កំពង់ធំៈ ដោយមានការយកចិត្តទុកដាក់ពីជីវភាពរបស់បងប្អូនប្រជាពលរដ្ឋ ដែលរស់នៅក្នុងស្រុកស្ទោង និងការប្រើប្រាស់ថាមពលអគ្គិសនី នៅក្នុងស្រុក អាជ្ញាធរខេត្តបានគិតគូរពីជីវភាព និងការស់នៅប្រចាំថ្ងៃក៏ដូចជាការកាត់បន្ថយភាពក្រីក្ររ ទើបអជ្ញាធរខេត្តកំពង់ធំ ដែលមានឯកឧត្តម អ៊ុត សំអន អភិបាលខេត្តកំពង់ធំ និងឯកឧត្តម គង់ វិមាន អភិបាលរងខេត្ត បានគៀងគររកដៃគូរអភិវឌ្ឍន៍ ក៏ដូចជាការស្ថាបនាការរីកចំរើនជូន ប្រជាពលរដ្ឋ ។
ជាពិសេសនោះអាជ្ញាធរខេត្តកំពង់ធំ ក៏ដូចជារដ្ឋបាលស្រុកស្ទោង បានយកដៃគូរអភិវឌ្ឍន៍រោងចក្រអគ្គិសនី មួយកន្លែងដែលមានទីតាំងស្ថិតនៅក្នុងភូមិស្លាក់ក្រាញ់ ឃុំសព្រោជ ស្រុកស្ទោង ខេត្តកំពង់ធំ និងមានកំលាំង វ៉ាត់ស្តង់ដាអាចបំរើថាមពលអគ្គីសនីជូនប្រជាពលរដ្ឋក្នុងស្រុកស្ទោង ចំណែករោងចក្រអគ្គីសនីនេះ បានប្រើប្រាស់ថាមពលចេញពីការដុតអង្កាម ឈ្មោះក្រុមហ៊ុន សូម៉ា ជាវត្ថុច្នៃប្រឌិតដែលនៅសេសសល់ពីធម្មជាតិ ត្រូវបានកែច្នៃអគ្គិសនី រីឯកាកសំណល់ដែលនៅសេសសល់ពីអង្កាមក៏មាន ក្រុមហ៊ុនមួយចំនួនទទួលទិញយកទៅធ្វើជាជី និងខ្យូង ដែលមានប្រសិទ្ធិភាពល្អ។
ជាក់ស្តែងឯកឧត្តម គង់ វិមាន អភិបាលរងខេត្តកំពង់ធំ ព្រមទាំងមន្ទីរពាក់ព័ន្ឋ បានអញ្ចើញចុះទៅត្រួតពិនិត្យ រោងចក្រដែលបានកសាងមួយ១០០ភាគរយ និងតបណ្តាញភ្ជាប់នៅថ្ងៃទី១៨ ខែធ្នូ ឆ្នាំ ២០១៤នេះជាលើក ដំបូងបង្អស់ដើម្បីដាក់ឲ្យប្រើប្រាស់ និងផ្គត់ផ្គង់ថាមពលរដ្ឋនៅក្នុងស្រុកស្ទោង ដោយយោងទៅតាមការចុះកិច្ចព្រមព្រៀងរវាងអាជ្ញាធរអគ្គិសនី និងអាជ្ញាធរខេត្តកំពង់ធំ តម្រូវម្ចាស់សេវាករ យកថ្លៃអគ្គីសនី ក្នុងមួយ គីឡូវ៉ាត់ ១៦០០រៀលសម្រាប់ខែ១២ឆ្នាំ ២០១៤ និងចាប់ផ្តើមនូវតំលៃ១៥០០រៀលក្នុងមួយគីឡូវ៉ាត ចាប់ពី ថ្ងៃទី១ ខែ មករា ឆ្នាំ ២០១៥នេះតទៅ ក្នុងនោះដែរឯកឧត្តម បានសហការជាមួយនឹងរដ្ឋបាលស្រុកស្ទោង ជម្រុញឲ្យក្រុមហ៊ុនអគ្គិសនីយតបណ្តាញ ទៅតាមបណ្តាឃុំមួយចំនួនដែលស្ថិតនៅឆ្ងាយពីថ្នល់ជាតិ ។
ចំណែកឃុំមួយចំនួនដែលនៅឆ្ងាយពីទីប្រជុំជន កំណត់ឲ្យប្រើប្រាស់សេវាកម្មអគ្គិសនីដូចដើម ករណីដែល ក្រុមហ៊ុនអគ្គីសនីមិនទាន់បានតបណ្តាយ និងបោះបង្គោលទៅដល់ ចំពោះឃុំណាដែលមានបណ្តាញអគ្គិសនីបោះបង្គោលទៅដល់ និងត្រូវអនុវត្តតាមការណែនាំរបស់ អជ្ញាធរអគ្គិសនីដែលបានកំណត់។
ដោយ ប៊ុន រដ្ឋា
