ខេត្តព្រះសីហនុ
កងពលតូចពិសេសឆត្រ័យោងលេខ៩១១ មានរៀបចំពិធីបិទវគ្គហ្វឹកហ្វឺនរបស់ខ្លួនកាលពីថ្ងៃទី១៦ ខែធ្នូ ឆ្នាំ២០១៤ នៅសាលាឃុំបឹងតាព្រហ្ម ស្រុកព្រៃនប់ ខេត្តព្រះសីហនុក្រោមអធិបតីភាពលោកឧត្តមសេនីយ៌ត្រី ស៊ុំ សំណាង មេបញ្ជាការរងកងពលតូចកងទ័ពឆត្រ័យោង
វគ្គនេះហ្វឹកហាត់រយៈពេល ១ខែ នៅតាមតំបន់ឆ្នេរ តំបន់កោះ ក្នុងស្រុកព្រៃនប់ ខេត្តព្រះសីហនុ នឹងត្រូវបានបញ្ចប់ប្រកបដោយជោគជ័យ ។
លោកឧត្តមសេនីយ៍ត្រី ស៊ុំ សំណាង បានសំដែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះអាជ្ញាធរឃុំបឹងតាព្រហ្ម ព្រះសង្ឃ ប្រជាពលរដ្ឋ រួមទាំងសប្បុរសជនទាំងអស់ ដែលតែងតែយកទឹកចិត្តសប្បុរសធម៌ជួយឧបត្ថម្ភគាំទ្រក្នុងការស្នាក់នៅ ការហូបចុកក្នុងពេលហ្វឹកហាត់របស់កងទ័ពពិសេសឆ័ត្រយោងលេខ៩១១ ដែលបានជ្រើសរើសយកទីតាំងឃុំបឹងតាព្រហ្ម ស្រុកព្រៃនប់ ខេត្តព្រះសីហនុដើម្បីធ្វើជាទីតាំងហ្វឹកហាត់ ។ 
ការហ្វឹកហាត់រយះពេល០១ខែកន្លងមកនេះទទួលបានលទ្ធផលល្អ គឺអាស្រ័យដោយមានការចូលរួមសហការពីអាជ្ញាធរ ប្រជាពលរដ្ឋ ព្រះសង្ឃ និងសប្បុរសជននានានៅក្នុងមូលដ្ឋាន ដែលបានសហការនឹងការទទួលស្វាគមន៌យ៉ាងរាក់ទាក់កក់ក្តៅបំផុតនូវរាល់សកម្មភាពហ្វឹកហាត់ទាំងអស់នេះ ធ្វើអោយយើងខ្ញុំជានាយ នាយរង និងពលទាហាន ចងចាំជាប់ជានិច្ច មិនអាចបំភ្លេចបាន និងខិតខំព្យាយាមហ្វឹកហាត់រហូតទទួលបានជោគជ័យ ដើម្បីការពារប្រជាពលរដ្ឋ ក៌ដូចជាការពារជាតិមាតុភូមិនៃព្រះរាជាណាចក្រកម្ពុជារបស់យើងទទួលបានសុខសន្តិសុខ ។
លោក ម៉ែន សៀន មេឃុំបឹងតាព្រហ្មបានបញ្ជាក់អោយដឹងថា កងទ័ពនិងប្រជាជនប្រៀបបានដូចទឹក និងត្រី កងទ័ពគឺជាកូនចៅរបស់ប្រជាពលរដ្ឋ នៅពេលដែលមានវត្តមានកងទ័ពមកបោះទីតាំងធ្វើការហ្វឹកហាត់នៅក្នុងទឹកដីឃុំបឹងតាព្រហ្ម អាជ្ញាធរ ព្រះសង្ឃ ប្រជាពលរដ្ឋ និង សប្បុរសជនតែងមានការលើកទឹកចិត្ត និងជួយលើកទឹកចិត្តឧបត្ថម្ភគាំទ្រទាំងពេលមកដល់ ពេលហ្វឹកហាត់ និងពេលបញ្ចប់វគ្គហ្វឹកហ្វឺន ដើម្បីលើកទឹកចិត្តដល់ពួកគាត់អោយមាន
ការសប្បាយរីករាយបន្ទាប់ពីការនឿយហត់ក្នុងពេលហ្វឹកហាត់ ដើម្បីឪ្យការហ្វឹកហាត់ក្លាយជាកងទ័ពមួយមានកម្លាំង និងជំនាញបច្ចេកទេសរឹងមាំខ្លាំងពូកែ ក្នុងការចូលរួមចំណែកការពារជាតិមាតុភូមិរបស់យើងទទួលបានសុខសន្តិភាព និងសំបូររុងរឿង ហើយអាជ្ញាធរនឹងនៅតែគាំទ្រសហការជានិច្ចនូវ រាល់ការហ្វឹហាត់លើកក្រោយៗទៀត ដើម្បីឪ្យការហ្វឹកហាត់ទទួលបានផ្លែផ្កា ៕
