បាត់ដំបង: មានប្រជាពលរដ្ឋប្រមាណជាង500នាក់ហើយដែលកំពុងធ្វើញត្តិផ្តិតមេដៃសុំអោយគ្រូសូត្រឆ្វេង និងគ្រូសូត្រស្តាំដែលត្រូវបានធម្មការប្រកាសអោយចេញពីវត្តបវេល ក្នុងស្រុកបវេលខេត្តបាត់ដំបងទៅនៅវត្តផ្សេងទៀតកាលពីថ្ងៃទី 14-12-14 នោះត្រូវបានប្រជាពលរដ្ឋធ្វើការប្រឆាំងតវ៉ាដោយទាមទាអោយព្រះសង្ឃទាំងពីរអង្គនោះវិលចូលមកគង់ក្នុងវត្តនេះវិញ. ។
គួរបញ្ជាក់ថាកន្លងមកមានរឿងអាស្រូវជាច្រើនដែលពាក់ព័ន្អនឹងលុយកាក់បានផ្ទុះចេញ
ពីក្នុងវត្តបវេល ស្ថិតក្នុងភូមិបវេល1 ឃុំបវេល ដោយសារតែមានការកេងកិបទៅលើជំនួយដែលពុទ្ធបរិស័ទទាំងក្នុង និងក្រៅប្រទេសបានឧបត្ថម្ភក្នុងការកសាងសាលាឆាន់ ដ៏ធំមួយធ្វើអំពីថ្មរហូតដល់ម្ចាស់ជំនួយដឹងទើបធ្លាយរឿងអាស្រូវនេះតែម្តង. ។
បើតាមការអះអាងពីអុំស្រី កាន់ នៅ អាយុ66ឆ្នាំ បានរៀបរាប់ថា កន្លងមកអុំស្រីក៏ធ្លាប់
បានជួយឧបត្ថម្ភក្នុងការកសាងសាលាឆាន់នេះអស់រាប់លានរៀលដែរប៉ុន្តែវាមិនឃើញសម្មិទ្ធិផលនេះចេញជាផ្លែផ្កាទាល់តែសោះហើយពីមួយថ្ងៃទៅមួយថ្ងៃការរៃអង្គាសលុយដើម្បីសាងសង់សាលាឆាន់បង្ហើយនៅតែបន្តសកម្មភាព ប៉ុន្តែឯការកសាងគឺត្រូវបានអសកម្មទាំងអស់ ទើបធ្វើអោយមានការតវ៉ា ទាមទាអោយគណ:កម្មការវត្តដែលមាននាទីជាប្រធានគណ:កម្មការវត្តបវេលផង និងជាប្រធានគណ:កម្មការ អាចារ្យនៅទូទាំងស្រុកបវេលផង អោយចេញមុខមកដោះស្រាយ និងបំភ្លឺឡើងវិញអំពីបញ្ហាលុយកាក់ ដែលសរុបទាំងអស់ប្រមាណជា10.000 ដុល្លារនោះវាបាត់ទៅណា? ហើយហេតុអ្វីបានជាមិនព្រមសាងសង់សាលាឆាន់បន្តព្រោះបញ្ហានេះអាចមានការពាក់ព័ន្ធជាមួយនឹងព្រះចៅអធិការវត្តផង. ។
ប្រភពជាច្រើនបានទំលាយរឿងនេះអោយកម្ពុជាថ្មីដឹងថា ដោយមានការឆ្កឹះឆ្កៀល
ពីសំណាក់គ្រូសូត្រឆ្វេង និងគ្រូសូត្រស្តាំខ្លាំងពេកទើបធ្វើអោយមានការថ្នាំងថ្នាក់ចិត្តរវាងព្រះចៅអធិការនិងព្រះសង្ឃទាំងពីរអង្គនេះ ហើយក៏មិនដឹងថាប្រធានគណ:កម្មការរូបនេះទៅញុះញង់យ៉ាងម៉េចទើបបានជាខាងធម្មការទៅប្រកាសអោយព្រះសង្ឃទាំងពីរអង្គនេះត្រូវផ្លាស់ប្តូរទៅគង់នៅវត្តភ្នំសំពៅក្នុងទឹកដីស្រុកបាណន់វិញ. ។
នៅក្នុងខណ:នោះដែរក៏មានប្រជាពលរដ្ឋជាច្រើនបានប្រមូលផ្តុំគ្នានៅក្នុងទីអារាមនេះដើម្បី
ទាមទា ព្រមទាំងបានផ្តិតមេដៃធ្វើញត្តិសុំអោយសង្ឃទាំងពីរអង្គនេះវិលចូលមកគង់នៅក្នុងទីអារាមនេះវិញ ប៉ុន្តែរហូតមកដល់ពេលនេះកម្ពុជាថ្មីបានទទួលដំណឹងថាលោកគ្រូសូត្រឆ្វេងព្រះនាម ជូ យ៉ុងដែលមានព្រះជន្ម 34វស្សាត្រូវបាននិមន្តដល់ទីក្រុងភ្នំពេញហើយដើម្បីស្វែងរកការអន្តរាគមន៍ ចំណែកលោកគ្រូសូត្រស្តាំព្រះនាម គ្រុយ សុខា ព្រះជន្ម 40វស្សាគឺស្ថិតនៅក្នុងខេត្តបាត់ដំបងនៅឡើយ។រហូតមកទល់នឹងពេលនេះការប្រឆាំងតវ៉ារបស់ប្រជាពលរដ្ឋនៅតែបន្តធ្វើនៅក្នុងទីអារាមនោះនៅឡើយទេ ឯការរកដំណោះស្រាយរបស់មន្ទីរធម្មការយើងមិនទាន់បានទទួលនៅឡើយទេ. ៕
