ភ្នំពេញ ៖ នារីម្នាក់ជិះម៉ូតូចេញពីធ្វើការត្រឡប់ទៅផ្ទះស្រាប់តែមកដល់ចំណុចស្ដុបផ្លូវបែកជាបួនក៏មាន រថយន្តមួយ គ្រឿង បើកបោះពួយយ៉ាងលឿនបុកប៉ះចំពេញទំហឹងបណ្ដាលអោយដួលរងរបួសធ្ងន់ ហើយ រថយន្តបង្កបើករត់បាត់។ ហេតុការណ៍នេះបានកើតឡើងកាលពីវេលាម៉ោង១១ និង៥០នាទីយប់ ថ្ងៃទី១៨ខែធ្នូឆ្នាំ២០១៤ ត្រង់ចំណុច ស្ដុបបូកគោ តាមបណ្ដោយផ្លូវព្រះមុនីវង្សកែងផ្លូវម៉ៅសេទុង ស្ថិតក្នុង សង្កាត់បឹងត្របែក ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេឃើញនារីម្នាក់ជិះម៉ូតូ មួយគ្រឿងម៉ាកហុងដា អាយខុន ពណ៌ត្រួយចេក ពាក់ស្លាកលេខ ភ្នំពេញ 1AS-4440 ចេញពីធ្វើការត្រឡប់ទៅផ្ទះ ធ្វើដំណើរតាមបណ្ដោយ ផ្លូវម៉ៅសេទុង ទិសដៅពីលិចទៅកើត ក្នុងល្បឿនលឿន ស្រាប់តែមកដល់ចំណុចស្ដុបបូកគោ ក៏មានរថយន្តមួយគ្រឿង មិនចាំម៉ាកបើកធ្វើដំណើរតាមបណ្ដោយផ្លូវព្រះមុនីវង្សយ៉ាងលឿនក៏បុកប៉ះម៉ូតូនារីរងគ្រោះចំពេញទំហឹងបណ្ដាលអោយដួលរងរបួសធ្ងន់សន្លប់ស្ដូកស្ដឹង ហើយរថយន្តបង្កបានបន្ថែមល្បឿនទៅមុខគេខ្លួនបាត់។
បន្ទាប់ពីកើតហេតុសមត្ថកិច្ចមូលដ្ឋានក៏បានចុះមកអន្តរាគមន៍ ហើយបញ្ជូនជនរងគ្រោះទៅមន្ទីរពេទ្យភ្លាមៗចំណែកម៉ូតូ សមត្ថកិច្ចបានក៏ត្រួតពិនិត្យឯកសាររួចរាល់ក៏ប្រគល់អោយគ្រួសារជនរងគ្រោះយកទៅវិញ។
សូមបញ្ជាក់ថា នៅចំណុចស្ដុបបូកគោ ឧស្សាហ៍កើតមានគ្រោះថ្នាក់ចរាចរញឹកញ៉ាប់ណាស់នៅពេលយប់ស្ងាត់ គឺ រថយន្តបើកលឿនៗណាស់ មិនបន្ថយល្បឿនឡើយខណៈបើកមកដល់ចំណុចផ្លូវបែកជាបួន ហើយករណីខ្លះ ក៏បណ្ដាលអោយមានមនុស្សស្លាប់ និងរងរបួសធ្ងន់ជាច្រើននាក់ ដូច្នេះសំណូមពរដល់ប្រជាពលរដ្ឋដែលធ្វើដំណើរ ពេលយប់សូមប្រុងប្រយ័ត្ននៅចំណុចនេះព្រោះវាអាចបង្កគ្រោះថ្នាក់ជាយកថាហេតុ បើសិនជាយើងមិនប្រុងប្រយ័ត្ន៕
