កំពង់ស្ពឺ ៖ នៅប្រទេសកម្ពុជានាពេលបច្ចុប្បន្ននេះ មានអ្នកស្លាប់ដោយគ្រោះថ្នាក់ចរាចរណ៍ជាមធ្យម ប្រមាណ៥ទៅ៦នាក់ក្នុងមួយថ្ងៃៗ ដែលជាបញ្ហាមួយធ្វើឲ្យមានការព្រួយបារម្មណ៍យ៉ាងខ្លាំង ប្រសិនបើគ្មានវិធានការទប់ស្កាត់ទាន់ពេលវេលាទេនោះ តាមការព្យាករណ៍ នៃគ្រោះថ្នាក់ចរាចរណ៍
ឆ្នាំ ២០២០ អាចមានចំនួនអ្នកសា្លប់កើនឡើងរហូតដល់៣២០០នាក់ជាក់ជាមិនខាន ។
រាល់គ្រោះថ្នាក់ចរាចណ៍ ដែលបានកើតមានឡើងជារៀងរាល់ថ្ងៃនេះ បណ្តាលមកពីអ្នកបើកបរទោចក្រក្រយានយន្ត និងយានយន្តគ្រប់ប្រភេទមិនសូវគោរពច្បាប់ជាពិសេសបើកបរលើសល្បឿនកំណត់ ៤៦ភាគរយ បើកបរក្រោមឥទ្ធិពលគ្រឿងស្រវឹង១៥ភាគរយ និងមិនពាក់មួកសុវត្ថិភាព ក្នុងចំណោមអ្នកគ្រោះថ្នាក់ នៃអ្នកជិះម៉ូតូមានតែ២០ភាគរយប៉ុណ្ណោះបានពាក់មួកការពារពេលជួបគ្រោះថ្នាក់ ។ ដែលដូច្នេះហើយទើបសង្គមស៊ីវិល ក៍ដូចរាជរដ្ឋាភិបាល បានជំរុញដល់រដ្ឋសភាជាតិធ្វើវិសោធណៈកម្មច្បាប់ចរាចរណ៍ផ្លូវគោកថ្មី ដើម្បីរឹតបណ្តឹងកាអនុវត្តន៍ច្បាប់ ។
លោកឈាង វ៉ន់ អគ្គលរខាធិការរង នៃគណៈកម្មាធិការជាតិ សុវត្ថិភាពចារចណ៍ផ្លូវបានប្រាប់ឲ្យដឹងកាលពីពេលថ្មីៗនេះថា តាមការសិក្សារបស់គណៈកម្មាធិការជាតិសុវត្ថិភាពចរចណ៍បានបង្ហាញពីអ្នកស្លាប់ក្នុងឆ្នាំ ២០១៤ មានចំនួនជាង២០០០នាក់ បើប្រៀបធៀបឆ្នាំ ២០១៣មានការកើនឡើង ។ លោកបន្តថា ស្ថានភាពគ្រោះថ្នាក់ចរាចរណ៍ ក្នុងប្រទេសកម្ពុជាគឺ៖ បណ្តាលមកពីយើងទាំងអស់គ្នាមិនគោរពច្បាប់ ដូចជាបើកបរលឿនលើល្បឿនកំណត់ បើកបរក្រោមឥទ្ធិពលគ្រឿងស្រវឹង មិនបានពាក់មួកសុវត្ថិភាព មិនពាក់ខ្សែរក្រវាត់ការពារតែម្តង ។
លោកឈាង វន់បានបន្តថា បច្ចប្បន្ននេះនៅប្រទេសកម្ពុជា ក្នុងមួយថ្ងៃមានអ្នកស្លាប់ដោយករណីគ្រោះថ្នាក់ចរាចរណ៍ប្រមាណ ៥នាក់ និងអ្នករងរបួសជាច្រើននាក់ផ្សេងទៀត ហើយបើក្នុងពេលមានបុណ្យជាតិធំៗដូចជាអុំទូក ភ្ជុំបិណ្ឌ ចូលឆ្នាំ មានអ្នកស្លាប់រហូតដល់ ៨នាក់ក្នុងមួយថ្ងៃ ។ លោកបន្តថា ក្នុងមួយឆ្នាំៗមានការខាតបង់ថវិការជាតិប្រមាណជាង ៣០០លានដុល្លាអាមេរិច ដែលធ្វើឲ្យប៉ះពាល់លើសេដ្ឋកិច្ចគ្រួសារ សង្គមជាតិ និងបាត់បង់ធនធានមនុស្សតែម្តង ។
