សៀមរាបនៅរដ្ឋបាលសាលាខេត្តសៀមរាបនាថ្ងៃទី១៥ខែធ្នូឆ្នាំ២០១៤ មានធ្វើការប្រជុំបូកសរុបលទ្ធផលការងារឆ្នាំ២០១៤ និង ទិសដៅអនុវត្តបន្តឆ្នាំ២០១៥ របស់ក្រុមការងារថ្នាក់ជាតិ ដើម្បីត្រួតពិនិត្យ និង គាំទ្រការអនុវត្តកម្មវិធីនយោបាយ និង យុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា ក្រោមអធិបតីភាពលោក ទៀ បាញ់ ឧបនាយករដ្ឋ មន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់ជាតិ ចុះមូលដ្ឋាលខេត្តសៀមរាប ព្រមទាំងមានការចូលរួម ពីឯកឧត្តម លោកជំទាវ អស់លោក លោកស្រី ជាអនុប្រធាន សមាជិក សមាជិកាក្រុមការងារថ្នាក់ជាតិ ថ្នាក់ ក្រុង ស្រុក ចំនួន ១២០នាក់ដែលបានចូលរួម ។
មានប្រសាសន៍បើកកិច្ចប្រជុំនោះ ឯកឧត្តមឧបនាយករដ្ឋមន្ត្រី ទៀ បាញ់ បានធ្វើការងារណែនាំដល់បណ្តាឯកឧត្តម លោកជំទាវ ជាប្រធាន អនុប្រធានក្រុមការងារជាតិចុះមូលដ្ឋានក្រុង ស្រុកទាំង១២របស់ខេត្តសៀមរាប ដើម្បីធ្វើសេចក្តី រាយការណ៍អំពីលទ្ធផល សកម្មភាពការងារ ដែលបានអនុវត្តក្នុងឆ្នាំ២០១៤ ព្រមទាំងបញ្ហាប្រឈម ដើម្បីរកនូវនីតិវិធីដោះ ស្រាយឲ្យបានចំនូវរាល់បញ្ហាទាំងនោះឲ្យមានប្រសិទ្ធភាព ។
ក្នុងនោះដែរលោកឃឹម ប៊ុនសុងអភិបាលនៃគណៈអភិបាលខេត្ត និងជាអនុប្រធានអចិន្ត្រៃយ៍ក្រុមការងារថ្នាក់ជាតិ ក៏បានធ្វើសេចក្តីរាយការណ៍ អំពីលទ្ធផលដែលបានអនុវត្តការងាររបស់ក្រុមការងារ និង បញ្ហាប្រឈម ព្រមទាំងលើកនូវ សំណូមពរមួយចំនួន ដល់ក្រុមការងារថ្នាក់ជាតិ ក្នុងការដាក់ប្រតិទិនការងាររបស់ខ្លួន ចុះមូលដ្ឋាន និងបានលើកនូវទិសដៅ ដែលត្រូវអនុវត្តបន្តនៅឆ្នាំបន្ទាប់ផងដែរ ។
បន្តមកឯកឧត្តម លោកជំទាវ លោក លោកស្រី ដែលជាប្រធាន អនុប្រធានក្រុមការងារថ្នាក់ជាតិចុះមូលដ្ឋានក្រុង ស្រុក បានរាយការណ៍អំពីលទ្ធផល សកម្មភាពការងាររបស់ក្រុមដែលអនុវត្តបាន ក្នុងឆ្នាំ២០១៤ ដោយបានលើកនូវបញ្ហា មួយចំនួនដែលប្រជាពលរដ្ឋបានលើកឡើង ព្រមទាំងសំណូមពរមួយចំនួន ក្នុងកិច្ចអភិវឌ្ឍន៍ភូមិ ឃុំផងដែរ ។
បន្ទាប់ពីធ្វើកិច្ចពិភាក្សាយ៉ាងស៊ីជម្រៅ ទៅលើការងារ គាំទ្រការអនុវត្តកម្មវិធីនយោបាយ និង យុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា និង ឆ្លងតាម
