បែងក្មេងលេងដូចជាទោងយោលរទះ ភ្លើងអគ្គិសនី ដែលភាគច្រើនប្រើសុទ្ធតែគ្រឿងដែកធំៗនិងធ្ងន់ប្រើពេលតម្លើងយូរថ្ងៃនោះតើនឹងមានការលំបាកយ៉ាងណាសំរាប់ពួកគេ។
ក្រុមអាជីវកទាំងនោះបាននិយាយថា ពួកគេមិនប្រឆាំងជំទាស់ទៅនឹងគោលការណ៍របស់អាជ្ញាធរខេត្តទេ តែអាជ្ញាធរខេត្តក៏ត្រូវមានការគិតអោយបានច្រើនពីប្រយោជន៍របស់
ប្រជាពលរដ្ឋក្រីក្រផងដែរ។ផ្សាររាត្រីអង្គរឃ្យុងយូបានបើកដំណើរការលក់ដូជាច្រើនឆ្នាំមកហើយ ដែលគិតមកដល់ពេលនេះគឺមានប្រមាណជាង៥០០តូប។ ផ្សារមួយនេះបច្ចុប្បន្នជាទីកន្លែងកំសាន្តដ៏មានប្រជាប្រិយមួយសំរាប់គ្រួសារប្រជាពលរដ្ឋក្នុងខេត្តសៀមរាប
ក្នុងចំណោមកន្លែងសំរាកកំសាន្តជាច្រើនទៀត៕ ដោយខេងឧត្តម
