សៀមរាប ល្ងាចថ្ងៃទី ១៦ ខែ ធ្នូ ឆ្នាំ២០១៤ មានរៀបចំពិធីលៀងសាយភោជន៍ ទទួលស្វាគមន៍គណៈប្រតិភូ សភាប្រឹក្សា នយោបាយប្រជាជនចិន ដែលដឹកនាំដោយលោក ឆេង ហ្សៀវគូ អនុប្រធាន សភាប្រឹក្សា នយោបាយប្រជាជនចិន រួម នឹងសហការី នៅសណ្ឋាគារបុរីអង្គរ ខេត្តសៀមរាប ក្រោមវត្តមានចូលរួមរបស់លោក នូ ផល្លា ប្រធានក្រុមប្រឹក្សាខេត្ត សៀមរាប លោកគណៈអភិបាលខេត្ត និងអស់លោក លោកស្រីជាថ្នាក់ដឹកនាំមន្ទីរ អង្គភាពចូលរួមផងដែរ ។
ក្នុងកិច្ចស្វាគមន៍នោះលោក នូ ផល្លា ក៏បានលើកឡើងពីស្ថានភាពភូមិសាស្ត្រ នយោបាយ សន្តិសុខ សេដ្ឋកិច្ច និង ជីវភាពរស់នៅរបស់ប្រជាជនខេត្តសៀមរាប ម្យ៉ាងទៀតសក្តានុពលរបស់ខេត្តបានពឹងផ្អែកទៅ លើវិស័យកសិកម្ម វិស័យទេសចរណ៍។ក្រោមកិច្ចដឹកនាំរបស់សម្តេចទាំងបីសម្ខាន់ការកិច្ច ដឹកនាំដ៏ឈ្លាសវៃប្រកបដោយគតិបណ្ឌិតដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យមាន ការអភិវឌ្ឍន៍រីកចម្រើនលើគ្រប់វិស័យ និង បានលើស្ទួយនូវជីវភាពរស់នៅរបស់ប្រជាជន កាន់តែមានភាពប្រសើរ ពិសេសនៅខេត្តសៀមរាប ធ្វើឲ្យមានការអភិវឌ្ឍន៍លើវិស័យ ទេសចរណ៍ ទាំងរចនាសម្ព័ន្ធ និង សេវាកម្មទេសចរណ៍ និង ការអភិវឌ្ឍន៍ក្រុងឲ្យកាន់តែមានសោភ័ណ្ឌស្រស់ត្រកាលឡើង ។ លោកនូ ផល្លាក៏បានលើកឡើងថា ដំណើរទស្សនៈកិច្ចជាផ្លូវការនៅលើទឹកដីប្រវត្តិសាស្ត្រសៀមរាប 
បានធ្វើឲ្យចំណងមិត្តភាពរវាងប្រទេសទាំងពីរ កម្ពុជា ចិន ឲ្យកាន់តែមានទំនាក់ទំនងល្អ និង កិច្ចសហប្រតិបត្តិការល្អជា មួយរដ្ឋាភិបាលកម្ពុជា និង រដ្ឋាភិបាលចិន ធ្វើឲ្យប្រជាជននៃប្រទេសទាំងពីរកាន់តែនៅជិតគ្នាជានិច្ចនិរន្តតរៀងទៅ ។ឯកឧត្តមក៏បានបញ្ជាក់ជូនដល់គណៈប្រតិភូផងដែរ ក្នុងការធ្វើកំណែទម្រង់រដ្ឋបាលនៅកម្ពុជា ដែលធ្វើឲ្យប្រទេសយើងទាំងពីរអាចធ្វើការផ្លាស់ប្ដូរ និង ដកបទពិសោធន៍រវាងគ្នាទៅវិញទៅមក ។ លោកនូ ផល្លាក៏បានធ្វើការថ្លែងអំណរគុណ ចំពោះរដ្ឋាភិបាល និងប្រជាជនចិន ដែលតែងជួយដល់ប្រជាជនកម្ពុជា ក្នុងពេលមានគ្រោះធម្មជាតិ និង បានបញ្ជូនក្រុមវិស្វករបុរាណវិទ្យាចិន ជួយជួសជុលប្រាង្គប្រាសាទបុរាណខ្មែរ មានប្រាសាទចៅសាយទេវតា