លោកវេជ្ជបណ្ឌិតសៅ សុវណ្ណរតនៈ មន្ត្រីបង្ការអំពើហឹង្សាការរងរបួស និងសុវត្ថិភាពចរាចណ៍ អង្គការសុខភាពពិភពលោកបានបានថ្លែងថា ករណីគ្រោះថ្នាក់ចរាចរណ៍ជាកកត្តាមួយដែលធ្វើឲ្យយើងទាំងអស់គ្នាមានការព្រួយបារម្មណ៍យ៉ាងខ្លាំង ហើយក្នុងចំណោមអ្នកគ្រោះថ្នាក់ចរាចរណ៍ភាគច្រើនប៉ះពាល់ផ្នែកក្បាល ព្រោះជនរងគ្រោះមិនបានពាក់មួកសុវត្ថិភាព ដូច្នេះបួកសុវត្ថិភាពមានសារៈសំខាន់ណាស់ជួយការពារអាយុជីវិតយើងពេលកើតមានគ្រោះថ្នាក់ចរាចរណ៍ ។ លោកបន្តថា អ្នករបួសដោយគ្រោះថ្នាក់ចរាចរណ៍ កាលពីអំឡុងឆ្នាំ ២០១៣កន្លងមកនេះ មានអ្នករបួសចំនួន ៥៦៧១នាក់ក្នុងនោះប៉ះពាល់ក្បាល ៤៤ភាគរយ និងបាក់ឆ្អឹង ២១ភាគរយថែមទាំងបន្សល់ទុកជនពិការ១០ភាគរយផងដែរ ។
លោកវេជ្ជបណ្ឌិតសៅ សុវណ្ណរតនៈ តំណាងអង្គការសុខភាពពិភពលោក បានបញ្ជាក់ថា ក្នុងចំណោមអ្នកស្លាប់ដោយសារគ្រោះថ្នាក់ចរាចរណ៍រាប់ពាន់នាក់ ក្នុងមួយឆ្នាំៗនោះភាគច្រើនពួកគាត់មានអាយុចាប់ពី ១៥ឆ្នាំទៅ២៩ឆ្នាំ ដែលធ្វើឲ្យខាត់បង់សេដ្ឋកិច្ចគ្រួសារ សេដ្ឋកិច្ចជាតិ បាត់បង់ពលកម្ម ។
លោកមឿង ឈានវិទ្ធ នាយកវិទ្យាស្ថានកម្ពុជាសម្រាប់សិក្សាផ្នែកព័ត៌មានបាននិយាយថា ក្នុងស្ថានភាពគ្រោះថ្នាក់ចរាចរណ៍នាពេលបច្ចុប្បន្ននេះវាធ្ងន់ធ្ងរខ្លាំងណាស់ហើយយើងម្នាក់ៗគួរចាប់ផ្តើមទាំងអស់គ្នា ក្នុងការគោរពច្បាប់ចរាចរណ៍ផ្លូវគោគ ។ លោកបន្តថា អ្នកសារព័ត៌មានត្រូវតែសរសេអំពីរឿងសុវត្ថិភាពចរាចរណ៍ឲ្យបានស៊ីជំរៅបញ្ចូលសារអប់រំដល់់ប្រជពលរដ្ឋពីច្បាប់ចរាចរណ៍ផ្លូវគោកថ្មី ដែលត្រូវដាក់ទោស និងផាកពិន័យធ្ងន់ធ្ងរចំពោះអ្នកដែលល្មើស ។
លោករវៈសេនីយ៍ត្រី កេត សុភក្ត្រ័ នាយរងការិយាល័យ ចរាចរណ៍ផ្លូវគោក ស្នងការដ្ឋាននគរបាល ខេត្តព្រះសីហនុ បាននិយាយថា នគរបាលចរាចរណ៍កំពុងតែទន្ទឹងរងចាំច្បាប់ចរាចរណ៍ផ្លូវគោកថ្មី ដែលបានរដ្ឋសភាពជាតិបានអនុម័តនាពេលថ្មីចូលជាធរមាន ដើម្បីយកមកអនុវត្តន៍ ក្នុងគោលបំណងឲ្យប្រជាពលរដ្ឋទាំងអស់គ្នាគោរព ដើម្បីកាត់បន្ថយករណីគ្រោះថ្នាក់ចរចរណ៍ ដែលសព្វថ្ងៃនេះមានអ្នកស្លាប់ និងរងរបួសយ៉ាងច្រើនដោយសារតែមិនគោរពច្បាប់ ។
យោងតាមការព្យាករណ៍ទុក នៃគ្រោះថ្នាក់ចរាចរណ៍ឆ្នាំ ២០២០ របស់អគ្គលេខាធិការដ្ឋាន នៃគណៈកម្មាធិកាជាតិសុវត្ថិភាពចរាចរណ៍ផ្លូវគោក បើសិនជាគ្មានវិធានការទប់ស្តាត់ទាន់ពេលទេនោះ អាចមានអ្នកស្លាប់ប្រមាណ ៣២០០ក្នុងឆ្នាំ២០២០ និងរងរបួសរាប់ម៉ឺននាក់ ហើយខាតបង់ថវិការជាតិប្រហែលជិត៤០០លានដុល្លាផងដែរ ៕
