កំពង់ឆ្នាំង៖រថយន្តម៉ាកកាមរីហើមបានបើកទៅបុកម៉ូតូវ៉េវហើយជ្រុលទៅបុកសិស្សសាលាម្នាក់ដែលកំពុងជិះកង់លើផ្លូវម្ខាងទៀត បណ្តាលអោយរងរបួសធ្ងន់ទាំងពីរនាក់ ហើយរថយន្តបានបើករត់គេច។ហេតុការណ៏គ្រោះថ្នាក់នេះបានកើតឡើងនៅវេលាម៉ោង២និង២៥នាទីថ្ងៃទី១៨ខែធ្នូ ឆ្នាំ២០១៤ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ៨១និង៨២ ត្រង់ចំណុចខាងមុខផ្សារព្រៃខ្មែរដែលស្ថិតក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំបង់ឆ្នាំង។
ប្រភពពីសមត្ថកិច្ចដែលស្ថិតនៅកន្លែងកើតហេតុបាននិយាយអោយដឹងថា៖ម្ចាស់រថយន្តដែលបង្កគ្រោះថ្នាក់នេះគេមិនបានស្គាល់ឈ្មោះនោះទេ ហើយរថយន្តនេះម៉ាកកាមរីហើម ពណ៍ខ្មៅ ពាក់ស្លាកលេខPP2A6805 ជារថយន្តតាក់ស៊ី បើកបរក្នុងទិសដៅពីជើងទៅត្បូង ស្របទិសគ្នានិងជនរងគ្រោះដែលជិះម៉ូតូម៉ាកវីវ៉ា ពណ៍ខ្មៅ ពាក់ស្លាកលេខកំពង់ឆ្នាំង1A8628 បើកបរដោយឈ្មោះ ថុច ស៊ីថា អាយុ៣៣ឆ្នាំ រងរបួសធ្ងន់ រស់នៅក្នុងភូមិឈើត្រាច ឃុំគោកបន្ទាយ ស្រុករលាប្អៀរ ហើយក្មេងស្រីរងគ្រោះដែលជិះកង់ម្នាក់ទៀត ឈ្មោះ បូ ស្រីចាន់ អាយុ១៧ឆ្នាំ ជាសិស្សសាលា រស់នៅក្នុងភូមិចំបក់គន្រាញ ឃុំតាំងក្រសាំង ស្រុកទឹកផុសរងរបួសធ្ងន់ ត្រូវបានបញ្ជូនទៅសង្គ្រោះនៅភ្នំពេញ ដោយសារតែនាងមានអាការះឈាមចេញតាមត្រចៀក និងក្អួនជាប់រហូត ។
ប្រភពពីប្រជាពលរដ្ឋដែលនៅជិតកន្លែងកើតហេតុបាននិយាយអោយដឹងថា៖នៅមុនពេលកើតហេតុគេបានឃើញរថយន្តបង្កខាងលើបើកបរក្នុងល្បឿនយ៉ាងលឿន លុះមកដល់កន្លែងកើតហេតុដែលនៅខាងមុខផ្សារព្រៃខ្មែរក៏បានបុកនិងម៉ូតូដែលបើកបរក្នុងទិសស្របទិសគ្នាផ្នែកខាងស្តាំដៃ បណ្តាលអោយប៉ើងមនុស្សបោកក្បាលនិងថ្នល់រងរបួសធ្ងន់ ភ្លាមនោះរថយន្តបានរេចង្កូតមកខាងឆ្វេងដៃមកបុកក្មេងស្រីដែលកំពុងជិះកង់ចេញពីសាលា ធ្វើអោយរងរបួសធ្ងន់ម្នាក់ទៀត ភ្លាមនោះអ្នកបើករថយន្តបង្កបានបើករត់គេចចំងាយប្រមាណជា៣០ទៅ៤០ម៉ែត្រ ហើយបានចតរថយន្តចោលរួចបើកទ្វារថយន្តរត់គេចខ្លួនបាត់ ដោយទុករថយន្តចោលជាមួយអ្នកធ្វើដំណើរនៅកន្លែងកើតហេតុ។
ក្រោយពេលកើតហេតុជនរងគ្រោះទាំងពីរនាក់ត្រូវបានបងប្អូនប្រជាពលរដ្ឋដឹកយកមកដាក់នៅក្នុងមណ្ឌលសុខភាពព្រៃខ្មែរ ដើម្បីព្យាបាលតែដោយសាររបួសជនរងគ្រោះទាំង២នាក់មានសភាពធ្ងន់ធ្ងរពេក ក្រុមគ្រួសារក៏បាន ហៅរថយន្តសង្គ្រោះរបស់មន្ទីពេទ្យបង្អែកខេត្ត ដឹកយកមកមន្ទីពេទ្យខេត្ត ដើម្បីធ្វើការសង្គ្រោះបន្ទាន់ភ្លាមៗផងដែរ។ ចំណែកក្មេងស្រីដោយមានសភាពធ្ងន់ពេកត្រូវបានក្រុមគ្រូពេទ្យបង្អែកខេត្តដឹកបញ្ជូនបន្តទៅសង្គ្រោះនៅមន្ទីរពេទ្យ ក្រុងភ្នំពេញ ។
ដោយឡែករថយន្តបង្កត្រូវបានកំលាំងនគរបាលអធិការដ្ឋានស្រុករលាប្អៀរ នាំយកមករក្សាទុក ដើម្បីរង់ចាំធ្វើការដោះស្រាយតាមផ្លូវច្បាប់នៅពេលក្រោយ ។តែទោះជាយ៉ាងណាជនរងគ្រោះក្នុងករណីគ្រោះថ្នាក់ចរាចរណ៏ខាងលើ គេនៅពុំទាន់ដឹងថាយ៉ាងណានៅឡើយនោះទេ ព្រោះជនរងគ្រោះទាំង២កំពុងស្ថិតនៅក្នុងការសង្គ្រោះបន្ទាន់ដោយម្នាក់នៅមន្ទីរពេទ្យខេត្ត និងម្នាក់ទៀតនៅសង្គ្រោះឯមន្ទីរពេទ្យភ្នំពេញនៅឡើយ ៕
