ខេត្តបន្ទាយមានជ័យកម្លាំងនគរបាលក្រុងសិរីសោភ័ណនិងក្រុងប៉ោយប៉ែតបានសហការណ៍គ្នាចុះបង្ក្រាបនិងចាប់ខ្លួន ជនសង្ស័យបានចំនួន៥នាក់បានជាបន្តបន្ទាប់ចាប់ខ្លួនជនសង្ស័យមានទាំងអ្នកចែកចាយ និងប្រើប្រាស់ព្រមទាំងដកហូតគ្រឿងញៀនប្រភេទយ៉ាម៉ាចំនួន៩៨គ្រាប់ផងដែរ។ ករណី
បង្ក្រាបអ្នកចែកចាយ និងប្រើប្រាស់ថ្នាំញៀន ខាងលើនេះ របស់កម្លាំង នគរបាល ស្រុកអូរជ្រៅ បានធ្វើឡើងកាលពីល្ងាច និងយប់ថ្ងៃទី១៧ ខែធ្នូ ឆ្នាំ២០១៤ ស្ថិតនៅ ឃុំអូរបីជាន់ ហើយក្រៅពីការ ដកហូតថ្នាំញៀន ប្រភេទយ៉ាម៉ា ទាំង ៩៨គ្រាប់ កម្លាំងនគរបាល ក៏បានដកហូតវត្ថុតាងមួយចំនួនផងដែរ។
មន្ត្រីនគរបាលស្រុកអូរជ្រៅបានថ្លែងឲ្យដឹងថាក្រោយពីទទួលបានសេចក្តីរាយការណ៍និងព័ត៌មានសំងាត់នៃសកម្មភាពចែកចាយរួចមកនគរបាលជំនាញព្រហ្មទណ្ឌនិងនគរបាលមូលដ្ឋានដឹកនាំដោយលោកអធិការស្រុកអូរជ្រៅបានធ្វើការស្រាវជ្រាវជាបន្ទាន់រហូតដល់ចាប់ខ្លួន ជនសង្ស័យទាំង៥នាក់ក្នុងនោះអ្នកចែកចាយ៣នាក់ស្ត្រីម្នាក់និងអ្នកប្រើប្រាស់ ចំនួន២នាក់ ។
មន្ត្រីនគរបាលបានបន្តទៀតថាតាមបញ្ជារបស់លោកស្នងការនគរបាលខេត្តនគរបាលជំនាញបាននិងកំពុងបន្តធ្វើការសួរនាំជនសង្ស័យទាំងនេះ ដើម្បីស្វែង រកបក្ខពួកផ្សេងទៀត។ ក្រោយការសួរនាំ ជន សង្ស័យទាំង៥នាក់ ត្រូវបាននាំខ្លួន ទៅឃុំខ្លួនជាបណ្តោះអាសន្ននៅអធិការដ្ឋាននគរបាលស្រុកដើម្បីកសាងសំណុំរឿងបញ្ជូន ទៅកាន់តុលាការចាត់ការតាមផ្លូវច្បាប់។ យ៉ាងណាក៏ដោយ សមត្ថកិច្ច មិនទាន់បានបង្ហាញអត្តសញ្ញាណ ជនសង្ស័យទាំង៥នាក់នោះនៅឡើយទេ៕