សេចក្តីរាយការណ៍របស់អាជ្ញាធរខេត្ត និង ប្រធាន អនុប្រធាន ក្រុមការងារថ្នាក់ជាតិរួចមក ឯកឧត្តមឧបនាយករដ្ឋមន្ត្រី ទៀ បាញ់ ក៏បានធ្វើការកោតសរសើរពីកិច្ចខិតខំប្រឹងប្រែង របស់ ឯកឧត្តម លោកជំទាវ អស់លោក លោកស្រីជាសមាជិកក្រុមការងារថ្នាក់ជាតិ ក៏ដូចជាអាជ្ញាធរមូលដ្ឋាន ដែលបានអនុវត្ត ការងារកន្លងមក ហើយបានទទួលលទ្ធផលជាទីមោទនៈបំផុត ។ ម្យ៉ាងទៀតចំពោះរាល់បញ្ហា និង សំណូមពរ ដែលនៅសេសសល់ក៏យើងត្រូវបន្តធ្វើការដោះស្រាយ ទៅតាមទិសដៅដែលបានលើកឡើងសម្រាប់អនុវត្តបន្តនាឆ្នាំ២០១៥។ក្នុងនោះដែរឯ.ឧទៀបាញ់ ក៏បានធ្វើការបូកសរុបនូវលទ្ធផលនៃកិច្ចប្រជុំប្រចាំឆ្នាំ២០១៤នេះទៅលើទម្រង់របាយការណ៍ ដែលជាកញ្ចក់ឆ្លុះបញ្ចាំងទៅលើកញ្ចប់នៃផ្នែកនីមួយៗ ដែលក្រុមលេខាធិការដ្ឋានបានរៀបចំ និងការប្រមូលផ្តុំបញ្ហាដែល មានការពាក់ព័ន្ធ និង ស្នើសុំជាគោលការណ៍ទៅសម្តេចនាយករដ្ឋមន្ត្រី ប្រជុំជាមួយរដ្ឋមន្ត្រីគ្រប់ក្រសួង ដើម្បីធ្វើការដោះ ស្រាយ ។ ឯកឧត្តមឧបនាយករដ្ឋមន្ត្រី ក៏បានធ្វើការបញ្ជាក់ផងដែរ អំពីបញ្ហាគុណភាពសេវាសាធារណៈ និង បញ្ហាបងប្អូន ប្រជាពលរដ្ឋភូមិបឹងដូនប៉ាសង្កាត់ស្លក្រាម គឺត្រូវមាននីតិវិធីច្បាប់ឲ្យពួកគាត់ ដើម្បីមានទំនុកចិត្តក្នុងការគ្រប់គ្រងដីកម្មសិទ្ធិ របស់ពួកគាត់ ព្រមទាំងបញ្ជាតំបន់ដីព្រៃលិចទឹកបឹងទន្លេសាប ក្នុងតំបន់៣ របស់អាជ្ញាធរទន្លេសាប ត្រូវមាននីតិវិធីដោះ ស្រាយជូនដល់ពួកគាត់បានដីបង្កបង្កើនផលធ្វើស្រែបណ្តេញទឹកស្រែប្រាំង ទៅតាមភាពជាក់ស្តែង។ឯកឧត្តមឧបនាយករដ្ឋមន្ត្រី ទៀ បាញ់ ក៏បានធ្វើការផ្តាំផ្ញើដល់សមាជិកក្រុមការងារថ្នាក់ជាតិ ថ្នាក់ខេត្តទាំងអស់ត្រូវបង្កើនការយកចិត្តក្នុងការបំពេញភារកិច្ចរបស់ខ្លួន ក្នុងការបម្រើនូវរាល់សំណូមពរតម្រូវការចាំបាច់របស់ប្រជាជននៅតាមមូលដ្ឋាន ដែលជាកម្លាំងចលករជម្រុញឲ្យការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិកាន់តែមានល្បឿនទៅមុខហើយជាកាយវិការដ៏ប្រពៃ សំដៅធ្វើឲ្យថ្នាលនៃលទ្ធិប្រជាធិបតេយ្យនៅកម្ពុជា កាន់តែចាក់ឬសយ៉ាងជ្រៅ នៅតាមសហគមមូលដ្ឋាន របស់យើង ៕
