គណៈកម្មការ និងអាជ្ញាធរខេត្តកំពង់ធំ រួមមានសមត្ថកិច្ចជំនាញសូរិយោដី បរិស្ថាន ធនធានទឹក រ៉ែថាមពល សាធារណៈការដឹកជញ្ជូនខេត្តកំពង់ធំ និងបរិស្ថាន បានចុះត្រួតពិនិត្យស្ថានភាព ដើម្បីសិក្សាពីផលប៉ះពាល់ទីតាំងអជីវករសុំ ការអនុញ្ញាតិបូមខ្សាច់ ក្រោមការដឹកនាំ ដោយឯកឧត្តម គង់ វិមាន អភិបាលរងខេត្តកំពង់ធំ អមដំណើរដោយលោក ហុក រិន អភិបាលសក្រុងស្ទឹងសែន កាលពីព្រឹកថ្ងៃទី ១៩ ខែធ្នូ ឆ្នាំ ២០១៤ ។
ក្រោយពីគ្រប់ជំនាញបានសិក្សាទីតាំងអជីវករសុំបូមខ្សាច់ នៅចំនុចភូមិអូសំបួរ ឃុំក្តីដូង ស្រុកកំពង់ស្វាយ ខេត្តកំពង់ធំ បានពិនិត្យឃើញថា ទីតាំងខាងលើជាប្រភេទដីដុះ នៅជាប់មាត់ស្ទឹងសែន ដោយយោងតាម សភាពជាក់ស្តែងនៃស្ទឹងដែលមាន រាងកោង១៨០អង្សា នៅរដូវវស្សាបណ្តាលឲ្យមានទឹកហូរបោកច្រាងម្ខាង ធ្វើឲ្យដីមាត់ស្ទឹងម្ខាងទទួលរងនូវការបាក់ច្រាំងជាបន្តបន្ទាប់ ដោយសារកំលាំងទឹកហូរ ចំណែកច្រាំងម្ខាងទៀតបែរជាមានដីខ្សាច់ចំនួនច្រើនមក កកលើគ្នាបង្កើតជាទួលដីដុះ ដោយពិនិត្យឃើញថាបើសិនជាទុកឲ្យ មានសភាពបែបមិនយូរមិនឆាប់ច្រាំងស្ទឹងសែនបាក់ដល់ដីស្រែ ឬលំនៅដ្ឋានរបស់ប្រជាពលរដ្ឋ ។
យោងតាមការពិគ្រោះយោបល់រវាងជំនាញគ្រប់ស្ថាប័ន បានយល់ឃើញថាបើកាលណាជីកកាយដីទួលដីដុះ វាអាចកាត់បន្ថយការបាក់ច្រាំងម្ខាងទៀត ដែលប្រៀបបានទៅនឹងការកាយផ្លូវទឹក កាត់បន្ថយកំលាំងទឹកបុក ច្រាំងនាំឲ្យបាក់បន្ត ចំពោះលោក ស្រី តាន់ ជីវហូត និងលោក ជីវ គឹមអ៊ុន ជាអជីវករដែលបានសុំការអនុញ្ញាតិធ្វើអជិកម្មស្របច្បាប់ដើម្បីសុំសិទ្ធិក្នុងការយកខ្សាច់ចំនុនដីដុះនេះ អជ្ញាធរ និងជំនាញបានសុំការសិក្សា និងធ្វើការសម្របសម្រួលពីប្រជាពលរដ្ឋ ដែលមានទីតាំងក្បែរកន្លែងសុំធ្វើអជីវកម្មនេះ ដើម្បីឲ្យប្រជាពលរដ្ឋ មានសិទ្ធិក្នុងការសំណូមពរនូវ ផលប៉ះពាល់នៅថ្ងៃមុខ ។
ក្នុងនោះដែរឯកឧត្តម គង់ វិមាន អភិបាលរងខេត្តកំពង់ធំ បានមានប្រសាសន៍ណែនាំឲ្យមន្ត្រី និងមន្ទីរពាក់ ព័ន្ឋពិគ្រោះយោបល់គ្នា និងសិក្សាទីតាំងខាងលើដើម្បីធ្វើការសម្រេច ដោយមានការឯកភាពគ្រប់ស្ថាប័ន ព្រមទាំងធ្វើកិច្ចសន្យារវាងអជីវករ និងគណៈកម្មការចម្រុះពីផលប៉ះពាល់ទៅថ្ងៃមុខ ឬអជីវករមិនបានគោរព តាមការណែនាំ និងត្រូវបានដកសិទ្ធិក្នុងការបន្តអជីវកម្ម រួមទាំងការចូលរួមកសាង ស្ថាបនាសមិទ្ធផលផ្សេង ក្នុងមូលដ្ឋានជូនប្រជាពលរដ្ឋ ។
ដោយ ប៊ុន រដ្ឋា
