ព្រឹទ្ធសភាអាម៉េរិកនៅថ្ងៃសុក្រ ទី១៣ ខែធ្នូ បានសម្រេច ចេញនូវថវិកាជាតិ ៥៨៥ ពាន់លានដុល្លារ សម្រាប់ផ្គត់ផ្គង់វិស័យការពារជាតិ ដែលមន្ទីរប៉ង់តាហ្គោន ជាអ្នក ប្រើប្រាស់សម្រាប់ នយោបាយ និង សកម្មភាពនានានៅឆ្នាំ ២០១៥ ខាងមុខ ។ នេះជាការ បន្ថែម ចំណាយមួយ ដើម្បីគាំទ្រ
ដល់នយោបាយ លោក អូបាម៉ា ក្នុងការតាមកម្ចាត់ក្រុម ឧទ្ទាមរដ្ឋឥស្លាម ISIS ដែលកំពុងបង្កការ គម្រាមកំហែងយ៉ាងខ្លាំង ដល់សន្តិសុខ សកលលោក ។
ទីភ្នាក់ងារព័ត៌មានចិនស៊ិនហួ ចេញផ្សាយបន្តទៀតថា ថវិកាខាងលើនេះ បានមកពីការ សម្រេចដោយ សម្លេងគាំទ្រ ៨៩ លើ ១១ ក្នុងព្រឹទ្ធសភា ហើយវានៅរង់ចាំ តែការសម្រេចចុង ក្រោយពីលោកប្រធានាធីបតី បារ៉ាក់ អូបាម៉ា ប៉ុណ្ណោះ ដើម្បីសម្រេចចេញ ទុកប្រើប្រាស់ឲ្យ សមស្របទៅតាមច្បាប់ ។
ចំពោះថវិកា ៥៨៥ ពាន់លានដុល្លារនេះ គឺ ៥២១,៣ ពាន់លាន នឹងត្រូវប្រើប្រាស់នៅក្នុង ប្រតិបត្តិការនានា ដោយមន្ទីរប៉ង់តាហ្គោន និង ៦៣,៧ ពាន់លាន ដុល្លារសម្រាប់ ប្រតិបត្តិការយោធាអាម៉េរិក នៅប្រទេស អាហ្វហ្គានីស្ថាន និង អ៊ីរ៉ាក់ ។
ដោយឡែកថវិកា ៥ពាន់លានដុល្លារទៀត នឹងត្រូវប្រើប្រាស់សម្រាប់ ប្រយុទ្ធប្រឆាំង និង ក្រុមឧទ្ទាមរដ្ឋឥស្លាម ISIS ៕
