ខេត្តបន្ទាយមានជ័យ៖
ម្ចាស់ផ្ទះរវល់ចេញទៅរកស៊ីនៅប្រទេសថៃអស់ទុកផ្ទះចោល ស្រាប់តែទុស្សេខ្សែភ្លើងឆាបឆេះយ៉ាងសន្ធោសន្ធៅ ទាំងយប់ គ្រាន់តែរយៈពេល កន្លះម៉ោងសោះ ផ្ទះតៀមជញ្ជាំងនិងដំបូលប្រក់ស័ង្កសីទំហំ៥ម៉ែត្រគុណនិង៧ម៉ែត្រត្រូវបានអគ្គិភ័យលេបត្របាក់អស់ទាំងស្រុងបើទោះបីជាប្រជាពលរដ្ឋនិងនគរបាលស្រុកមង្គលបុរីជួយអន្តរាគមក៏អាចជួយបានឡើយ។
ហេតុការណ៍នេះ បានកើតឡើងកាលពីវេលាម៉ោង ៨យប់ ថ្ងៃទី១៤ ខែធ្នូ ឆ្នាំ២០១៤ នៅចំណុច រ៉ារថភ្លើងស្រុកមង្គលបុរី ស្ថិតក្នុងភូមិចំការតាដោក ឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ។លោក ស៊ី ឌី អធិការដ្ឋាននគរបាល ស្រុកមង្គលបុរីថា នៅព្រឹកថ្ងៃទី១៥ ខែធ្នូ ឆ្នាំ២០១៤ នេះថា ផ្ទះដែលត្រូវបានអគ្គិភ័យ លេបត្របាក់ទាំងស្រុងនោះ ជាប្រភេទ ផ្ទះតៀម ជញ្ជាំងនិងដំបូលប្រក់ស័ង្កសី ទំហំ ៥ម៉ែត្រ គុណ ៧ ម៉ែត្រ ហើយម្ចាស់ផ្ទះមានឈ្មោះឌួង សុគង់ ភេទប្រុស អាយុ ៥៥ឆ្នាំ និងប្រពន្ធឈ្មោះ វូ វ៉ិត អាយុ ៥៣ឆ្នាំ។
បើតាមប្រភពបឲ្យដឹងទៀតថា នៅពេលកើតហេតុ ម្ចាស់ផ្ទះមិនបាននៅផ្ទះឡើយ ដោយរវល់ចេញទៅប្រកបរបររកស៊ីនៅប្រទេសថៃ ហើយទុកផ្ទះចោល ស្រាប់តែត្រូវបានភ្លើងឆេះផ្ទះ បង្កភាពភ្ញាក់ផ្អើលទាំងយប់តែម្តង។ប្រភពបន្តឲ្យដឹងទៀតថា នៅពេលទទួលដំណឹងភ្លាម គេឃើញមានកម្លាំងនគរបាលមូលដ្ឋាន ធ្វើការសហការជាមួយប្រជាពលរដ្ឋ ជួយបាញ់និងជះទឹកដើម្បីទប់ស្កាត់ កុំឲ្យភ្លើងរីករាលដាល ឆ្លងទៅកាន់លំនៅឋាន ប្រជាពលរដ្ឋផ្សេងទៀត។លោក ស៊ី ឌី អធិការបានបញ្ជាក់ថា ករណីខាងលើនេះ គឺបណ្តាលមកពីទុស្សេខ្សែភ្លើង ហើយចំពោះសម្ភារខូចខាត គេនៅមិនទាន់ដឹងនៅឡើយទេ ចំណែក ថវិកាពុំដឹងនោះទេ ព្រោះឆាបឆេះទាំងស្រុង៕
