ភ្នំពេញ ៖ បុរសម្នាក់ជិះម៉ូតូមួយគ្រឿងបោះពួយយ៉ាងលឿនក៏ជ្រុលទៅបុករថយន្តតាក់ស៊ីម៉ែត្រ មហាកំផែងចតក្បែរចិញ្ចើមផ្លូវចំពេញទំហឹងបណ្ដាលអោយរងរបួសធ្ងន់ ហេតុការណ៍នេះ បានកើតឡើង កាលពីវេលាម៉ោង១២និង១០នាទីរំលងអាធ្រាត្រឈានចូលថ្ងៃទី១៩ខែធ្នូឆ្នាំ២០១៤ ត្រង់ចំណុចមុខ ក្រុមហ៊ុនជេស៊ីអឹម នីពផនប្រាយវេត តាមបណ្ដោយផ្លូវលេខ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
សាក្សីនៅកន្លែងកើតហេតុបានអោយដឹងថា មុនពេលកើតហេតុគេឃើញបុរសម្នាក់ជិះម៉ូតូមួយគ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ក9640 កណ១ ធ្វើដំណើរតាមបណ្ដោយ ផ្លូវលេខ២៧១ ទិសដៅពីកើតទៅលិចក្នុងល្បឿនយ៉ាងលឿន ស្រាប់តែមកដល់ចំណុចកើតហេតុ មិនដឹងថាយ៉ាងមិចម៉ូតូជនរងគ្រោះក៏រេចង្កូតមកបុកចំរថយន្តតាក់ស៊ីម៉ែត្រមួយគ្រឿង ពាក់ស្លាកលេខ ភ្នំពេញ 2AB-4174 ចតក្បែរចិញ្ចើមផ្លូវចំពេញទំហឹងបណ្ដាលអោយជនរងគ្រោះរងរបួសធ្ងន់ ហើយ រថយន្តនិងម៉ូតូរងការខូចខាតយ៉ាងដំណំ។
ក្រោយកើតហេតុសមត្ថកិច្ចមូលដ្ឋានក៏បានចុះមកអន្តរាគមន៍បញ្ជូនជនរងគ្រោះទៅមន្ទីរពេទ្យភ្លាមៗ ចំណែកម៉ូតូនិងរថយន្តសមត្ថកិច្ចបានវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំធ្វើការដោះស្រាយតាមផ្លូវច្បាប់ជាក្រោយ៕
