ខេត្តរតនគិរីៈ ព្រឹកថ្ងៃទី១៧ ខែធ្នូ ឆ្នាំ២០១៤ សាខាកាកបាទក្រហមខេត្តរតនគិរី រួមជាមួយសហភាពសហព័ន្ធយុវជនកម្ពុជាខេត្តបាននាំយកអំណោយផ្តល់ជូនលោកយាយម្នាក់ដែលកូនចៅអះអាងថាគាត់មានអាយុ១១០ឆ្នាំ នៅភូមិតាវែង ឃុំតាវែងលើ ស្រុកតាវែង។ លោកមួង ប៉ាង អភិបាលស្រុកតាវែងបានឲ្យដឹងថាលោកយាយដែលមានអាយុ១១០ឆ្នាំជាជនជាតិដើមភាគតិចព្រៅ មានស្រុកកំណើតនៅភូមិតាវែង ឃុំតាវែងលើ ស្រុកតាវែង ហើយលោកយាយមានឈ្មោះ ញ៉ៃ ប្លៀន សព្វថ្ងៃលោកយាយមានកូនចៅនៅចាំជួយថែរក្សាប្រចាំថ្ងៃ ។ លោកឌីម ណាត នាយកសាខាកាកបាទក្រហមខេត្តនិងលោកង៉ែត ពិទូអនុប្រធានសហភាពសហព័ន្ធ
យុវជនកម្ពុជាខេត្តរតនគិរី បានពាំនាំមកនូវការសាកសួរសុខទុក្ខពីសំណាក់ ឯកឧត្តមថង សាវុន ប្រធានកាកបាទក្រហមខេត្ត ជាពិសេសពីសំណាក់សម្តេចគតិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនចំពោះលោកយាយញ៉ៃ ប្លៀន ដែលមានអាយុ១១០ឆ្នាំ និងបានលើកឡើងពីគោលការណ៍មនុស្សធម៌របស់កាកបាទក្រហម ក្នុងការជួយដល់ប្រជាពលរដ្ឋទីទាល់ក្រ ជនចាស់ជរាគ្មានទីពឹងជាដើម ពោលគឺទីណាមានការលំបាក ទីនោះមានកាកបាទក្រហមចុះជួយជានិច្ច។
លោកឌីម ណាត នាយកសាខាកាកបាទក្រហមខេត្តផ្តាំផ្ញើរដល់កូនចៅលោកយាយ សូមយកចិត្តទុកដាក់មើលថែទាំគាត់អោយបានល្អពីព្រោះថាពេលនេះអាកាសធាតុមានការចុះត្រជាក់ខ្លាំងមិនត្រូវទុកអោយលោកយាយនៅម្នាក់ឯងនោះទេ។ អំណោយដែលសាខាកាកបាទក្រហមខេត្តបានផ្តល់ជូនលោកយាយញ៉ៃ ប្លៀន នាពេលនេះមានអង្ករ៥០គីឡូក្រាម 
ត្រីខមួយយួរ និងឃីកមួយកញ្ចប់ ដោយឡែកអំណោយរបស់ឯកឧត្តមថង សាវុន ប្រធានសហភាពសហព័ន្ធយុវជនកម្ពុជាខេត្តមានអង្ករ១០០គីឡូក្រាមមី៣កេះ ត្រីខពីរយួរ អំបិល២៥កញ្ចប់ និងថវិការ៣០ម៉ឺនរៀល៕
