ខេត្តកោះកុង ៖ ក្នុងរយៈពេល៣ថ្ងៃ នៃពិធីបុណ្យសមុទ្រ ពោលគឺចាប់ពីថ្ងៃទី១២ រហូតដល់ថ្ងៃទី១៤ ខែធ្នូ ឆ្នាំ២០១៤ សមត្ថកិច្ចខេត្តកោះកុង បង្ក្រាប និងចាប់ខ្លួនជនសង្ស័យជាចោរលួច ចោរប្លន់ បានរហូតទៅដល់២៣នាក់ ក្នុងនោះមានស្រី៩នាក់ និងរឹបអូសរថយន្ត
ចំនួន២គ្រឿង។
យោងតាមមន្ត្រីជាន់ខ្ពស់ នៃស្នងការដ្ឋាននគរបាលខេត្តកោះកុងបានឲ្យដឹងថា ដោយមានកិច្ចសហការណ៍ដឹកនាំដោយលោកវរសេនីយ៍ឯក លឹម ចាន់តាណា អនុប្រធាននាយកដ្ឋានព្រហ្មទណ្ឌ នៃក្រសួងមហាផ្ទៃ សមត្ថកិច្ចក៏ក្របួចចាប់បានក្រុមចោរឆក់ លូកហោប៉ៅ និងកាត់ខ្សែ.ក ទាំងសំបុក មានគ្នាចំនួន១៧នាក់ ជិះរថយន្តទួរីសស៊ាំយ៉ុងមួយគ្រឿង មកធ្វើសកម្មភាពនៅក្នុងពិធីបុណ្យសមុទ្រនេះ។ បន្ទាប់សមត្ថកិច្ចក៏ឈានទៅចាប់ខ្លួនមេក្លោងចំនួន២នាក់ទៀត ដែលមានឈ្មោះ ចាន់ សី ភេទស្រី អាយុ៣១ឆ្នាំ , ឈ្មោះ ឃុន រ៉ាឌី ភេទប្រុស អាយុ២៤ឆ្នាំ ព្រមទាំងរឹបអូសបានរថយន្តឡិចស៊ីRX 300 មួយគ្រឿងទៀត។ ក្រៅពីក្រុមចោរលួច ចោរឆក់ ទាំងសំបុកនោះ សមត្ថកិច្ចចាប់បានក្រុមមុខសញ្ញាចោរប្លន់ចំនួន៤នាក់ផ្សេងទៀតផងដែរ។
ជាមួយគ្នានេះ សមត្ថកិច្ចក៏បានអំពាវនាវដល់ប្រជាពលរដ្ឋ ដែលបានបាត់បង់ទ្រព្យសម្បត្តិដោយអំពើចោរកម្មនៅពេលមកលេងបុណ្យសមុទ្រ សូមមកដាក់ពាក្យបណ្តឹង និងមកផ្ទៀងផ្ទាត់វត្ថុតាង ដែលសមត្ថកិច្ចដកហូតបាន៕