និង ប្រាសាទតាកែវទៀតផង ។ ម្យ៉ាងទៀតដោយប្រទេសចិនបានផ្ដល់ជំនួយមកឲ្យកម្ពុជាយ៉ាងច្រើនសន្ធឹកសន្ធាប់ ដើម្បីជួយដល់ការអភិវឌ្ឍលើវិស័យជាច្រើន ជាពិសេសលើវិស័យហេដ្ឋារចនាសម្ព័ន្ធ ដូចជាស្ពាន ផ្លូវ ប្រព័ន្ធធារាសាស្ត្រ ហើយកម្ពុជាបានគាំទ្រគោលជំហរ របស់ខ្លួនក្នុងការគាំទ្រគោលនយោបាយចិនតែមួយ ។
មានប្រសាសន៍នាឱកាសនោះលោកឆេងហ្សៀវគូ ក៏បានកោតសរសើរអំពីសម្បត្តិវប្បធម៌របស់បុព្វបុរសខ្មែរដែលបានបន្សល់ទុកជាមរតកដ៏មានតម្លៃ ហើយបានកំពុងទាក់ទាញនូវភ្ញៀវទេសចរណ៍ចូលមកទស្សនាកម្សាន្តដែលជា ប្រភពចំណូលមិនចេះរីងស្ងួតរបស់ព្រះរាជាណាចក្រកម្ពុជាព្រមទាំងការដឹកនាំរបស់អាជ្ញាធរខេត្ត ក្នុងកិច្ចអភិវឌ្ឍន៍ឲ្យ មានការរីកចម្រើនគ្រប់វិស័យសំខាន់វិស័យទេសចរណ៍ ។ លោកក៏បានគូសបញ្ជាក់ថា ប្រទេសចិននិងកម្ពុជាមានទំនាក់ទំនងជិតស្និទ្ធនឹងគ្នាអស់រយ:កាលជាយូរមកហើយ បានផ្តល់នូវផលប្រយោជន៍ល្អរវាងគ្នានិងគ្នាទៀតផង។លោកឆេងហ្សៀវគូ ក៏បានបន្តទៀតថាក្រៅពីការទំនាក់ទំនងរវាងប្រទេស និង ប្រទេស ខេត្ត និង ខេត្តនោះ សំខាន់ខេត្ត សៀមរាប ក៏មានការចងសម្ព័ន្ធមេត្រីភាពនៃកិច្ចសហប្រតិបត្តិការរវាងគ្នា ទៅនឹងខេត្តស្វយ័តរបស់សាធារណរដ្ឋប្រជាមា និតចិន លើវិស័យកសិកម្ម វប្បធម៌ អប់រំ សុខាភិបាលផងដែរ ។ ក្នុងដំណើរទស្សនកិច្ចនៅលើទឹកដីប្រវត្តិសាស្ត្រខេត្ត សៀមរាប ឯកឧត្តមក៏បានអញ្ជើញទៅទស្សនាតាមរមណីដ្ឋានវប្បធម៌របស់ខែ្មរយើង ហើយខេត្តសៀមរាបពិតជាខេត្តមានសក្តានុពលលើវិស័យទេសចរណ៍ព្រមទាំងបានកោតសរសើរពីការខិតខំរបស់ក្រុមវិស្វករបុរាណវិទ្យាចិន ជួយជួសជុលប្រាង្គប្រាសាទបុរាណខ្មែរ មានប្រាសាទចៅសាយទេវតា និង ប្រាសាទតាកែវ ។ឯកឧត្តមបន្តទៀតថានៅពេលធ្វើមាតុភូមិនិវត្តទៅកាន់មាតុប្រទេសវិញ និងធ្វើការជម្រុញដល់ប្រជាជនចិនឲ្យចូលមកធ្វើទេសចរកម្សាន្តនៅកម្ពុជា សំខាន់ លើទឹកដីប្រវត្តិសាស្ត្រខេត្តសៀមរាប ដែលមានសម្បត្តិវប្បធម៌ដ៏សម្បូរបែបព្រមទាំងរមណីយដ្ឋានធម្មជាតិផងដែរ។ម្យ៉ាងទៀតដំណើរទស្សនកិច្ចនេះ គឺធ្វើឲ្យចំណង់មិត្តភាពនៃប្រទេសកម្ពុជាចិន កាន់តែរឹងមាំជាអមតៈផងដែរ ៕
