កំពង់ធំ =នៅល្ងាចថ្ងៃទី១៦ ខែឆ្នូ ឆ្នាំ២០១៤ឯកឧត្តមអ៊ុត សំអន អភិបាលខេត្តកំពង់ធំ និងជាប្រធាន គណះកម្មាធិការ សាខា កាកបាទក្រហមខេត្ត បាននាំអំណោយមនុស្សធម៍ ជូនស្ដ្រីដែលមានវិបត្តិ ប្ដីបានបោះបង់ចោល ក្រោយពីសម្រាលកូនបានរយះពេល១សប្ដាហ៍ ក្នុងការចុះសួរសុខទុក្ខនិងជូនអំណោយនេះ មានការចូលរួម ពីលោក ហុករិន អភិបាលក្រុងស្ទឹងសែន លោកញែមឈុនលីអធិការក្រុងស្ទឹងសែន អ្នកស្រី ឌុក ស៊ីដា នាយកប្រតិបត្តិសាខាកាកបាទក្រហមខេត្ត អ្នកស្រីខ្លូត វណ្ណារ៉ា អភិបាលរងក្រុង និងជាប្រធានបណ្ដាញអង្គការជួយស្ដ្រីមានវិបត្តិ មន្ដ្រីសាលាក្រុង មន្ដ្រីកាក់បាទក្រហម មន្ទីរកិច្ចការនារី សមាជិកក្រុមប្រឹក្សាសង្កាត់ និងមេភូមិ មេឃុំ ប្រជាពលរដ្នជាច្រើននាក់ផងដែរ។
ក្នុងការជូនអំណោយនេះ មានការ សារទយ៉ាងខ្លាំងពីសំណាក់ប្រជាពលរដ្នដែលរស់នៅជិតខាង ក្នុងការយកចិត្តទុកដាក់របស់ឯកឧត្តមអភិបាលខេត្ត ព្រមទាំងមន្ដ្រីជុំវិញខេត្តដែលបានយកចិត្តទុកដាក់ចំពោះប្រជាពលរដ្នរបស់ខ្លួននៅពេល ជួបនិងវិបត្តិ ក្នុងនោះឯកឧត្តម អ៊ុតសំអន បានពាំនាំអំណោយ មានអង្ករ២៥គីឡូក្រាម មី២កេះ ត្រីខ១យួរ មុងភួយ សារុង ក្រមា ព្រមទាំងថវិការ ១០០០០០រៀល, ឯកឧត្តមគង់វិមានអភិបាលរងខេត្ត អង្ករ ២៥គីឡូក្រាម លោក អ៊ិត សុធា ព្រះរាជអាជ្ញាអមសាលាដំបូងខេត្ត ១០០ដុលា និងសប្បុរសជនតាមមន្ទីរនានា សរុប ថវិការ ១២០ដុលា និង៣០០០០០រៀល។
ស្ដ្រីរងគ្រោះ ឈ្មោះហេន ស្រីនិច បានលើកដៃថ្លែងអំណរគុណចំពោះឯកឧត្តម និងសប្បុរសជន ទាំងទឹកភ្នែកនិងសំលេងយំយ៉ាងក្ដុកក្ដួលក្នុងចិត្តដោយមិននឹកស្មានថាខ្សែជីវិតរបស់ខ្លួនបានជួបនិងបានឆ្លងកាត់នូវរឿងរ៉ាវសោកសៅ អស់សង្ឃឹម តាំងតែពីតូចរហូតមកជួបនិងប្ដីជាមនុស្សចោលម្សៀត ចិត្តតិរច្ឆានដូច្នេះសោះ។
ឯកឧត្តមអ៊ុត សំអន បានសំណូមពរអោយប្រជាពលរដ្នរស់នៅជិតខាង ជួយមើលការខុសត្រូវ និងបានផ្ដាំផ្ញើរអោយស្ដ្រីរងគ្រោះខិតខំប្រមូលអារម្មណ៍ តាំងចិត្តអោយនឹងន៎ កុំភ័យ ខ្លាចអ្វីទាំងអស់ ត្រូវគិតពីអនាគតន៍ខ្លួននិងកូន ព្រោះមានយើង និងអង្គការ ជាអ្នក ជួយជ្រុមជ្រែង និងបណ្ដុះបណ្ដាល៕ប៊ុនរិទ្ធី 
