ព្រះវិហារល្បែងស៊ីសងខុសច្បាប់ចាក់ឆ្នោតកន្ទុយលេខនៅខេត្តព្រះវិហារនៅតែមានសន្ទុះខ្លាំងក្លាប្រជែងយកឈ្នះទៅនឹងកំណើនសេដ្ឋកិច្ចក្នុងខេត្តដោយសារអាជីវករលក់ដូរស្ទើរ៨០ភាគរយក្នុងផ្សារកំពង់ប្រណាកនាំគ្នាញៀននឹងល្បែងចាក់កន្ទុយលេខភ្នាល់លុយច្រើនៗហើយរង់ចាំផ្ទៀងលទ្ធផល
ឆ្នោតរៀងរាល់ពេលល្ងាចស្ទើរភ្លេចគិតពីមុខរបរលក់ទំនិញទៅហើយ។ តាមសេចក្ដីរាយការណ៍ពីភ្នាក់ងារបានអោយដឹងថាអាជីវករលក់ដូរក្នុងផ្សារកំពង់ប្រណាកក្រុងព្រះវិហារប្រមាណ៨០ភាគរយបាននាំគ្នាងប់ងល់ខ្លាំងចាក់ឆ្នោតកន្ទុយលេខប្រែក្លាយពីទីផ្សារលក់ដោះដូរទំនិញទៅជាទីផ្សារលេងល្បែងស៊ីសងយ៉ាងផុសផុលហើយបានចាក់ឬសយ៉ាងជ្រៅ។រីឯក្បាលម៉ាស៊ីនមន្ដ្រីនគរបាលយុត្តិធម៌ត្រូវបានគេសង្ស័យថាបានទទួលសំណូកសូកប៉ាន់ពីស្ដ្រីមេឆ្នោតឈ្មោះផារីបុរសមេឆ្នោតឈ្មោះលីនិងបុរសមេឆ្នោតឈ្មោះកេងជនជាតិវៀតណាមអតីតមេបនល្បែងអាប៉ោងនៅក្រោយផ្សារកំពង់ប្រណាក។
ភ្នាក់ងារដដែលបានបង្ហើបអោយដឹងថាមេឆ្នោតទាំង៣នាក់នេះបានដើរនិយាយបោះពាក្យសំដីថាគ្មាននរណាម្នាក់មកចាប់ទេបើពួកគេបង់លុយប្រចាំខែ២លានទៅ៣លានរៀលក្នុង១ខែអោយគ្រប់ស្ថាប័នសមត្ថកិច្ចអស់ទៅហើយនោះដោយបំផុសអោយកូនកញ្ច្រែងក្រោមៗពី២០ទៅ៣០នាក់គិតតែពីកត់ឆ្នោតទៅកុំខ្វល់ពីការចាប់បង្ក្រាបនោះ។
លោកគង់គារអធិការនគរបាលស្ដីទីក្រុងព្រះវិហារបានអោយដឹងថាជនសង្ស័យជាមេឆ្នោតទាំង៣នាក់ខាងលើត្រូវបានអង្គភាពរបស់លោកកោះហៅអោយចូលខ្លួនមកធ្វើកិច្ចសន្យាអោយបញ្ឈប់ការលេងល្បែងស៊ីសងខុសច្បាប់ធ្វើជាមេឆ្នោតកន្ទុយលេខកតាំងពីខែវិច្ឆិការឆ្នាំ២០១៤ម្ដងរួចមកហើយ។លោកនឹងដាក់កំលាំងអោយស្រាវជ្រាវរកមុខសញ្ញាមេឆ្នោតកត់កន្ទុយលេខជាបន្តទៀតដើម្បីចាប់យកមកកសាងសំណុំរឿងបញ្ជូនខ្លួនទៅកាន់តុលាការខេត្តខណះពេលនេះឮថានៅតែមានអ្នកចាក់ឆ្នោតកន្ទុយលេខច្រើនដដែល។
ប្រជាពលរដ្ឋនិយាយរិះគន់ថាបើចង់ចាប់មេឆ្នោតធំទាំង៣នាក់ខាងលើបានភ្លាមៗវាងាយស្រួលទេបើសិនស្ថាប័នមន្ដ្រីនគរបាលយុត្តិធម៌កុំទទួលយកលុយសំណូកសូកប៉ាន់ពីមេឆ្នោតនោះ។សមត្ថកិច្ចចាប់មេឆ្នោតយកមកដាក់ទ្រុងមិនបានដោយសារតែមានចំណុចខ្សោយរបស់ខ្លួនគឺពាក់ព័ន្ធទៅនឹងអំពើពុករលួយទទួលលុយសំណូកក្រោមតុពីមេឆ្នោតតែម្ដងដើម្បីជាថ្នូរមិនចាប់បង្ក្រាបល្បែងស៊ីសងខុសច្បាប់។
ប្រភពព័ត៌មានដដែលនិយាយថាល្បែងឆ្នោតចាក់កន្ទុយលេខនេះកំពុងល្បីទូទាំងខេត្តព្រះវិហារនិងបានពង្វក់អារម្មណ៍ប្រជាជនប្រជាកសិករនិងអាជីវករលក់ដូរក្នុងផ្សារកំពង់ប្រណាកអោយញៀនចាក់កន្ទុយលេខឥតឈប់ឈរដោយដឹងថាក្នុង១ថ្ងៃអាចប្រមូលលុយចាក់ឆ្នោតសរុបទាំងអស់បានចំនួនជាង១០០លានរៀលឯណោះ។
អ្នកសារព័ត៌មានមិនអាចជួបទំនាក់ទំនង់សុំការបំភ្លឺពីស្ដ្រីមេឆ្នោតកត់កន្ទុយលេខឈ្មោះផារីបុរសមេឆ្នោតឈ្មោះលីនិងបុរសវៀតណាមមេឆ្នោតឈ្មោះកេងបានទេពាក់ព័ន្ធទៅនឹងប្រភពព័ត៌មានចោទប្រកាន់ថាបានបង់លុយប្រចាំខែចាប់ពី១លានទៅ២លានរៀលក្នុង១ខែទៅអោយស្ថាប័នមន្ដ្រីនគរបាលយុត្តិធម៌និងស្ថាប័នពាក់ព័ន្ធធំៗផ្សេងទៀត៕
